ސަރުކާރު ބަދަލުވިޔަސް ކުރަން ފަށާފައިހުރި މަޝްރޫޢުތަކެއް ނުހުއްޓުވޭނެ: ސޯލިހު

ސަރުކާރެއް ބަދަލުވެދާނެ ކަމަށާއި ނަމަވެސް އެސަރުކާރަކުން ކުރަން ފަށާފައިހުރި މަޝްރޫޢުތައް ދެން އަންނަ ސަރުކާރަކުން ނުހުއްޓުވޭނެ ކަމަށް އިދިކޮޅު އެމްޑީޕީގެ އެޑްވައިޒަރު އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިގޮތަށް ވިދާޅުވީ، 'މިސްރާބު ހަމަމަގަށް' ޝިޢާރުގެ ދަށުން އެމްޑިޕީން ކުރިއަށްގެންދާ ކެމްޕެއިން ހަރަކާތްތަކުގެ ތެރެއިން ރޭ ބޭއްވި ގަލޮޅު ތަރާވީސް ޖަލްސާގައި ވާހަކަ ދައްކަވަމުންނެވެ.

އެގޮތުން، ރައީސް ޞާލިހު ވިދާޅުވީ ސަރުކާރަކުން ކުރަން ފަށާފައިވާ ކަންކަމަކީ ހިތަށްއެރި ގޮތަކަށް ބަދަލުކުރެވޭނެ ކަންތައްތަކެއް ނޫންކަމަށެވެ.

އަޅުގަނޑުމެން 2018 ވަނަ އަހަރު ވެރިކަމަށް އައިއިރުުގައިވެސް ހުރި، ރައީސް ޔާމީން މަސައްކަތްތަކެއް ފަށާފައި. ހިޔާ ފްލެޓުތަކުގެ ހަމައެކަނި ބިންގާ އަޅާފައި ހުރީ. އަޅުގަނޑުމެން އެ ހުއްޓާލިނަމަ ކޮންކަހަލަ ގެއްލުމެއްތޯ؟ ކުރިއަށް ގެންގޮސް ނިންމާ ރައްޔިތުންނަށް އޭރު އެއޮތް ލިސްޓާއި އެއްގޮތަށް އެކަން ކޮށް ނިންމާފައި އެހުރީ

ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވިއެވެ.

މީގެ އިތުރުން ރައީސް ޞާލިހު ވިދާޅުވީ ގދ. ފަރެސްމާތޮޑާގެ މަޝްރޫޢަކީވެސް ރައީސް ޔާމީނުގެ ވެރިކަމުގައި ފެއްޓެވި މަޝްރޫޢެއް ކަމަށެވެ.

ހަމައެގޮތަށް ފަރެސްމާތޮޑާ އެއާޕޯޓުވެސް، ގާތްގަނޑަކަށް އެއް ހެކްޓަރުވަރު ހިއްކާފައި އޮތީ. އަޅުގަނޑުމެން ކޮށް ނިންމިން. އެއީ ދައުލަތަކުން ކަންކުރަންޖެހޭނެ ގޮތަކީ.

ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވިއެވެ.

ރައީސް ޞާލިހު ވިދާޅުވީ މިއަދުގެ މި ސަރުކާރުން ފެނިގެންދަނީ އެމަންޒަރެއް ނޫންކަމަށެވެ.

އެހެންނަމަވެސް، މިއަދު މަގޫދޫގައި އަޅަން ފަށާފައި އޮތް އެއާޕޯޓު ހުއްޓާލާފައި އަމިއްލަ ކޮއްކޯފުޅު އިންތިހާބު ކުރުމަށްޓަަކައި މުޅި ދައުލަތުގެ ޚަޒާނާ ހުސްކުރަމުން އެގެންދަނީ. މިކަން ހުއްޓުވަން އެބަޖެހޭ.

ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވިއެވެ.

ރައީސް ޞާލިހު އިތުރަށް ވިދާޅުވީ، މަގޫދޫ އެއާޕޯޓު އެޅުމަށްޓަކައި ދައުލަތުގެ ފައިސާއިން ގާތްގަނޑަކަށް 115 މިލިއަން ރުފިޔާ ޚަރަދުކޮށް ޖުމްލަ 35 ހެކްޓަރު ހިއްކާފައިވާ ކަމަށެވެ.

އަދި ޓާމިނަލް ގެ މަސައްކަތް ފެށިފައިވާ ކަމަށާއި އެއާޕޯޓުގައި ގާއިމުކުރާ ފަޔާ ސްޓޭޝަން ވެސް ނިމުމަކާއި ހިސާބަށް ގޮސްފައިވާ ކަމަށް ރައީސް ޞާލިހު ވިދާޅުުވިއެވެ.

މިކަން މިގޮތަށް އޮތްއިރު، އަމިއްލަ ބޭނުމަށްޓަކައި ރައީސް ޑރ. މުޙައްމަދު މުޢިއްޒު މަގޫދޫ އެއާޕޯޓުގެ ޕްރޮޖެކްޓު ހުއްޓާލެއްވީކަމަށް ވިދާޅުވެ ރައީސް ޞާލިހު ވަނީ ރައީސް މުޢިއްޒުއަށް ވަރަށް ބޮޑަށް ފާޑުވިދާޅުވެފައެވެ.

ރައީސް ޞާލިހު ވިދާޅުވީ، މަޖިލީސް އިންތިހާބުން އެމްޑީޕީ މެޖޯރިޓީ ނެގުމަށްފަހު އެންމެ ފުރަތަމަވެސް ކުރައްވާނެ ކަމަކީ މި ސަރުކާރުން ހުއްޓާލާފައިވާ މަގޫދޫ އެއާޕޯޓު ގާނޫނީގޮތުން އެޅޭނެގޮތެއް މަޖުބޫރުކުރުވާނެ ކަމަށެވެ.