ކުއަޑްގެ ޚާރިޖީ ވަޒީރުން އެމެރިކާއަށް

ޗައިނާގެ ނުރައްކަލުން ދިފާޢުވުމަށް އުފައްދާފައިވާ އަސްކަރީ އެލަޔަންސްކަމަށްވާ ކުއަޑްގެ ޚާރިޖީ ވަޒީރުންގެ ބައްދަލުވުމަށް އަނެއް 3 ޤައުމުގެ ޚާރިޖީ ވަޒީރުން އެމެރިކާއަށް ވަޑައިގެންފިއެވެ.

ކުއަޑްގައި ހިމެނެނީ އެމެރިކާގެ އިތުރުން އިންޑިއާ، ޖަޕާން އަދި އޮސްޓްރޭލިއާ އެވެ. ކުއަޑް ފޮރިން މިނިސްޓަރުންގެ ބައްދަލުވުން އޮންނާނީ ވޮޝިންޓަން ޑީ.ސީގައި މިއަދުގެ ވަގުތެއްގައެވެ. އިންޑިއާގެ ޚާރިޖިއްޔާއިން ބުނީ މި ބައްދަލުވުމުގައި އޮންނާނީ މިދިޔަ ޖެނުއަރީ މަހު ބޭއްވި ކުއަޑްގެ ބައްދަލުވުމުގައި ކުރަން ފެށުނު މަޝްވަރާތައް ކުރިއަށް ގެންދިޔުމާއި، މި ދެބައްދަލުވުމުގެ ދެމެދު ކުރެވުނު މަސައްކަތްތަކާއި ބެހޭ ގޮތުން މަޝްވަރާކުރެއްވުން ކަމަށެވެ. އެމެރިކާގެ ރައީސްކަމަށް ޑޮނަލްޑް ޓްރަމްޕް ދެވަނަ ދައުރަކަށް ހުވާކުރެއްވުމަށްފަހު، އައު ޚާރިޖީ ވަޒީރު މާކޯ ރޫބިއޯ އެންމެ ފުރަތަމަ ބޭއްވި ރަސްމީ ބައްދަލުވުމަކީ ކުއަޑްގެ ޚާރިޖީ ވަޒީރުންގެ ބައްދަލުވުމެވެ.

މި ފަހަރުގެ ބައްދަލުވުމުގައި ސަރަހައްދީ އަދި ބައިނަލްއަޤްވާމީ މައްސަލަތަކާއި، ޚާއްސަކޮށް އިންޑޯޕެސިފިކް ސަރަހައްދުގެ ސަލާމަތީ އަދި އެހެނިހެން ދާއިރާތަކުގެ މައްސަލަތަކާ ބެހޭ ގޮތުން 4 ޤައުމުގެ ޚާރިޖީ ވަޒީރުން މަޝްވަރާކުރައްވާނެއެވެ. އަދި ހަމައެއާއެކު މިއަހަރު ފަހުކޮޅު އިންޑިއާގައި ބޭއްވުމަށް މަސައްކަތްކުރަމުންދާ ކުއަޑްގެ 4 ޤައުމުގެ ވެރިންގެ ބައްދަލުވުމުގެ ތައްޔާރީތަކާއި ބެހޭ ގޮތުންވެސް މިއަދު ޚާރިޖީ ވަޒީރުން މަޝްވަރާކުރައްވާނެއެވެ.