ދިއްލީގެ ވައި ވަރަށް ބޮޑަށް ނުސާފުވެ، ސަމާލުވާން އެދެފި

އިންޑިއާގެ ވެރިރަށް ދިއްލީގެ ވައިގެ ވަރަށް ބޮޑަށް ނުސާފުވެ، ނުރައްކާތެރި އަދި ވަރަށް ގޯސް ހާލަތަކަށް ގޮސްފައިވާކަން ތަފާސްހިސާބުތަކުން ދައްކައިފިއެވެ.

ފާއިތުވި ހަފްތާގައި ސިޓީގެ އެކި ސަރަޙައްދުތަކުގައި ވައިގެ ނުސާފު މިންގަނޑު ވަނީ ވޯލްޑް ހެލްތު އޯގަނައިޒޭޝަން (ޑަބްލިއު.އެޗް.އޯ) އިން ރައްކާތެރިކަމަށް ކަނޑައަޅާފައިވާ މިންގަނޑަށްވުރެ 25 ނުވަތަ 30 ގުނަ އިތުރުވެފައެވެ.

އިންޑިއާގައި ފާހަގަކުރާ ދިވާލީ ފެސްޓިވަލްގައި ބުރާސްފަތި ދުވަހު ބޭނުންކުރާ ޕަޓާސްތަކާއި އަވަށްޓެރި ސްޓޭޓްތަކުގައި ދަނޑުވެރިކަމުގެ ބާކީވާ ތަކެތި އަންދާލުމާއި މޫސުމީ ހާލަތްތަކުގެ ސަބަބުން މި ހާލަތު އިތުރަށް ގޯސްވާނެކަމަށް މޫސުމާއި ބެހޭ މާހިރުން ވަނީ އިންޒާރުދީފައެވެ.

ކޮންމެ އަހަރެއްގެ އޮކްޓޯބަރު މަހުން ޖެނުއަރީ މަހާ ހަމައަށް ދިއްލީ އާއި އުތުރު އިންޑިއާގެ އެތައް ސިޓީއެއްގައި ވައިގެ ނުސާފުމިން އިންތިހާއަށް މައްޗަށް ދިއުމުގެ ސަބަބުން ވިޔަފާރިތަކަށް ހުރަސްއެޅި، ސްކޫލްތަކާއި އޮފީސްތައް ބަންދުކުރަން ޖެހެއެވެ.

ސަރުކާރުން ހިންގާ ސަފަރް ވެބްސައިޓުގެ ތަފާސްހިސާބުތަކުން ދައްކާގޮތުގައި، ކުދި މާއްދާތަކުގެ (ޕީ.އެމް 2.5 ގެ ނަމުން މަޝްހޫރު) މިންވަރު ހޯމަ ދުވަހު ބައެއް ސަރަޙައްދުތަކުގައި ކިއުބިކް މީޓަރަކަށް 350 މައިކްރޯގްރާމަށް އަރާފައިވެއެވެ. މި މާއްދާތަކަކީ ފުއްޕާމޭގެ އެންމެ އެތެރެއަށް ވަދެފިނަމަ، އެތައް ބައިވަރު ބަލިތަކެއް ޖެހުމަށް މަގުފަހިވާ އެއްޗެކެވެ.

އެ ވެބްސައިޓުން ބުނާގޮތުގައި، ޕީ.އެމް 2.5 ގެ މިންވަރު 300 އާއި 400 އާ ދެމެދުގައި ހުރެއްޖެނަމަ، ވައިގެ ފެންވަރު ވަރަށް ދަށްކަމަށް ބެލެވެއެވެ. އަދި މި މިންވަރު 400-500 އަށް އަރައިފިނަމަ، އެ ހާލަތު ނުރައްކާތެރި ކަމަށް ބެލެވެއެވެ.

ކޮންމެ ފިނިމޫސުމެއްގައި ދިއްލީ ދުމުގެ ބޯ ފަށަލައަކުން ނިވާވާއިރު، މިއީ ދުމާއި، ކުނޑި، ވައި މަޑުވުމާއި، އުޅަނދުފަހަރުގެ ދުމާއި، ދަނޑުވެރިކަމުގެ ބާކީތައް އެންދުމުގެ ސަބަބުން ދިމާވާ ހާލަތެއް ކަމަށް ކަމާ ބެހޭ ފަރާތްތަކުން ބުނެއެވެ.

މި ހަފްތާގެ ފަހުކޮޅު އަންނަ ދިވާލީ ފެސްޓިވަލްގެ ކުރިން، އެގައުމުގެ ސަރުކާރުން ވަނީ ޕަޓާސް އުފެއްދުމާއި، ރައްކާކުރުމާއި، ވިއްކުން މުޅިން މަނާކޮށްފައެވެ. ނަމަވެސް، މީހުން އެހެން ސްޓޭޓްތަކުން ޕަޓާސް ހޯދާތީ މީގެ ކުރިންވެސް މިފަދަ މަނާކުރުންތައް އެކަށީގެންވާ ވަރަށް ތަންފީޒުކުރެވިފައެއް ނުވެއެވެ.

އެ ސިޓީގެ ވައި އިންތިހާއަށް ނުސާފުވުމާއި ގުޅިގެން، ދިއްލީގެ އިދާރާތަކުން ވަނީ ރައްޔިތުން ވީހާވެސް ބޮޑަށް ގޭގައި ތިބުމަށް އިންޒާރުދީ، ސިޓީގައި ޢިމާރާތްކުރުމުގެ މަސައްކަތްތައް މަޑުޖައްސާލުމަށް އަންގާފައެވެ. އަދި އުޅަނދުފަހަރުގެ ދުމުގެ މިންވަރު މަދުކުރުމަށްޓަކައި އާންމު ދަތުރުފަތުރުގެ ވަސީލަތްތައް ބޭނުންކުރުމަށް ރައްޔިތުންނަށް އިލްތިމާސްކޮށްފައިވެއެވެ.