76 ޕޮއިންޓުން މަތި ލިބުނު އެންމެންގެ ގުރުނުނަގައި ދަށުން ލިބުނު 301 މީހަކަށް ފްލެޓް ކަނޑައެޅި މައްސަލަ އޭސީސީއަށް

ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީ ކޮށްފައިވާ 4000 ހައުސިން ޔުނިޓް ލިބޭ މީހުން ކަނޑައެޅުމުގައި 76 ޕޮއިންޓުން މަތި ލިބުނު އެންމެންގެ ގުރުނުނަގައި އޭގެ ދަށުން ލިބުނު ބަޔަކަށް ފްލެޓް ކަނޑައެޅި މައްސަލަ އޭސީސީއަށް ހުށައަޅައިފި އެވެ.

މިނިސްޓްރީ އޮފް ކޮންސްޓަރަކްޝަން، ހައުސިން އެންޑް އިންފްރާސްޓްރަކްޗާގެ އޮފިޝަލަކު ވަނީ އެކަން ވޮއިސްއަށް ޔަގީން ކޮށްދީފަ އެވެ.

އެ މިނިސްޓްރީން ކުރީން ބުނި ގޮތުގައި މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ އިން 2023 ނޮވެންބަރުގައި ކޮށްފައިވާ އިއުލާނުގައި، އެ އިއުލާނާއެކު ދިވެހި ސަރުކާރުގެ ގެޒެޓްގައި ޝާއިއުކޮށްފައިވާ ގެދޮރުވެރިޔާ ސްކީމުގެ ފައިނަލް ލިސްޓުގައި ހިމެނޭ މީހުންގެ ތެރެއިން ފުރަތަމަ ބުރުގައި 3 ކޮޓަރީގެ ފުލެޓް ލިބެނީ 76 އިންސަރައިން ފެށިގެން މަތިން މާކްސް ލިބިފައިވާ މީހުންނަށް ކަމަށާ އެ މީހުންނަށް ލިބޭ ފުލެޓް ކަނޑައެޅުމަށްފަހު ބާކީވާ ފުލެޓްތައް 75 މާކްސް ލިބިފައިވާ މީހުންގެ ތެރެއިން ގުރުއަތަކުން ހޮވޭ މީހުންނަށް ދިނުމަށް ނިންމާފައިވާ ކަމަށް ބަޔާންކޮށްފައިވާ ކަމަށެވެ.

އަދި ފުރަތަމަ ބުރުގައި ދެ ކޮޓަރީގެ ފުލެޓް ލިބެނީ 73 އިންސައްތައިން ފެށިގެން މަތިން މާކްސް ލިބިފައިވާ މީހުންނަށް ކަމަށް ބަޔާންކޮށްފައިވެ އެވެ.

ނަމަވެސް މިނިސްޓްރީން ބުނި ގޮތުގައި ގެދޮރުވެރިޔާ ސްކީމުން ލިބޭ ފުލެޓްތައް ކަނޑައެޅުމަށް 2023 ނޮވެންބަރު 16 ވަނަ ދުވަހު ކުރިއަށްގެންދިޔަ ގުރުއަތު ނެގުމުގައި، 76 އަށް ވުރެ މަތިން މާކްސް ލިބި ފުލެޓް ކަނޑައެޅުމަށްޓަކައި ގުރުއަތު ނަގާފައިނުވާ މީހުން ހުރިކަމަށް މިނިސްޓްރީއަށް ފާހަގަކުރެވިފައިވާ ވެ އެވެ.

އަދި 76 އިންސައްތައަށް ވުރެ މަތިން މާކްސް ލިބިފައިވާ ބައެއް މީހުންނަށް ފުލެޓް ކަނޑައަޅާފައިނުވަނީސް، 75 އިންސައްތައަށް ވުރެ މަތިން މާކްސް ލިބުނު ބައެއް މީހުންނަށް ލިބޭ ފުލެޓް ކަނޑައެޅުމަށްޓަކައި ގުރުއަތުނަގައި އެ މީހުންނަށް ފުލެޓް ކަނޑައަޅާފައިވާކަން ފާހަގަކުރެވިފައިވާ ކަމަށެވެ.

އޭސީސީއަށް ހުށައެޅީ އެ މައްސަލަ ބަލާށެވެ. އެގޮތަށް 301 ފްލެޓް ވަނީ ކަނޑައަޅާފަ އެވެ. އަދި އެއީ ވަކި ބަޔަކަށް މަންފާ ހޯދާ ދިނުމަށް ކޮށްފައިވާ ކަމެއް ކަމަށް ބެލެވޭތީ އެކަން ބަލައިދިނުމަށް ވަނީ އެދިފަ އެވެ.