ބަންޑާރަ މިސްކިތާއި ޒިކުރާ މިސްކިތް އަޅަން ފަންޑު ލިބިއްޖެ، ރޯދައިގެ ފަހުން ފަށަނީ
ލިޔުންތެރިޔާ
އަހުމަދު ހަމީދު އާދަމް
ބަންޑާރަ މިސްކިތާއި ޒިކުރާ މިސްކިތް އަޅަން ފަންޑު ލިބިފައިވާ ކަމަށް އިސްލާމިކް މިނިސްޓްރީން ބުނެފި އެވެ.
އެކަން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ހާމަކުރައްވާފަ އެވެ. މީޑިއާތަކަަށް ފޮނުވި މެސެޖެއްގައި މިނިސްޓަރު ވިދާޅުވީ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަމަސް ފަހުން ފެށިގެންދާނެ ކަމަށެވެ.
އަދި މިކަމަށް ބޭނުންވާ އެހީތެރިކަން ދީލަތި ފަރާތަކުން ވަނީ ހަމަޖެހިފައި ކަމުގައި ވިދާޅުވި އެވެ.
އަދި ވިދާޅުވީ މާލޭގެ މަޖީދީ މަގުގައި ގިނަ ދުވަސްތަކެއްވަންދެން ވަގުތީ މިސްކިތެއްގެ ގޮތުގައި ހުރި ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް ވެސް ދީލަތި އެހީ ހަމަޖެހިފައިވާ ކަމަށެވެ. މި މިސްކިތެއް އެޅުމަށްޓަކައި މި ރަމަޟާން މަހުގެ 27 ވިލޭރޭ ބިންގާ އަޅުމަށް އެހީދޭ ފަރާތުން އެދިފައިވާ ކަމަށް ވިދާޅުވި އެވެ. ރޯދަ މަސް ނިމުމުން ވަގުތީ މިސްކިތް ތަޅާލައި ޢަމަލީ މަސައްކަތް ފަށާނެ ކަމުގައި މިނިސްޓަރު ވިދާޅުވި އެވެ.
މިއާއެކު މާލެގެ ބޮޑެތި ހުރިހައި މިސްކިތެެއް އާވެގެން ދާނެ އެވެ.
ޒިކުރާ މިސްކިތް އައުކުރަން މަސައްކަތް ކުރާތާ އެތައް އަހަރެއް ވެއްޖެ އެވެ. ޔާމީން ސަރުކާރުގައި އެ މަސައްކަތް ހަވާލުކުރީ އެސްޖޭއޭއާ އެވެ. ނަމަވެސް ބައު މިސްކިތް ތަޅާލުން ފިޔަވާ އެހެން ކަމެއް ނުވެ އެވެ. ފަހުން ސަރުކާރަށް ޖެހުނީ އަނެއްކާ ވަގުތީ މިސްކިތެއް ހަދާށެވެ.
އޭގެ ފަހުން އެކަމުގެ ބަދަލެއް ގޮތު އެސްޖޭއަށް ހުޅުމާލޭގައި މިސްކިތެއް އަޅަން ހަވާލުކުރި އެވެ. އެކަމަކު އެ މަސައްކަތް ވެެސް ކަނޑައެޅި އެތައް ތާރީހަކަށް ވެސް ނިންމާ ނުލެވުނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
