ޒަކާތުފަންޑުގެ އެހީގައި އަހަރުގެ މިހާތަނަށް ބޯންމެރޯ ހެދުމަށް 8 މިލިއަނަށްވުރެ ގިނަ ރުފިޔާ ހޭދަކޮށްފި

ޒަކާތުފަންޑުގެ އެހީގައި އަހަރުގެ މިހާތަނަށް ބޯންމެރޯ ޓްރާންސްޕްލާންޓް ހެދުމަށް ތެލެސީމިއާ ކުދިން ފޮނުވުމަށް 8 މިލިއަނަށްވުރެ ގިނަ ރުފިޔާ ހޭދަކޮށްފައިވާކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ބުނެފިއެވެ.

އެންސްޕާއިން މިއަދު ބުނީ، ޒަކާތުފަންޑުގެ ހަރަދުގައި މިއަހަރުގެ މިހާތަނަށް 14 ޕޭޝަންޓަކު  ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވާކަމަށެވެ. މީގެ ތެރެއިން 8 ޕޭޝަންޓަކު ބޯންމެރޯ ޓްރާންސްޕްލާންޓް ހަދައި ނިމިފައިވާއިރު، ބޯންމެރޯ ޓްރާންސްޕްލާންޓް ކުރުމުގެ މަރުހަލާފައި 5 ޕޭޝަންޓަކު އެބަތިއްބެވެ. އެގޮތުން ބޯންމެރޯހެދުމަށް މިހާތަނަށް ޖުމްލަ 8،033،646.37 ރުފިޔާ ހޭދަކުރެވިފައިވާކަމަށް އެންސްޕާއިން ބުންޏެވެ.

ސަރުކާރުން ވަނީ ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ނިންމާފައެވެ. ސަރުކާރުން ވަނީ ބަލިން ރައްކާތެރިވުމާއި ކޮންޓްރޯލް ކުރުމަށް ކުރިއަށް އޮތް 10 އަހަރުދުވަހުގެ މާސްޓާ ޕްލޭން އިފްތިތާހްކޮށްފައެވެ. މީގެ އިތުރުން ހުޅުމާލޭގައި ތަލަސީމިއާއަށް ހާއްސަ ހޮސްޕިޓަލެއް އެޅުމަށް ކުރަންޖެހޭ މަސައްކަތްތައްވެސް ސަރުކާރުން ވަނީ ފަށާފައެވެ.

މީގެ އިތުރުން ތެލެސީމިއާ ބަލި ކަށަވަރުކުރުމަށްޓަކައި ބައެއް ހާލަތްތަކުގައި ކޮންމެހެންވެސް ހަދަންޖެހޭ ޑީއެންއޭ ޓެސްޓް ސަރުކާގެ ހޮސްޕިޓަލުގައި ހެދޭނޭ އިންތިޒާމް ހަމަޖެއްސުމުގެ މަސައްކަތް ކުރިއަށްދާކަމަށްވެސް ސިއްހީ ވުޒާރާއިން ވަނީ ބުނެފައެވެ.