ނަން އަބުރާ ގެންދިޔައީ ޕާޓީތަކަށް ނިސްބަތްވާ ތިން ކެންޑިޑޭޓަކާއި، އަމިއްލަ ކެންޑިޑޭޓެއް: އީސީ

ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިހާބުގައި ވާދަކުރުމަށް ފޯމް ހުށަހެޅި ފަރާތްތަކުގެ ތެރެއިން ނަން އަބުރާ ގެންދިއުމަށް ދިން ފުރުޝަތުގައި ނަން އަބުރާ ގެން ގޮސްފައިވަނީ ތިން ޕާޓީއަކަށް ނިންބަތްވާ ތިން ކެންޑީޑޭޓަކާއި އަމިއްލަ ގޮތުން ވާދަކުރުމަށް ހުށަހެޅި އެއް ކެންޑިޑޭޓެއް ކަމަށް އިލެކްޝަންސްއިން ބުނެފިއެވެ.

އީސީން މިގޮތަށް ހާމަކޮށްފައިވަނީ އީސީގެ ނައިބުރައީސް އަލްފާޟިލް އިސްމާއިލް ހަބީބު ކުރެއްވި އެކްސް ޕޯސްޓެއްގައެވެ.

"ޝަރުތު ހަމަވި 372 ކެންޑިޑޭޓުންގެ ތެރެއިން، އެމްޑީޕީން މުލަކު ދާއިރާ އަށް، ޕީއެންސީން ގައްދޫ ދާއިރާއަށް، ޑިމޮކްރެޓްސް އިން ހިތަދޫ މެދުދާއިރާއަށް ކުރިމަތިލެއްވި ކެންޑިޑޭޓަކާއި، އަމިއްލަގޮތުން ކިނބިދޫ ދާއިރާއަށް ކުރިމަތިލެއްވި ކެންޑިޑޭޓަކާއެކު ޖުމްލަ 4 ކެންޑިޑޭޓުންވަނީ ނަން އަނބުރާ ގެންދަވާފައި."

ހަބީބުގެ ޕޯސްޓުގައި ވިދާޅުވެފައި ވެއެވެ.

ނަން އަބުރާ ގެންދެވި ކެންޑިޑޭޓުންގެ ތެރެއިން އެންމެ ފާހަގަކޮށްލެވެނީ ޑިމޮކްރެޓްސްގެ ފަރާތުން ހިތަދޫ މެދުދާއިރާއަށް ކުރިމަތިލެއްވި، މިހާރު ވެސް އެ ދާއިރާގެ މެންބަރުކަން ކުރައްވަމުން ގެންދަވާ އަހްމަދު ރަޝީދެވެ. އެބޭފުޅާގެ ނަން އަބުރާ ގެންދެވި ސަބަބެއް މިހާތަނަށް އަދި ހާމަކުރައްވާފައެއް ނުވެއެވެ.

އެ ދާއިރާއަށް ޕީއެންސީގެ ފަރާތުން ވާދަކުރައްވަނީ މަޝްޙޫރު ނޫސްވެރިޔާ އަހްމަދު އަޒާނެވެ. އެމްޑީޕީގެ ފަރާތުން އެ ވާދަކުރައްވަނީ މުހައްމަދު ޝުއާއުއެވެ.

އީސީގެ ނައިބު ރައީސް ހަބީބު ވިދާޅުވެފައިވާ ގޮތުގައި މިފަހަރުގެ މަޖިލިސް އިންތިހާބުގައި ވާދަކުރައްވާނީ 368 ކެންޑިޑޭޓުންކަމަށެވެ. އޭގެ ތެރޭގައި ހިމެނެނީ 42 އަންހެނުންނާއި އަދި 326 ފިރިހެނުންނެވެ.

ހަބީބު ވިދާޅުވެފައިވާ ގޮތުގައި މިފަހަރު އެންމެ ގިނަ ކެންޑިޑޭޓުން ވަދަކުރަނީ އެމްޑީޕީގެ ފަރާތުންނެވެ. އެއީ 90 ކެންޑިޑޭޓުންނެވެ. ވެރިކަން ކުރާ ޕީއެންސީގެ ފަރާތުން 89 ކެންޑީޑޭޓުން ވާދަކުރާއިރު ތިން ވަނައަށް އެންމެ ގިނަ ކެންޑިޑޭޓުން ވާދަކުރަނީ ދަ ޑިމޮކްރެޓްސްގެ ފަރާތުންނެވެ. އެއީ 39 ކެންޑިޑޭޓުންނެވެ.

ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިޚާބު ބާއްވަން އިލެކްޝަން ކޮމިޝަނުން ކަނޑައަޅާފައި ވަނީ މިއަންނަ މަހުގެ 17 ވަނަ ދުވަހެވެ. ނަމަވެސް ރައްޔިތުންގެ މަޖިލިހުން މިހާރު ވަނީ ރޯދަ މަސް ނިމޭތާ 10 ދުވަސް ފަހުން އިންތިޚާބު ބާއްވަން ޖެހޭގޮތަށް ޤާނޫނު އިސްލާހުކޮށްފައެވެ. އިންތިހާބާއި ބެހޭ ޤާނޫނަށް މި ގެނައި އިސްލާހަށް އަމްލަކުރަން ޖެހޭނީ ރައީސުލްޖުމުހޫރިއްޔާ އެއިސްލާހް ތަސްދީގު ކުރެއްވުމުންނެވެ.