އިސްލާހުތަކާއެކު ރޭޓިން މަތިވާނެ، ދަރަނި ވެސް އަދާކުރާނަން: މާލީ ވުޒާރާ

ސަރުކާރުގެ މާލީ އިސްލާހުތަކާއެކު ފިޗުގެ ރޭޓިން މަތިވާނެ ކަމަށާ، އަދި ރާއްޖެއިން، ބޭރުގެ ފަރާތްތަކަށް ދައްކަން ޖެހޭ ދަރަނިވެސް ބަރާބަރަށް ދެއްކޭނޭ ކަމުގެ ޔަގީންކަން މާލީ ވުޒާރާއިން ދީފި އެވެ.

ފިޗުން އިއްޔެ ވަނީ ރާއްޖޭގެ ރޭޓިން މުރާޖައާކުރުމަށް ފަހު "ބީ މައިނަސް"އިން "ސީސީސީ ޕްލަސް"އަށް ދަށްކޮށްފަ އެވެ. އެ ރޭޓިންއަކީ ބޭރުގެ ފަރާތްތަކަށް ދައްކަން ޖެހޭ ދަރަނި ނުދެއްކި ޑީފޯލްޓްވުމުގެ ފުރުސަތު ވަރަށް ބޮޑު ގައުމުތަކަށް ދޭ ރޭޓިންއަކަށްވާއިރު، ފިޗްގެ އެ ރޭޓިންއާ ގުޅިގެން މާލީ ވުޒާރާއިން ރޭ ވަނީ ބަޔާނެއް ނެރެފަ އެވެ.

އިނގިރޭސި ބަހުން ނެރުނު އެ ބަޔާނުގައި މާލީ ވުޒާރާއިން ބުނީ ފިޗުން ރޭޓިން ދަށް ކުރުމުގެ މައިގަނޑު ސަބަބެއްގެ ގޮތުގައި ފާހަގަކޮށްފައި އޮތީ ދަރަންޏަށް ފައިސާ ނެގުމާއި ފައިސާ ދައުރުވާ މިންވަރު ނުވަތަ ލިކުއިޑިޓީއާ ގުޅުންހުރި ނުރައްކާތައް ކަމަށެވެ.

އަދި އެއާއެކު، ދަރަނި ކުޑަކުރުމަށް ސަރުކާރުން މަސައްކަތް ކުރާނެ ކަމަށް ބެލެވޭ ކަމަށް ފިޗުން ބުނެފައިވާކަން ފާހަގަކޮށް މާލީ ވުޒާރާއިން ވަނީ ވަޒީރުންގެ މަޖިލީހުން މި ހަފުތާގައި މާލީ އިސްލާހީ އެޖެންޑާއެއް ފާސްކޮށްފައިވާ ކަމަށް ބުނެފައެވެ.

އަދި އެޖެންޑާގައިވާ ކަންކަން ތަންފީޒުކުރުުމުގެ ގޮތުން ސަރުކާރުގެ ހަރަދުތައް ކުޑަކޮށް އަދި އާމްދަނީ އިތުރުކުރުމުގެ ފިޔަވަޅުތައް ކުރިއަށް އޮތް ދުވަސްތަކުގައި އަޅަން ނިންމާފައިވާ ކަމަށް މާލީ ވުޒާރާއިން ބުންޏެވެ.

ސަރުކާރުން ހުރިހާ ފަރާތްތަކަށް ދައްކަން ޖެހޭ ދަރަނިތައް ވެސް ކަނޑައަޅާފައިވާ މުއްދަތުތަކުގައި ދައްކަމުން ދާނޭ ކަމުގެ ޔަގީންކަން އަރުވަމެވެ. އަދި ދަރަނީގެ ހާލަތު ރަނގަޅު ކުރަން އަމާޒުކޮށްގެން ހަރަދާއި އާމްދަނީގެ ސިޔާސަތަށް ގެންނަ ބަދަލުތަކާ އެކު، އަދި އިގްތިސާދު ސިންދަފާތު ކުރުމާއި ބޭރުގެ ލޮޅުންތަކުން އިގްތިސާދަށް ކުރާ ނޭދެވޭ އަސަރު ކުޑަކުރަން ކުރާ މަސައްކަތުގެ ސަބަބުން ފިޗުގެ ރޭޓިން ދެން މުރާޖައާކުރާއިރު ހެޔޮ ބަދަލެއް އަންނާނެ،"

މާލީ ވުޒާރާ

މާލީ ވުޒާރާއިން މިހެން ބުނެފައިވާއިރު، ފިނޭންސް މިނިސްޓްރީން މިހާރު ވަނީ 2028 ވަނަ އަހަރާ ހަމައަށް އާމްދަނީ އިތުރު ކުރުމަށް އަޅާނެ ފިޔަވަޅުތަކުގެ ސްޓްރެޓެޖީއެއްއާންމުކޮށްފައެވެ. އޭގެ ތެރޭގައި ޖީއެސްޓީ ނެގުން ފުޅާކޮށް، އިމްޕޯޓް ޑިއުޓީ އާއި ޓެލެކޮމް ރޭޓަށް ބަދަލުތައް ގެނައުން ހިމަނައިފައިވެއެވެ.