ވަގު ޓީޓީ ހެދި ޝިފާއު ނަލަހިޔާއަށް ދެ ލައްކަ ރުފިޔާ ދައްކަން ހުކުމް ކޮށްފި

ވަގު ޓީޓީ ހަދައި ބައިނަލް އަގުވާމީ ކުންފުނިތަކުން ވިޔަފާރިކުރުމާއި ގުޅިގެން ކްރިމިނަލް ކޯޓުން ދައުވާކުރި މއ. ހަނީސަކްލް-1، ހުސައިން ޝިފާއު، ނަލަހިޔާ ކޮންސްޓްރަކްޝަން އެންޑް ޑިވެލޮޕްމެންޓް ޕްރައިވެޓް ލިމިޓެޑަށް ދެ ލައްކަ ރުފިޔާ ދައްކަން ސިވިލް ކޯޓުން ހުކުމް ކޮށްފިއެވެ.

މައްސަލައިގެ ލިޔެކިޔުންތައް ރައްދު ނުކުރެވުމުގެ ސަބަބުންނާއި އިއުލާންކޮށްގެން ވެސް ޝިފާއު ކޯޓަށް ހާޒިރުވެފައި ނުވާތީ މި މައްސަލަ ނިންމާފައި ވަނީ އޭނާގެ ޣައިރު ހާޒިރުގައެވެ.

މިމައްސަލައިގައި ނަލަހިޔާ އިން ބުނީ، 2021 ވަނަ އަހަރުގެ ނޮވެންމަރު މަހުގެ 1 ވަނަ ދުވަހު ނަލަހިޔާ އާއި އެކު ޝިފާއު ވެފައިވާ އެއްބަސްވުމާއި ޚިލާފުވެފައިވާ ކަމަށާއި، 2022 ވަނަ އަހަރުގެ އޭޕްރިލް މަހުން ފެށިގެން އެއަހަރުގެ މާޗު މަހުގެ ނިޔަލަށް ކުލީގެ ގޮތުގައި ޝިފާއު އެކުންފުންޏަށް 2 ލައްކަ ރުފިޔާ ދޭން ޖެހޭ ކަމަށެވެ.

ހަމައެއާއިއެކު، ޝިފާއު ކުއްޔަށް ބޭނުންކުރި ތަން ހުސްކޮށް، ނަލަހިޔާ އާއި ހަވާލު ކުރުމާއި ހަމައަށް ކުއްޔަށް އަރާފައިވާ ފައިސާ އާއި ނުދައްކާ ހުރުމުގެ ސަބަބުން ފެންބިލަށާއި ކަރަންޓުގެ ގޮތުގައި އަރާފައިވާ ރުފިޔާ އަކީ ޝިފާއުގެ ފަރާތުން ދައްކަން ޖެހޭ އެއްޗެއް ކަމަށް ވެސް ނަލަހިޔާ އިން ކުރި ދައުވާގައި ވެއެވެ.

މި މައްސަލައާއި ގުޅިގެން ކްރިމިނަލް ކޯޓުން ކުރި ހުކުމްގައި، އަންނަ މަހުގެ ހަތަރު ވަނަ ދުވަހުގެ 12:00 ގެ ކުރިން 206،237 ރުފިޔާ އެކުންފުންޏަށް ޝިފާއު ދައްކަން ޖެހޭނެ ކަމަށް ވަނީ ކަނޑައަޅާފައެވެ.

ޝިފާއު އަކީ އިތުރު މީހަކާ ބައިވެރިވެގެން މިނިސްޓްރީ އޮފް އިކޮނޮމިކް ޑިވެލޮޕަމަންޓްގައި ރަޖިސްޓްރީކޮށްފައިވާ އަމިއްލަ ފަރުދުންގެ ވިޔަފާރިއެއްކަމުގައިވާ "ކިންގްޑަމް އޮފް ފުރުޓްސް" މެދުވެރިކޮށް ރާއްޖެއިން ބޭރުގެ ކުންފުނިތަކުގެ މުދާ ރާއްޖެ އެތެރެކޮށް އެ މުދަލަށް ބޭރު ކުންފުނިތަކުން ދައްކަންޖެހޭ ފައިސާ ދެއްކުމުގައި މަކަރާއި ޙީލަތް ހެދުމާއި ގުޅިގެން ޕްރޮސެކިއުޓާ ޖެނެރަލް އޮފީސް (ޕީޖީ) އިން 23 ދައުވާއެއް އުފުލާފައިވާ މީހެކެވެ.

އޭގެ ފަހުން ދައުވާ އުފުލާފައި ވަނިކޮށް، އެގްރިކަލްޗާ އެންޑް އެނިމަލް ވެލްފެއާގެ ސީނިއާ ޕޮލިޓިކަލް ޑިރެކްޓަރުގެ މަގާމަށް ޝިފާއު އައްޔަނު ކުރި ނަމަވެސް، ހަމަ އެދުވަހު އޭނާ އެ މަގާމުން ވަކިކޮށް، ސަރުކާރުން ބުނީ އޭނާއަށް ސިޔާސީ މަގާމެއް ދެވުނީ އޭނާގެ ކްރިމިނަލް ރެކޯޑް ނުބަލައި ކަމަށެވެ. އެފަދަ ކަމެއް ތަކުރާރު ނުވާނެ ކަމުގެ ޔަގީން ކަން ސަރުކާރުން ވަނީ ދީފައެވެ.