އެމްޑީއެންގެ ރިޕޯޓު ލިޔުނު މީހުންގެ ވާހަކަ ތާރީޚުގައި ކަޅުއަކުރުން ކަނޑައި ނެގޭނެ: އިލްމުވެރިން

އިސްލާމް ދީނަށާއި ކީރިތި ރަސޫލާއަށް ފުރައްސާރަކޮށް، މޯލްޑިވިއަން ޑިމޮކްރެޓިކް ނެޓްވޯކް (އެމްޑީއެން) އިން ނެރުނު ރިޕޯޓު ލިޔުނު މީހުންނާއި އެކަމަށް ހިތްވަރު ދިން މީހުންގެ ނަން ދިވެހި ތާރީޚުގައި ކަޅުއަކުރުން ކަނޑައި ނެގޭނެ ކަމަށް އިލްމުވެރިންގެ ގުޅުމުން ބުނެފިއެވެ.

އެމްޑީއެން އުވާލުމާއި ގުޅިގެން އިމްލުވެރިންގެ ގުޅުމުގެ ފަރާތުން މިއަދު ނެރުނު ނޫސްބަޔާނެއްގައި ބުނެފައިވަނީ،

އެމްޑީއެންގެ އެ އުދުވާންނާ ދެކޮޅަށް ރައްޔިތުން ކެތްތެރިކަންމަތީ ކުރި ޖިހާދުގައި، ކުރިމަތިވި ގޮންޖެހުންތަކާއި ގިރާކުރަން ޖެހުނު ހުރަސްތަކަށް ރާއްޖޭގެ ދީނީ އިލްމުވެރިން ކުރިމަތިލެއްވި ހިކުމަތްތެރި ވިސްނުންތެރި އުސްލޫބަކީ ރައްޔިތުންގެ ސާދާކަމާއި ސީދާކަން ދައްކުވައިދިން ނުހަނު އަލިގަދަ ހެއްކެކެވެ. އަދި އެއީ ހައްދުފަހަނައަޅާފައިވާ އެމްޑީއެން ފިކުރުގެ މީހުން، އެއްވެސް އަސްލެއް، އަސާސެއް، ހަގީގަތެއް ނެތި އިލްމުވެރިންގެ އިސްތަށިފުޅުގައި އަޅުވަން މަސައްކަތްކޮށްފައިވާ ދޮގު އިލްޒާމުތަކުގެ ބާތިލުކަން އެންމެހާ މީސްތަކުންނަށް ސާބިތުކޮށްދިން ހާދިސާއެއް ކަމަށް ބަޔާނުގައި ވެއެވެ.

''ދިވެހި ރާއްޖޭގެ އެންމެހާ އަސްލަކާއި އަސާސްތައް ގުޅިލާމެހިފައިވާ އިސްލާމް ދީނަށް، ޓެރަރިސްޓުންތަކެއް ދިން ޚުޠޫރަތްތެރި ވިހަ ގަދަ ފިކުރީ ހަމަލާ ކަމުގައިވާ މޯލްޑިވިއަން ޑިމޮކްރެޓިކް ނެޓްވޯރކްގެ ރިޕޯޓު ލިޔެ ތައްޔާރުކޮށް، ޢާންމު ކުރުމަށް ވާގިވެރިވެ، އަދި އެކަމަށް ތާޢީދުކޮށް، ނުވަތަ ދިފާޢުކުރި މީސްމީހުންގެ ވާހަކައަކީ، ދިވެހި ތާރީޚުގައި ނުހަނު ކަޅުއަނދިރި އަކުރުން ކަނޑައިނެގޭނެ ވާހަކައެއް ކަމާމެދު ކުޑަކޮށްވެސް ޝައްކެއް ނެތެވެ.'' ބަޔާނުގައި ވެއެވެ.

ބަޔާނުގައި ވަނީ، އެމްޑީއެން އުވައިލުމަކީ ރައްޔިތުން އިސްލާމް ދީނުގެ ހިމާޔަތުގައި މިއަދު ކުރަންޖެހިފައި މިވާ ޖިހާދުގެ އެންމެ ފުރަތަމަ ހަރުފަތް މާތް ރަސްކަލާނގެ ރަހުމަތްފުޅުން ގިރާކުރެވިއްޖެ ކަމުގެ ސިގުނަލެއް ކަމުގައި ވިޔަސް، އިތުރަށް ކުރަން ޖެހޭ ބުރަ އަދި ގިނަ މަސައްކަތްތައް ފުރިހަމަ ކުރުން ކުރިޔަށް އޮތްކަން އެެއްވެސް ރައްޔިތަކު ހަނދާން ނައްތާލައިގެން ނުވާނެ ކަމަށެވެ.

ބަޔާނުގައިވަނީ، އިސްލާމީ ދިވެހި ދައުލަތުގެ ތާރީހުގައި ދޭތެރެ ދޭތެރެއިން ފާޅުވާ ނުބައި އަނިޔާވެރި ހައްދުފަހަނަ އަޅާފައިވާ ޣައްދާރުންގެ މަކަރުވެރި ސައްލާތަކާއި ރޭވުންތަކުގެ ކުރިމަތީގައި، އިސްލާމް ދީން ހިމާޔަތް ކުރުމަށް އަތުކުރިއޮޅައިގެން ހުޝިޔާރުކަމާއެކު ރައްޔިތުން ތިބުމަށް އިލްތިމާސްކޮށްފައެވެ. އިސްލާމް ދީނާއި ދިވެހި ރާއްޖޭގެ ޤާނޫނުތަކާ ޚިލާފަށް ނެރުނު އެމް.ޑީ.އެންގެ މިޢުދުވާނީ ރިޕޯޓު ލިޔެ ޢާންމު ކުރުމަށް ފަހު، ބޭރު ކަރަކަރައަށް ފިލަފިލައިގެން ގޮސް ތިބި މީހުންނާއި، އެކިއެކި މަޤާމުތަކުގައި ތިބެ ރައްޔިތުންގެ ބައިތުލްމާލުން މުސާރަ ނަގަމުންދާ އެންމެހާ ޚާއިނުން ޢަދުލު އިންސާފުގެ ކުރިމައްޗަށް ގެނެސް އަޅަންޖެހޭ ފިޔަވަޅުތައް އެޅުމަށްވެސް ޢިލްމުވެރިންގެ ބަޔާނުގައި ގޮވައިލައްވާފައިވެއެވެ.