މީކާއިލް މަޖިލީހުގައި ހެދީ ދޮގު, ފަހުން ޓްވީޓްކޮށް ހެދީވެސް ދޮގު: ސައީދު

ރައްޔިތުންގެ މަޖިލީހުގައި މިއަދު ޖަލްސާގައި ގަލޮޅު ދެކުނު ދާއިރާގެ މެންބަރު މީކާއީލް ނަސީމް ދޮގު ހެއްދެވުމަށް ފަހު އެކަން ފޮރުވަން އެކްސްގައި ޕޯސްޓެއް ކޮށް އިތުރު ދޮގުތަކެއް ހެއްދެވި ކަމަށް އިކޮނޮމިކް މިނިސްޓަރު މުޙައްމަދު ސައީދު ވިދާޅުވެއްޖެ އެވެ.

މިއަދު އޮތް ޖަލްސާއަށް ހާޒިރުވެވަޑައިގެން މިނިސްޓަރު ސައީދު ވަނީ މެންބަރުންގެ ސުވާލުތަކަށް ޖަވާބު ދެއްވާފަ އެވެ. މިއަދުގެ ޖަލްސާގައި މީކާއީލް ވަނީ އިނގިރޭސިވިލާތަށް އެކްސްޕޯޓްކުރާ މަހުން 24 ޕަސެންޓްގައި ނަގަމުން ދިޔަ ޑިއުޓީ 20 ޕަސެންޓަށް ކުޑަކޮށް، މަހުން ނަގާ ޑިއުޓީ އެެއްކޮށް ކަނޑާލުމަށް ރާއްޖެ އާއި އިނގިރޭސިވިލާތާ ދެމެދު މަޝްވަރާ ކުރި ފްރީ ޓްރޭޑް އެއްބަސްވުމަށް 2025 ގައި އަމަލުކުރަން ނިންމާފައިވާ އިރު މި އެއްބަސްވުމުގެ މަސައްކަތް އޮތީ ކޮން މަރުހަލާއެއްގައިތޯ އާއި 28 މެއި 2025 ގައި ކުރިއަށް ދިޔަ މޯލްޑިވްސް-ޔޫކޭ ޑަޔަލޮގް ބައްދަލުވުމުގައި މި އެއްބަސްވުމާ ގުޅޭ މަޢުލޫމާތު ހިމަނާފައި ނުވަނީ ކީއްވެތޯ ސުވާލުކޮށްފަ އެެވެ.

އެ ސުވާލަށް މިނިސްޓަރު ސައީދު ވަނީ ސާފުކޮށް ޖަވާބު ދެއްވާފަ އެވެ. އަދި އިނގިރޭސިވިލާތަށް އެކްސްޕޯޓްކުރާ މަހުން 24 ޕަސެންޓްގައި ނަގަމުން ދިޔަ ޑިއުޓީ 20 ޕަސެންޓަށް ކުޑަވީ ރައީސް ސޯލިހްގެ ސަރުކާރުން ކުރި މަޝްވަރާތަކެއްގެ ނަތީޖާއެއްގެ ގޮތުން ނޫންކަން ސާފުކޮށް ދެއްވާ މީކާއީލް ދެއްކެވި ހަގީގަތެއް ނެތް ސިޔާސީ ވާހަކަތައް ހާމަކޮށް ދެއްވާފަ އެވެ.

މިނިސްޓަރު ވިދާޅުވީ ބްރެކްސިޓްގެ ކުރިން އިނގިރޭސިވިލާތުން ނަގަމުން ދިޔައީ 24 ޕަސެންޓުގެ ޓެރިފެއް ކަމަށާއި ބްރެކްސިޓަށް ފަހު އެ ގައުމުން މިހާރު ނަގަނީ 20 ޕަސެންޓުގެ ޓެރިފެއް ކަމަށާ މިއީ ޕްރިފަރެންޝަލް އެއްބަސްވުންތައް ނެތް ހުރިހާ ގައުމަކުން ވެސް ނަގާ އަގު ކަމަށެވެ.

އޭގެ ފަހުން މިނިސްޓަރު ވަނީ ރާއްޖެ އިން އިނގިރޭސިވިލާތާ އެކު މިނިވަން ވިޔަފާރީގެ އެއްބަސްވުމެއް ވުމަށް އެންމެ ފުރަތަމަ ހުށަހަޅާފައި އޮކްޓޯބަރު 16، 2016 ގައިކަން ފާހަގަ ކުރައްވާ އެކަން ވެސް ސާފުކޮށް ދެއްވާފަ އެވެ. އަދި މީކާއީލް އެ ވިދާޅުވާ ރާއްޖެ އާއި އިނގިރޭސިވިލާތާ ދެމެދު މަޝްވަރާ ކުރި ފްރީ ޓްރޭޑް އެއްބަސްވުމަށް 2025 ގައި އަމަލުކުރަން ނިންމާފައިވާ އެއްވެސް ލިޔެކިޔުމެއް ނެތްކަން ހާމަކުރައްވާފަ އެވެ.

އެކަން އެ މިންވަރަށް ސާފުކޮށް ދެއްވުމުން ވެސް މީކާއީލް ވަނީ އެކްސްގައި ޕޯސްޓެއް ކުރައްވާ އިނގިރޭސި ވިލާތާއި ރާއްޖެ އާއި ދެމެދު މިނިވަން ވިޔަފާރީގެ މަޝްވަރާތައް ހުއްޓާލާފައިވާ ކަމަށާ ރާއްޖެއިން އެކްސްޕޯޓް ކުރާ މަހަށް ޑިއުޓީ ކުޑަ ރޭޓެއް މި ދައުރުގައި ލިބުމުގެ އުންމީދެއް ނެތް ކަމަށް ވިދާޅުވެފަ އެވެ.

އެ ވާަހަކަތަކާއި ގުޅިގެން މިނިސްޓަރު ސައީދު ވަނީ އެއީ ކަނޑައެޅިގެން ދޮގެއް ކަމަށާ މަޖިލީހުގައި ހަގީގަތެއް ނެތް ވާހަކަތަކެއް ހިމެނޭ ސުވާލެއް ކުރުމުން އެކަމުގެ ހަގީގަތް ސާފުކޮށް ދެއްވުމުން އަނެއްކާވެސް އޮޅުން އަރާގޮތަށް ޕޯސްޓް ކުރެއްވިކަން ފާހަގަ ކުރައްވާފަ އެވެ.

މިނިސްޓަރު ސައީދު ސިފަކުރެއްވި ގޮތުގައި މީކާއީލްގެ އެ އަމަލަކީ މަޖިލީހުގައި މިއަދު ހެދި ދޮގު ފޮރުވުމަށް އޭނާ ކުރެއްވި ކަަމެކެވެ.