އެސްޓީއޯއިން ރާއްޖޭގައި ފުރަތަމަ ފަހަރަށް ދިވެހި ރޭޑިއޯގްރަފަރުން ތަމްރީނުކޮށް ވަޒީފާގެ މައިދާނަށް ނެރެފި

އެސްޓީއޯ އާއި ޖީ.އީ ހެލްތްކެއަރ ގުޅިގެން ދިވެހި ރޭޑިއޯ ގްރާފަރުން ތަމްރީނުކުރުމަށް ހިންގި ފުރަތަމަ ޕްރޮގްރާމު ނިމި ދަސްވެނިވުނު ދަރިވަރުންނަށް އެކަމުގެ ލިޔުން ދީފިއެވެ.

މިކަމަށްޓަކައި މިރޭ ވިލާކޮލެޖްގައި ކުރިއަށްގެންދިޔަ ދަސްވެނިވުމުގެ ޕްރޮގްރާމް ޝަރަފްވެރިކޮށްދެއްވީ ހެލްތު މިނިސްޓަރު ޢަބްދުﷲ ނާޒިމެވެ. އެސްޓީއޯގެ ޓްރެއިނިން އިންސްޓިޓިއުޓުން ކުރިއަށްގެންދިޔަ މި ޕްރޮގްރާމްގައި 25 ދަރިވަރުން ބައިވެރިވިނަމަވެސް ސެޓްފިކެޓް ހާސިލްކޮށްފައިވަނީ 23 ދަރިވަރުންނެވެ.

އެސްޓީއޯއިން ބުނީ، ރޭޑިއޯ ގްރާފަރުން ތަމްރީނުކުރުމަށް ހިންގި ޕްރޮގްރާމުގެ ފުރަތަމަ ބެޗް ނިމުނުއިރު، މިހާތަނަށް މި ދާއިރާއިން ދެ ދަރިވަރަކު ވަނީ އަތޮޅުތެރޭގެ ހޮސްޕިޓަލްތަކުގައި ވަޒީފާ އަދާކުރަން ފަށާފައިވާކަމަށެވެ. އަދި އެހެން ދަރިވަރުން މިވަގުތު ވަޒީފާ ހޯދުމުގެ މަރުޙަލާގައި ދަނީ މަސައްކަތް ކުރަމުންދާކަމަށް ބުންޏެވެ. އެސްޓީއޯއިން ބުނީ ރާއްޖޭގެ ސިއްޙީ ދާއިރާއަށް 23 ދިވެހި ރޭޑިއޯގްރާފަރުން އިތުރުވުމަކީ ވަރަށް މުހިންމު ކުރިއެރުމެކެވެ. ނަމަވެސް، މި ދާއިރާއަށް އަދިވެސް އިތުރު ރޭޑިއޯގްރާފަރުން ބޭނުންވާކަން ފާހަގަކުރެވިފާކަމަށް އެކުންފުނިން ބުންޏެވެ.

ޖެނެރަލް އިލެކްޓްރޯނިކްސް (ޖީ.އީ) ހެލްތްކެއަރއިން 2018 ގައި ރާއްޖޭގައި ހެދި ދިރާސާއަކުން ދައްކާގޮތުގައި، ސިއްހީ ދާއިރާގައި ތަމްރީނު ލިބިފައިވާ ދިވެހިންގެ ނިސްބަތް ވަރަށް ދަށެވެ. މި ދިރާސާއިން އިތުރަށް ހާމަވެގެން ދިޔައީ ރާއްޖޭގެ ރޭޑިއޯގްރަފަރުންގެ ވަޒީފާތަކުގައި މަސައްކަތްކުރަމުން ގެންދަނީ ގިނަ އަދަދެއްގެ ބިދޭސީންކަމެވެ.

އެސްޓީއޯއިން ބުނީ މި ޕްރޮގްރާމް ކުރިއަށްގެންދިއުމަށް ނިންމީ، ރޭޑިއޯގްރަފީ ދާއިރާއަށް ދިވެހިން އުފެއްދުމަށާއި، ޚިދުމަތް ހޯދަން އަންނަ ބަލިމީހުންނަށް ފަސޭހަކަމާއެކު ޚިދުމަތް ފޯރުކޮށްދިނުމުގެ މަޤްޞަދުގައި ކަމަށެވެ.

ދިވެހި މުޖުތަމަޢުއަށް މުހިންމު މިފަދަ މަޝްރޫޢެއްގެ ތެރެއިން ޤާބިލު ޒުވާނުންތަކެއް އުފެއްދުމުގައި ބައިވެރިވުމުގެ ފުރުޞަތު ލިބުމަކީ އެސްޓީއޯއަށް ލިބުނު ފަޚުރެއްކަމަށް އެކުންފުނިން ދެކެއެވެ. އަދި ކުރިއަށް އޮތްތަނުގައިވެސް މިފަދަ ބިނާކުރަނިވި ޚިދުމަތްތައް ދިވެހި ރައްޔިތުންނަށް ފޯރުކޮށްދިނުމަށް އެސްޓީއޯއިން އޮންނާނީ ތައްޔާރަށްކަމަށް އެކުންފުނިން ބުނެއެވެ.

ރޭޑިއޯ ގްރާފަރުން ތަމްރީނުކުރުމުގެ ގޮތުން އެސްޓީއޯ ޓްރެއިނިންގ އިންސްޓިޓިއުޓް ގާއިމުކޮށް، ރަޖިސްޓްރީކޮށްފައިވަނީ، 2019 ވަނަ އަހަރެވެ. އެގޮތުން ހަމަ އެ އަހަރުގެ ފެބްރުވަރީ މަހު، ކޯހުގެ މުޤައްރަރާއި އެހެނިހެން ލިޔެކިޔުންތައް މޯލްޑިވްސް ކޮލިފިކޭޝަން އޮތޯރިޓީއަށް ހުށަހަޅައި، ކޯސް ހިންގުމުގެ ހުއްދަ ވަނީ ހޯދާފައެވެ.

ކޯސް ހިންގުމުގެ ހުއްދަ ލިބުމާ ގުޅިގެން، ކުންފުނީގެ އިޖުތިމާޢީ ޒިންމާގެ ދަށުން، ފުރަތަމަ ބެޗްގެ ދަރިވަރުންގެ ކިޔެވުމުގެ އެންމެހައި ޚަރަދުތައް އެސްޓީއޯގެ ފުލް ސްކޮލަރޝިޕްގެ ދަށުން ހަމަޖެއްސުމަށް ކުންފުނީގެ މެނޭޖްމަންޓުން ވަނީ ނިންމިކަން ފާހަގަކޮށްލެވެއެވެ. މީގެ އިތުރުން، ކިޔަވަމުންދާ މުއްދަތުގައި ކޮންމެ ދަރިވަރަކަށް މަހަކު 2,300 ރުފިޔާގެ އެލަވަންސެއް ދިނެވެ. ކޯސް ރަސްމީކޮށް އިޢުލާންކޮށް ހުޅުވާލެވުނީ 2022 ވަނަ އަހަރުގެ ޖުލައި މަހުގެ ތެރޭގައިކަމަށް އެސްޓީއޯއިން ބުނެއެވެ.