ރާއްޖެއިން ފަލަސްތީނަށް 50،000 ޑޮލަރުގެ އެހީ ދެނީ
ލިޔުންތެރިޔާ
ޚަދީޖާ އަރުފާ
ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީނިއަން ރެފިއުޖީސް (ޔޫއެންއާރުޑަބްލިއު) މެދުވެރިކޮށް ފަލަސްތީނަށް އެހީތެރިވުމަށް އަހަރީ އެހީގެ ގޮތުގައި 50،000 އެމެރިކާ ޑޮލަރު ދިނުމަށް ދިވެހި ސަރުކާރުން ނިންމައިފިއެވެ.
މިކަން އިޢުލާން ކުރެއްވީ އިއްޔެ އދ. ގެ މައި މަރުކަޒުގައި ބޭއްވި "ޔޫއެންއާރުޑަބްލިއު ޕްލެޖިންގ ކޮންފަރެންސް" ގައެވެ. މި ބައްދަލުވުމުގައި ރާއްޖޭގެ ފަރާތުން ބަޔާން އިއްވީ އދ. އަށް ކަނޑައަޅާފައި ހުންނަވާ ދިވެހިރާއްޖޭގެ ދާއިމީ މަންދޫބު ޑރ. އަލީ ނަސީރު މުޙައްމަދެވެ.
ޑރ. އަލީ ނަސީރުގެ ބަޔާނުގައި ވިދާޅުވީ، ޔޫއެންއާރުޑަބްލިއު އަށް އެހީތެރިވުމަކީ ހަމައެކަނި ބަޖެޓާ ގުޅޭ ނިންމުމެއް ނޫން ކަމަށާއި، އެއީ އިންސާނުންގެ ކަރާމާތް ދެމެހެއްޓުމަށާއި ބައިނަލްއަގުވާމީ ގާނޫނީ ނިޒާމު ހިމާޔަތްކުރުމަށް ކުރެވޭ މުހިންމު އިންވެސްޓްމަންޓެއް ކަމަށެވެ.
މީގެ އިތުރުން، ޔޫއެންއާރުޑަބްލިއު ހިންގުމަށް ކުރިމަތިވެފައިވާ ގޮންޖެހުންތަކާއި އެ އެޖެންސީއާ ދެކޮޅަށް ކުރެވޭ ތުހުމަތުތަކަށް އަލިއަޅުވާލައްވައި، އެ އެޖެންސީގެ މަސްއޫލިއްޔަތުތައް އަދާކުރުމަށް ބޭނުންވާ ދާއިމީ ފަންޑިންގ ފޯރުކޮށްދިނުމަށް ބައިނަލްއަގުވާމީ މުޖުތަމައަށް އޭނާ ގޮވާލެއްވިއެވެ.
އަދި ފަލަސްތީނުގެ ރައްޔިތުންނާއެކު ދިވެހިރާއްޖެ އަބަދުވެސް ސާބިތުކަމާއެކު އޮންނާނެކަން އޭނާ ތަކުރާރުކުރެއްވިއެވެ.
ދިވެހި ސަރުކާރުން ވަނީ 2024 ވަނަ އަހަރުވެސް ޔޫއެންއާރުޑަބްލިއު މެދުވެރިކޮށް ފަލަސްތީނަށް 50،000 އެމެރިކާ ޑޮލަރުގެ އެހީއެއް ދީފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
