އައްޑޫގެ ފަހްރުވެރި މާޒީ އިއާދަކުރަންޖެހޭ: މޭޔަރ ކެނޑިޑޭޓް މުޝްރިފް

އައްޑޫއަކީ ފަހުރުވެރި މާޒީއެއް އޮތް ތަނެއް ކަމަށާއި، އައްޑޫގައި އިހުއޮތް ފެންވަރު އަލުން އިއާދަކުރަން ޖެހިފައިވާކަމަށް ކޮންގްރެސް ޕާޓީގެ ޓިކެޓްގައި އައްޑޫސިޓީގެ މޭޔަރުކަމަށް ކުރިމަތިލައްވާފައިވާ ކެނޑިޑޭޓް މުޝްރިފް އަލީ (މުޝްރިފް) ވިދާޅުވެއްޖެއެވެ.

ކޮންގްރެސް ޕާޓީގެ އައްޑޫސިޓީގެ ކެމްޕެއިން އިފްތިތާހްކުރުމަށް ބޭއްވި ޖަލްސާގައި މުޝްރިފްގެ ވާހަކަތައް މައިގަނޑުގޮތެއްގައި އަމާޒުކުރައްވާފައިވަނީ، ސިޔާސީ ވާހަކަތަކަކަށްވުރެ ބޮޑަށް އައްޑޫގެ އިހުއޮތް ފެންވަރާއި ހަޤީގީ އައްޑޫ އޮންނަންޖެހޭ ފެންވަރާ ގުޅޭގޮތުންނެވެ.

މުޝްރިފް ވިދާޅުވީ ތާރީހަށް ބަލާއިރު އައްޑޫސިޓީއަކީ ހުނަރުވެރި މަސައްކަތްތެރި، އިލްމީ ބަޔަކު އުޅުނު ތަނެއްކަން އެނގޭކަމަށެވެ. އައްޑޫއަކީ އާދައިގެ ތަނެއް ނޫންކަން ފާހަގަކުރައްވަމުން މުޝްރިފް ވިދާޅުވީ، އެވޭލާ ޒަމާނުގެ ވަޒަންވެރިވުންތަކާ ހިސާބުން އައްޑޫއަކީ ނިޔަމިކަމާއި، މަސައްކަތްތެރިކަމުގެ ހުނަރުވެރިކަމާއި، އާދަކާދަތަކާއި، ހަރުދަނާ ޝަހްސިއްޔަތު ހުރި ބަޔަކު އުޅުނު މުއްސަނދި ތާރީހެއް އޮތް ތަނެއްކަމަށެވެ. މިއަދު އައްޑޫ ފެނިގެންދަނީ އެންމެކުޑަމިނުން ދުވަހުން ދުވަހަށް ކުރަންޖެހޭ ކަންތައްތައްވެސް ނުކުރެވި، ތަރައްޤީއާ ތަހުޒީބުގެ މިސްރާބުން ކަޝިޔާރުވެ މިސްރާބް ގެއްލިފައިވާ ތަނެއްގެ ގޮތުގައިކަމަށް މުޝްރިފް ވިދާޅުވިއެވެ.

މުސްރިފް ވިދާޅުވީ އައްޑޫގެ ގިނަ ރައްޔިތުން އާއިލާ ދޫކޮށްލާފައި ވަޒީފާގެ ބޭނުމަށް އައްޑޫން ބޭރަށްދިއުމަކީ އެ ސިޓީއަށް ލިބޭ ވަރަށްބޮޑު ނިކަމެތި ކަމެއް ކަމަށެވެ.

އެންމެ ބޮޑު އެއް މައްސަލައަކީ އައްޑޫގަ ތިބި ހުނަރުވެރި އިލްމީ ސިކުނޑިތައް އެހެން ތަންތަނަށް ހިޖުރަކުރުން

ކެނޑިޑޭޓް މުޝްރިފް އަލީ (މުޝްރިފް)

އޭނާ ވިދާޅުވީ މިކަމުގެ ސަބަބުން އާއިލާތަކުގެ ގުޅުން ހީނަރުވެ އައްޑޫގެ އިޤްތިޞާދަށް ގެއްލުންވަމުންދާކަމަށެވެ. އެގޮތުން ބޭނުންވަނީ އައްޑޫގެ ހުނަރުވެރި ދަރިންނަށް އެކަށީގެންވާ ފުރުޞަތުތައް މި ސިޓީގައި ޤާއިމުވުންކަމަށް ވިދާޅުވިއެވެ.

ޖިއޮގްރަފީގޮތުން ބަލާނަމަ އައްޑޫއަކީ ކިހާ މުހިންމު ތަނެއްކަން ތާރީހަށް ބަލާއިރު އެނގެން އޮންނަ ކަމަށާއި، އެންމެކުރިން ދުނިޔޭގެ ބޮޑުހަނގުރާމަތައް ކުރެވިގެން ދިޔައިރު، ބާރުތަކުން އައްޑޫގެ ބޭނުންކޮށްފައިވަނީ މި ތަނަކީ މުހިންމު ތަނަކަށް ވާތީކަމަށެވެ.

މުޝްރިފް ވިދާޅުވީ އޭނާ މޭޔަރުކަމަށް ކުރިމަތިލީ މިކަންކަން ހާސިލްކުރަން ކަމަށާއި، ކުރިއަށްއޮތް ދުަވަސްތަކުގައި އޭނާ އާއި ޕީއެންސީގެ ކެނޑިޑޭޓުންގެ ޓީމުން އައްޑޫގެ ތަރައްޤީއަށް ރާވާފައިވާ ކަންކަން ހިއްސާކުރަމުން ދާނޭކަމަށެވެ.