ރާއްޖޭގައި އެއަރޕޯޓްތައް ތަރައްގީކުރާނެ ރަށްތައް ރައީސް ޑރ.މުއިއްޒު ކަނޑައަޅުއްވައިފި

ރާއްޖޭގައި އެއަރޕޯޓްތައް ތަރައްގީކުރާނެ ރަށްތައް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ގަރާރަކުން ކަނޑައަޅުއްވައިފިއެވެ.

މި ގަރާރަކީ ދައުލަތުގެ އާންމު މަންފާއަކަށް ޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ހިންގާނޭ މުހިންމު މަޝްރޫޢުތަކާއި އެ މަޝްރޫއު ހަވާލު ކުރެވޭ ފަރާތުން އެންމެ މަދުވެގެން ކުރަން ޖެހޭ އިންވެސްޓްމަންޓް ތައް ބަޔާންކޮށް ނެރުއްވާފައިވާ ގަރާރެކެވެ.

ރައީސް ޑރ.މުއިއްޒު ނެރުއްވި ގަރާރުގައިވާ ގޮތުން، ޖުމްލަ 9 ރަށެއްގައި އަލަށް އެއާޕޯޓު ތަރައްގީ ކުރުމުގެ އިތުރުން، އެއާޕޯޓުގެ މަޝްރޫއު ފެށިފައިވާ ބައެއް ރަށްތަކުގެ އެއާޕޯޓު ނިންމުމަށްވެސް ވަނީ ކަނޑައަޅުއްވާފައެވެ.

މިގޮތުން އަލަށް އެއާޕޯޓު އެޅުމަށް ނިންމަވާފައިވާ 9 ރަށަކީ:

1) ހއ. ދިއްދޫ

2) ށ. ދިގުވެލި

3) ށ. މިލަންދޫ

4) ނ. ވިހަފަރު

5) ރ. ފައިނު

6) އއ. މަތިވެރި

7) ފ. ނިލަންދޫ

8) ގއ. މާޅެންދޫ

9) ތ. ގުރައިދޫ

ހަމައެއާއިއެކު، ފެށިފައިވާ އެއާޕޯޓުތައް ނިންމުމަށް ރައީސް ޑރ.މުއިއްޒު ނިންމެވި ރަށްތަކުގެ ތެރޭގައި ހިމެނޭ ރަށްތަކަކީ:

1) ހދ. މަކުނުދޫ

2) ރ.އަލިފުށި

3) މ.މުލި

4) ށ.ބިލެއްފަހި

5) ބ.ތުޅާދޫ

6) ތ.ވިލުފުށި

އަލަށް ތަރައްގީކުރާ ކޮންމެ އެއާޕޯޓަކަށް އެންމެ މަދުވެގެން ހަރަދު ކުރަން ޖެހޭ އަދަދުގެ ގޮތުގައި ފަސް މިލިއަން ޑޮލަރު ކަނޑައަޅުއްވާފައިވާއިރު ފެށިފައިވާ އެއާޕޯޓުތައް ނިންމުމަށް މަދުވެގެން ހަތަރު މިލިއަން ޑޮލަރު ހަރަދު ކުރަން ޖެހޭ ކަމަށް ވެސް މި ގަރާރުގައި ވަނީ ބަޔާންކޮށްފައެވެ.

މީގެ އިތުރުންވެސް، ބައެއް އެއަރޕޯޓުތައް އިތުރަށް ތަރައްގީ ކުރުމާއި ލ. އަތޮޅުގައި ދެވަނަ އެއަރޕޯޓެއް ތަރައްގީ ކޮށް، ގއ. ވިލިނގިއްޔާއި ތިނަދޫ ސިޓީގައި އިންޓަރނޭޝަނަލް އެއަރޕޯޓު ތަރައްޤީކުރުމަށްވެސް ރައީސް ޑރ.މުއިއްޒު ވަނީ ނިންމަވާފައެވެ.

އެއާޕޯޓް ތަކުގެ އިތުރުންވެސް، އައްޑޫ ސިޓީ އާއި ލ. ގަމުގައި އައްސޭރި ޓޫރިޒަމްގެ މަޝްރޫއުތައް ހިންގުމަށް ވެސް ރައީސް ޑރ.މުއިއްޒު ނެރުއްވި ގަރާރުގައި ހިމަނުއްވާފައިވާކަން ފާހަގަކޮށްލަން ޖެހެއެވެ.