ސްމާޓް ގްރިޑް ގެ ސަބަބުން ކަރަންޓް ކެނޑިފައި ހުންނަ ވަގުތު ކުޑަކޮށް އާއްމުންނަށް ކުރިމަތިވާ ދަތިތަކަށް ލުއިލިބޭ: ސްޓެލްކޯ

ސްމާޓް ގްރިޑް ގެ ސަބަބުން ކަރަންޓް ކެނޑިފައި ހުންނަ ވަގުތު ކުޑަކޮށް އާއްމުންނަށް ކުރިމަތިވާ ދަތިތަކަށް ލުއިލިބިގެންދާ ކަމަށް ސްޓެލްކޯއިން ބުނެފިއެވެ.

ސްޓެލްކޯއިން ވަނީ ސްމާޓް ގްރިޑްގެ މަޝްރޫޢު އާއެކު މާލެ އަދި ރަށްރަށުގައި ވެސް އޮފީހުގައި ތިބެގެން ޓްރާންސްފޯމަރުތަކުގެ ލޯޑު ބަލައި ޓްރާންސްފޯމަރު ނިއްވާ އަދި ޖެއްސޭނެ ނިޒާމެއް މިހާރު ގާއިމް ކޮށްފައެވެ. އެ ނިޒާމް ގާއިމް ނުކުރެވި ހުރީ އެންމެ ތިން ރަށުގައި ކަމަށް އެ ކުންފުނިން ބުނާއިރު، އެ ތިން ރަށުގައިވެސް އަންނަ އަހަރު އެ މަސައްކަތް ނިމޭނެ ކަމަށް ބުނެފައިވެއެވެ.

މިކަމާ ބެހޭ އިތުރު މައުލޫމާތު ހިއްސާ ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ސްޓެލްކޯގެ ޖެނެރަލް މެނޭޖަރު، ޓްރާންސްމިޝަން އެންޑް ޑިސްޓްރިބިއުޝަން އިބްރާހިމް ނާޝިދު ވަނީ، ސްމާޓް ގްރިޑްގެ ސަބަބުން ކަސްޓަމަރުންނަށް ލިބޭނެ ފައުދާތަކުގެ މައްޗަށް އަލިއަޅުވާ ލައްވާފައެވެ.

އެގޮތުން ވިދާޅުވީ، މީގެ ކުރިން ކަރަންޓް ކެނޑިއްޖެ ނަމަ، ޖެހެނީ ޕިޒިކަލީ އެ ޓްރާންސްފޯމަރ ކައޮރިއަށް ދާން ކަމަށެވެ. އޭގެ ސަބަބުން ކަރަންޓް ކެނޑިފައި ހުންނަ ވަގުތުތަށް ދިގުދެމިގެންދާ ކަމަށެވެ.

އަޅުގަނޑުމެން، 2021 ވަނަ އަހަރާ، 2022 ވަނަ އަހަރުގެ ފަހު ކޮޅު ސްމާޓް ގްރިޑް ތައާރަފް ކުރުމާ އަޅާ ބަލާނަމަ، ކަރަންޓް ކެނޑިފައި ހުންނަ ވަގުތު، 260 މިނެޓުން 93 މިނެޓަށް ކުޑަ ކުރެވިއްޖެ.

ސްޓެލްކޯގެ ޖެނެރަލް މެނޭޖަރު، ޓްރާންސްމިޝަން އެންޑް ޑިސްޓްރިބިއުޝަން އިބްރާހިމް ނާޝިދު

ނާޝިދު ވިދާޅުވީ، އަންނަ އަހަރުގެ ފުރަތަމަ ކުއާޓާ ނިމޭއިރު އެ ޕްރޮޖެޚްޓް ނިމޭނެ ކަމަށާ، އެއާއެކު “އެކިއެކި ސަބަބު ތަކާއިހުރެ ކަރަންޓް ކެނޑުމުން އެ ދިމާވާ އުނދަގޫތައް ވަރަށް ބޮޑުތަނުން ހައްލުވެގެންދާނެ” ކަމަށެވެ.

"މާލެ އާއި ހުޅުމާލޭގެ 57 ޓްރާންސްފޯމަރު މިހާރު ގްރިޑު ތެރެއަށް އިންޓަގްރޭޓު ވެފައި އެ ހުރީ. އަޅުގަނޑުމެންގެ ފީޑުގައި ހުރި ހުރިހާ ޑިސްޓްރިބިއުޝަން ނެޓްވޯކަކަށް ފައިބާ ނެޓްވޯކު އެޅިފައި އެ ހުރީ. އަޅުގަނޑުމެންގެ ސްމާޓް ގްރިޑުގެ ބެކް ބޯން ސްޓްރަކްޗާ އެކީ ނިމިފައި އެ ވަނީ،" ސްޓެލްކޯގެ ޖެނެރަލް މެނޭޖަރު، ޓްރާންސްމިޝަން އެންޑް ޑިސްޓްރިބިއުޝަން އިބްރާހިމް ނާޝިދު ވިދާޅުވި އެވެ.