ޖީއެސްޓީއާއި އިމްޕޯޓް ޑިއުޓީ އަދި އެއާޕޯޓް ޓެކްސް ރޭޓު ރިވިއުކުރަނީ

މުދަލާއި ޚިދުމަތުގެ އަގުން ނަގާ ޓެކްސް (ޖީއެސްޓީ) ނަގާ ގޮތް ފުޅާކޮށް، ޖީއެސްޓީ ރޭޓަށް ވެސް ބަދަލުތައް ގެންނަން ސަރުކާރުގެ މެދު ރާސްތާ ރެވެނިއު ސްޓްރެޓެޖީގައި ހިމަނައިފިއެވެ.

ފިނޭންސް މިނިސްޓްރީން އިއްޔެ އާއްމު ކޮށްފައިވާ މެދުރާސްތާގެ އާމްދަނީގެ ސްޓްރެޓެޖީގައި ވަނީ، ކުރިއަށް އޮތް ފަސް އަހަރުގެ ތެރޭގައި އަމަލުކުރާނެ ސިޔާސަތުތަކެއް ހިމަނައިފައެވެ. މި ސްޓްރެޓެޖީގެ މަގުސަދަކީ ޓެކްސް އިސްލާހުކޮށް އެޑްޖަސްޓްމަންޓްތައް ގެނެސް ސަރުކާރަށް ލިބޭ އާމްދަނީ އިތުރުކުރުމެވެ.

އެގޮތުން، އެކަމަށްޓަކައި، 2025 ވަނަ އަހަރަށް ލަފާކުރާ ޕްލޭންގައި މުދަލާއި ޚިދުމަތުގެ އަގުން ނަގާ ޓެކްސް (ޖީއެސްޓީ) ރޭޓް މުރާޖައާކުރުމާއި، ޖީއެސްޓީ ބޭސް ފުޅާކުރުމާއި، މުދަލާއި ހިދުމަތުގެ އަގު (ޖީއާރްޓީ) ރޭޓްތައް މުރާޖައާކުރުން ފަދަ ބޮޑެތި ބަދަލުތައް ހިމަނާފައިވެ އެވެ. މީގެ އިތުރުން، އެކްސައިޒް ޓެކްސްގެ ނިޒާމެއް އެކުލަވާލައި، އާމްދަނީގެ އާ ލަނޑުދަނޑިތަކާ އެއްގޮތަށް އިމްޕޯޓް ޑިއުޓީ ރޭޓްތައް މުރާޖައާ ކުރާންވެސް ހިމަނާފައިވެއެވެ.

ހަމަ އެހެންމެ، ޓެލެކޮމް އޮޕަރޭޓަރުންގެ ކޯޕަރޭޓް އިންކަމް ޓެކްސް (ސީއައިޓީ) ރޭޓްތައް ވެސް މުރާޖައާކޮށް، ޓޫރިޒަމް ލޭންޑް ރެންޓް ގެ ނިޒާމު އަލުން އިވެލުއޭޓް ކުރާންވެސް މި ސްޓްރެޓެޖީގައިވެއެވެ.

މިކަން އިޢުލާނުކުރައްވާފައި މިވަނީ ޚަރަދު ކުޑަކުރުމާއި، އާމްދަނީ އިތުރުވުމާއި، މެދުރާސްތާގެ އާމްދަނީގެ ސްޓްރެޓެޖީއާ ގުޅޭ ސިޔާސަތުތައް ތަންފީޒުކުރުމަށް ރައީސުލްޖުމްހޫރިއްޔާ ހޯމަ ދުވަހު ނިންމެވުމާ ގުޅިގެންނެވެ.

މިގޮތަށް ނިންމެވީ މާލީ ހަމަޖެހުމާއި ކުރިއެރުމަށް، ވަޒީރުންގެ މަޖިލީހުން، ދެއްވި ލަފާއަށްފަހުއެވެ.