ހަމަހަމަ ކަމާއެކު ހުރިހާ ގެއެއްގައިވެސް ސޯލާ ޕެނަލް ހަރުކުރެވޭ ގޮތް ހެދުމަށް މަސައްކަތް ކުރަމުން މިދަނީ: ޠާރިގު

ހަމަ ހަމަ އުސޫލެއްގެ ތެރެއިން، ސޯލާ ޕެނަލް ހަރުކުރުމުގެ ފުރުޞަތު އާއްމު ރައްޔިތުންނަށް ދެވޭނެ ގޮތަކަށް އުސޫލު ބަދަލު ކުރަން މަސައްކަތް ކުރައްވަމުންދާ ކަމަށް މިނިސްޓަރ އޮފް ކްލައިމެޓް ޗޭންޖް އެންވަޔަރަންމަންޓް އެންޑް އެނަރޖީ ޠާރިޤު އިބްރާހީމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ވަޒީރު ޠާރިގު މަޖިލީހަށް ހާޒިރުކޮށް ސުވާލު ކުރުމަށް ހުޅުވާލި ފުރުސަތުގައި ކަނޑިތީމު ދާއިރާގެ މެންބަރު އަމީން ފައިޞަލް ވަނީ، ނެޓް މީޓަރިންގ އުސޫލުގައި ގޭބީސީ ތަކަށް %60 ދޭ ގޮތަށް ހިމަނާފައިވާކަން ފާހަގަކުރައްވައި، އެ ޕަސެންޓް ގޭބީސީ ތަކުގެ މެދުގައި ހަމަހަމަ ގޮތަކަށް ބަހާލެވޭ ގޮތަށް ގަވާއިދު ބަދަލު ކުރުމުގެ ވިސްނުމެއް ގެންގުޅުއްވާތޯ ސުވާލު ކުރައްވާފައެވެ.

އަޅުގަނޑު ގަބޫލު ކުރާ ގޮތުގައި އެ އިންނަ ކެޕޭސިޓީ ކޮންމެ ގޭބިސީއަކަށްވެސް އެ އިންނަ އަދަދަކަށް ބޭނުން ކުރެވޭނެ އުސޫލެއް އިންނަންޖެހޭނެ. އެހެންނޫނީ މިވާގޮތަކީ އެންމެ ފުރަތަމަ ތަނަވަސްމީހާ ސޯލާ ހަރުކުރީމާ ދެން ތަންކޮޅެއް މެދުފަންތީގެ މީހާއަށް ސޯލާ ހަރުކުރުމުގެ ފުރުސަތެއް ނުލިބި މިދަނީ.

އަމީން ފައިޞަލް

އެހެން ކަމުން ހަމަ ހަމަ އުސޫލަކުން ކޮންމެ ގޭބިސީއަކަށްވެސް ކޮންމެސް ވަރެއްގެ ސޯލާ ޕަސެންޓެއް ހަރުކުރެވޭނެ ގޮތަށް އުސޫލު ބަދަލުކުރުމުގެ ވިސްނުން ގެންގުޅުއްވަންތޯ އަމީން ފައިޞަލް ވަނީ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ހަމަހަމަ ގޮތެއްގައި ސޯލާ ހަރުކުރެވޭ ގޮތަށް ކޮންމެ ގެއަކަށް ވަކި ޕަސެންޓެއް ކަނޑައެޅުމަށް ކުރަންޖެހޭ ކަންކަން މިހާރުވެސް ކުރައްވަމުންދާ ކަމަށެވެ.

ކޮންމެ ގެއަކަށް އެ ރަށެއްގެ އެ އިންނަ ޕަސެންޓޭޖުން ކިހާވަރެއްތޯ ބަހާލެވޭނީ.  އެގޮތަށް އެބަ މަސައްކަތް ކުރަމުންދަން. ކިހިނެއްތޯ ކޮންމެ ގެއަކަށް ވަކިން ރިޒާވް ކިރެވޭގޮތަށް ހެދޭނީ ކޮން ގޮތަކަށްތޯ ބަލަމުން މިދަނީ

ވަޒީރު ޠާރިޤު އިބްރާހީމް

ވަޒީރު ވިދާޅުވިގޮތުގައި، އެގޮތަށް ކަނޑައެޅެން އޮތީ ބެޓެރި ސިސްޓަމާއި ނެޓްވޯކް ސިސްޓަމް ހަރުކުރެވިގެންނެވެ. އެކަން ނުކޮށްފި ނަމަ، ބައެއް ހާލަތްތަކުގައި މުޅި ރަށުން ކަރަންޓް ގޮސް، އާއްމު ރައްޔޮތުންގެ ތަކެއްޗަށްވެސް ގެއްލުން ލިބުމުގެ ފުރުސަތު އޮންނާނެކަމަށް ވަޒީރު ވިދާޅުވުއެވެ.

އެހެންކަމުން ބެޓަރީ ސިސްޓަމް ހަރުކޮށް ނެޓްވޯކް ރަނގަޅު ކުރުމުގެ މަސައްކަތް މިހާރު ކުރައްވަމުންދާކަމަށް ވަޒީރު ވިދާޅުވިއެވެ.