މިފްކޯގެ ސައިޓުތަކުގައި ދަނޑުވެރިކަން ފުޅާކުރުމަށް މަޝްވަރާކޮށްފި

މިފްކޯގެ ސައިޓުތަކުގައި ދަނޑުވެރިކަން އިތުރަށް ތަރައްޤީކުރުމާ ގުޅޭގޮތުން މިފްކޯ އަދި އެގްރިކަލްޗަރ މިނިސްޓްރީގެ އިސްވެރިންނާ ދެމެދު މަޝްވަރާ ބައްދަލުވުމެއް ބާއްވާއިފިއެވެ.

މިފްކޯގެ ހެޑް އޮފީހުގައި ބޭއްވުނު މި ބައްދަލުވުމުގައި، ކުންފުނީގެ ސައިޓުތަކުގައިވާ ދަނޑުބިންތައް ދިރާސާކޮށް، ދަނޑުވެރިކަމުގެ މަސައްކަތް ފުޅާކުރުމަށް ޕްލޭނެއް އެކުލަވާލުމަށް ވަނީ ނިންމާފައެވެ.

ފެލިވަރު އަދި ކޫއްޑޫގައި ގެންގުޅޭ ބަކަރި އަދި ކުކުޅު ފަދަ ޖަނަވާރުތައް އިތުރުކުރުމާއި، ފުނަށްޑޫގައި ދަނޑުވެރިކަން ފުޅާކުރުމުގެ އަމަލީ މަސައްކަތްތަކާ ގުޅޭގޮތުންވެސް ވަނީ މަޝްވަރާކުރެވިފައެވެ. އަދި މިފްކޯގެ މުވައްޒަފުންނަށް އަމާޒުކޮށް ދަނޑުވެރިކަމުގެ ފަންނީ ތަމްރީނުތައް ކުރިއަށް ގެންދިއުމާ ގުޅޭގޮތުންވެސް ފުޅާ ދާއިރާއެއްގައި މަޝްވަރާކުރެވުނެވެ.

މި ބައްދަލުވުމުގައި އެގްރިކަލްޗަރ މިނިސްޓްރީގެ އިސްވެރިން ވަނީ ދަނޑުވެރިކަމުގެ ދާއިރާއިން މިފްކޯއަށް ބޭނުންވާ އެހީތެރިކަން ފޯރުކޮށްދިނުމުގެ ޔަޤީންކަން ދީފައެވެ. މީގެ ތެރޭގައި މިފްކޯގެ ސައިޓުތަކުގެ ދަނޑުބިންތަކާއި، ގަސްގަހާގެއްސާއި، ގެންގުޅޭ ޖަނަވާރުތަކަށް ދިމާވާ މައްސަލަތަކާއި ބަލިތައް ދެނެގަނެ ޙައްލުކުރުމަށް އެހީތެރިވުން ހިމެނެއެވެ.

މިފްކޯގެ މީޑިއާ އޮފިޝަލް އިބްރާހިމް ސަޢީދު (ކޭޑު) ވިދާޅުވި ގޮތުގައި، މިފްކޯއިން ދަނޑުވެރިކަމަށް އިސްކަންދޭން ޖެހުނީ ކުންފުނީގެ ހަރަދުތައް މެނޭޖްކުރުމަށާއި ވިޔަފާރި ޑައިވަރސިފައި ކުރުމަށެވެ. މިގޮތުން، މިފްކޯގެ ސައިޓުތަކުގައި ހުރި ބިންތައް ބޭނުންކޮށްގެން، ކުންފުންޏަށް ބޭނުންވާ ތަރުކާރީއާއި މޭވާގެ ބާވަތްތައް އުފެއްދުމަށް ވަނީ ވިސްނާފައެވެ.

ކޭޑު އިތުރަށް ވިދާޅުވީ، މިހާރު ކުރާ ދަނޑުވެރިކަމުން ލިބޭ އާމްދަނީ އެކަށީގެންވާ ވަރަށްވުރެ ކުޑަކަމަށެވެ. އެހެންކަމުން، ކަމުގެ މާހިރުންގެ އެހީގައި ދަނޑުވެރިކަން އިތުރަށް ފުޅާކޮށް، މިފްކޯއަށް ބޭނުންވާ ސަޕްލައިއަށް ކުރާ ހަރަދު ކުޑަކުރުމަށް ވިސްނާފައިވާ ކަމަށެވެ. އަދި މިފްކޯއަށް ބޭނުންވާ ވަރަށްވުރެ އިތުރަށް އުފެއްދޭ ތަކެތި ބާޒާރަށް ނެރުމަށްވެސް ރާވާފައިވާ ކަމަށް އޭނާ ވިދާޅުވިއެވެ.