މީރުކޮށް ޗިލީ ބީފް ހަދަން ބޭނުމިއްޔާ މި ރެސިޕީ ޓްރައި ކޮށްލާ

ހުކުރު ދުވަހު ކުކުޅުގެ ބަދަލުގައި ބައެއް ފަހަރު ފަހަރު ބީފް ތައްޔާރު ކޮށްލުމަކީވެސް ސުފުރާ މައްޗަށް ގެނެވިދާނެ ރަނގަޅު ބަދަލެކެވެ. އެހެން ކަމުން މިއަދު ވޮއިސްގެ ބަދިގެއިން މި ގެނެސްދެނީ މީރުކޮށް ޗިލީ ބީފް ތައްޔާރު ކުރާނެ ގޮތުގެ ރެސިޕީއެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ.

ބޭނުންވާ ތަކެތި

1 ކިލޯ ބީފް (ކުދިކޮށް ކިޔުބްކޮށް ކޮށާފައި/ ހިމަކޮށްދެ އިންޗި ދިގުމިނަށް)

2 ސައި ސަމުސާ ލޮނުމެދު ޕޭސްޓް

1 1/2 ސައި ސަމުސާ އިނގުރު ޕޭސްޓް

1 ބެލްޕެޕަރ (ހިމަކޮށް ދިގުކޮށް ކޮށާފައި)

2 ފިޔާ (ތުނިކޮށް ކޮށާފައި)

2 ޓޮމާޓޯ (ކިޔުބް ކޮށް ކޮށާފައި)

ކެރެޓެއްގެ 1/3 (ގާނާފައި/ތުނިކޮށް 2 އިންޗި ދިގުމިނަށް ކޮށާފައި)

ހިކަނދިފަތް

ރާނބާފަތް

1 1/2 މޭޒުމަތީ ސަމުސާ ޓޮމާޓޯ ޕޭސްޓް

1 1/2 މޭޒުމަތީ ސަމުސާ ލޮނުމިރުސް

1 ސައި ސަމުސާ މުގުރި އަސޭމިރުސް

1/4 ޖޯޑު ފްރައިޑް ޗިކަން ސޯސް

1 މޭޒުމަތީ ސަމުސާ ސޮޔާ ސޯސް

1 ސައި ސަމުސާ އޮއިސްޓާ ސޯސް

ގިތެޔޮ މިރުސް (ކޮށާފައި)

3 ފެހިކުލައިގެ ތޮޅި މިރުސް ( މެދުން ފަޅާލާފައި)

ލޮނު

މަމީ ނޫޑްލްސް ސޫޕް ޕެކެޓެއް

ތެޔޮ

ތައްޔާރު ކުރާނެ ގޮތް

1) ކޮށާފައި ހުރި ބީފް ގެ ތެރެއަށް 1 ސައިސަމުސާ ލޮނުމެދު ޕޭސްޓް، 1 ސައިސަމުސާ އިނގުރު ޕޭސްޓް، 1 ސައިސަމުސާ މުގުރި އަސޭމިރު، 1 ސައި ސަމުސާ ލޮނު އަދި 2 މޭޒުމަތީ ސަމުސާ އޮލިވް އޮއިލް، އަޅާލުމަށްފަހު ރަނގަޅަށް އެކުލަވައި މޮޑެލާށެވެ. ދެން މަދުވެގެން 30 މިނެޓް ވަންދެން މެރިނޭޓް ކުރަން ބަހައްޓާށެވެ.

2) ދެން ތެއްޔަކަށް ބީފް އެޅުމަށްފަހު މެދު ގިނީގައި މަތި ޖަހައިގެން ކައްކާށެވެ. ބީފް ކައްކާނީ ފެން ނާޅައި، ބީފްގެ ތެރެއިން ނުކުންނަ ފެނުންނެވެ. އެ ފެން ހިނދުމުން ބީފް ހުންނާނީ ރަނގަޅަށް މަޑުވެފައެވެ. އަދި ބީފް ކައްކާއިރު ދޭތެރެއިން ދޭފަތަކުން ހަލުވާލަން ވާނެއެވެ. ނަމަވެސް މަތި ނަގައިގެން މާ ގިނައިން ނުހަލުވާނެއެވެ.

3) ސޯސް ގަނޑު ތައްޔާރު ކުރުމަށް، ފިޔާ، 1 ސައި ސަމުސާ ލޮނުމެދު ޕޭސްޓް، 1/2 ސައި ސަމުސާ އިނގުރު ޕޭސްޓް، ހިކަނދިފަތް، ރާނބާފަތް، ބެލް ޕެޕަރ، ތޮޅި މިރުސް އަދި ގިތެޔޮ މިރުސް، ކުޑަ ތެޔޮ ފޮދެއްގެ ތެރޭގައި މީރު ކޮށްލާނީއެވެ.

4) އެ ތަކެތި ރަނގަޅަށް މޯޅިވުމުން، ޓޮމާޓޯ، އަދި ކެރެޓް އަޅައިގެން އެވެސް 3 ވަރަކަށް މިނެޓް ވަންދެން މީރުކޮށްލާށެވެ.

5) ދެން ސޯޔާ ސޯސް، އޮއިސްޓަރ ސޯސް، ޓޮމާޓޯ ޕޭސްޓް، ލޮނުމިރުސް އެޅުމަށްފަހު ކުޑަ ފެންފޮދެއް އަޅައިގެން 2 މިނެޓް ވަރު ކައްކާލާށެވެ. ދެން މަމީ ނޫޑްސް ސޫޕް ޕެކެޓް އަޅާލާފައި އެކުލަވާލުމަށްފަހު ފްރައިޑް ޗިކަން ސޯސް އަޅާލުމަށްފަހުވެސް އެކުލަވާލާށެވެ. މާ ހިކި ނަމަ އިތުރު ފެންފޮދެއް އަޅާލާށެވެ. އަދި ލޮނު ހެޔޮވަރު ކޮށްލާށެވެ.

6) ފަހު ކަމަކަށް މަޑުކޮށްފައި ހުރި ބީފް، ސޯސް ގަނޑަށް އަޅާލުމަށްފަހު، ރަނގަޅަށް އެކުލަވާލެވެ. ދެން މިނެޓެއް ވަންދެން މަޑު ގިނީގައި ކެއްކުމަށްފަހު މަތި ޖަހައިގެން މަޑު ގިނީގައި 2 މިނެޓް ކައްކާލާށެވެ. ޗިލީ ބީފް އެހުރީ ތައްޔާރު ވެފައެވެ.