ރިޒާ ޖޭއެސްސީގެ މެންބަރުކަމުން ވަކިކުރުން އަންނަ ހޯމަދުވަހު

ރައްޔިތުންގެ މަޖިލީހުގެ ފަރާތުން ޖުޑީޝަލް ސާރވިސް ކޮމިޝަން (ޖޭއެސްސީ)އަށް ކަނޑައަޅާފައިވާ ހުންނަ މެންބަރުކަމުން ކ.ގުރައިދޫ ދާއިރާގެ މެންބަރު އިބްރާހިމް ރިޒާ ވަކިކުރުމުގެ މައްސަލަ، އަންނަ ހޯމަ ދުވަހަށް ތާވަލްކޮށްފިއެވެ.

ގުރައިދޫ ދާއިރާގެ މެންބަރ ރިޒާ، ޖޭއެސްސީގެ މެންބަރުކަމުން ވަކިކުރުމަށް ހުށައަޅާފައިވަނީ ވައިކަރަދޫ ދާއިރާގެ މެންބަރު މުހައްމަދު ނާޒިމްއެވެ. މައްސަލަ ހުށައަޅުއްވަމުން ނާޒިމް ވިދާޅުވީ ރިޒާ، އެބޭފުޅާގެ ގާނޫނީ މަސްއޫލިއްޔަތުތައް އަދާކުރައްވަމުން ނުގެންދަވާކަމަށެވެ.

މި މައްސަލައިގައި ޖަވާބުދާރީވުމަށް ރިޒާއަށް 15 މިނެޓްގެ ވަގުތެއް ދިނުމަށް މަޖިލީހުގެ އާންމު ކޮމެޓީން ވަނީ ނިންމާފައެވެ.

މި މައްސަލައިގެ އިތުރުން އަންނަ ހޯމަދުވަހު ވަނީ އަބުރު ރައްކާތެރިކުރުމުގެ ގާނޫނު އުވާލުމުގެ ބިލްގެ އިބްތިދާއީ ބަހުސް ބޭއްވުމަށްވެސް ތާވަލްކޮށްފައެވެ.

އަދި މީގެ އިތުރުން އުނގޫފާރު ދާއިރާގެ ޕީޕީއެމްގެ މެމްބަރު ޖައުފަރު ދާއޫދު ހުށަހެޅުއްވި މޯލްޑިވްސް މީޑިއާ ކޮމިޝަންގެ ބިލްގެ މައްސަލަ އާއި ގެމަނަފުށި ދާއިރާގެ ޕީޕީއެމްގެ މެމްބަރު ޖަމީލް އުސްމާން ހުށަހެޅުއްވި ރާއްޖޭގެ ބޭންކިންއާ ބެހޭ ގާނޫނު އިސްލާހު ކުރުމުގެ ބިލަށް ބަހުސްކުރުންވެސް އަންނަ ހޯމަދުވަހު އޮންނާނެއެވެ.