ހަރަމްފުޅުގެ އިމާމުގެ ހާއްސަ ދަރުސް، ބްރާސްފަތި ދުވަހުގެ ރޭ އިސްލާމީ މަރުކަޒުގައި!
ލިޔުންތެރިޔާ
އަބްދުﷲ ހުސައިން
މަދީނާގެ މަސްޖިދުއްނަބަވީގެ އިމާމު އަދި ޚަޠީބު ފަޟީލަތުއްޝައިޚް ޑރ. ޞަލާޙުލް ބުދައިރު މާދަމާ ރާއްޖެއަށް ކުރައްވާ ރަސްމީ ދަތުރުފުޅުގައި ދިވެހި ރައްޔިތުންނާ މުހާތަބް ކުރައްވައި ދެއްވުމަށް ނިންމްވާފައިވާ ހާއްސަ ދަރުސް އަންނަ ބްރާސްފަތިދުވަހުގެ ރޭ އިސްލާމީ މަރުކަޒުގައި އޮންނާނޭކަމަށް އިސްލާމިކް މިނިސްޓްރީން ބުނެފިއެވެ.
އިމާމު އަދި ޚަޠީބު ފަޟީލަތުއްޝައިޚް ޑރ. ޞަލާޙުލް ބުދައިރުގެ ދަތުރުފުޅާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، ޑރ. ޞަލާޙުލް ބުދައިރު ދެއްވާ ބޮޑު ދަރުސް، އަންނަ ބްރާސްފަތިދުވަހުގެ ރޭ އިޝާނަމާދަށްފަހު އިސްލާމީ މަރުކަޒުގައި އޮންނާނެ ކަމަށެވެ. ޝަހީމް ވިދާޅުވީ މި ދަރުހުގެ އިތުރުން ޖެހިގެން އަންނަ ހުކުރުދުވަހު އިސްލާމީ މަރުކަޒުގައި ހުތުބާ ދެއްވައި، އިމާމްވެ ހުކުރު ނަމާދުވެސް ކުރައްވާނީ ޑރ. ޞަލާޙުލް ބުދައިރުކަމަށެވެ.
ޝަހީމް ވިދާޅުވީ ޑރ. ޞަލާޙުލް ބުދައިރު ސަލްމާނު މިސްކިތުގައި އަންނަ ބުދަދުވަހުގެ މަޤްރިބް ނަމާދާއި އިޝާނަމާދު އިމާމްވެ ކުރައްވާނޭކަމަށެވެ. މަސްޖިދުއްނަބަވީގެ އިމާމު އަދި ޚަޠީބު ފަޟީލަތުއްޝައިޚް ޑރ. ޞަލާޙުލް ބުދައިރު، ރާއްޖެއަށް ކުރައްވާ ރަސްމީ ދަތުރުފުޅޫގައި މާލެ ވަޑައިގަތުމަށް ހަމަޖެހިފައިވަނީ މާދަމާއެވެ.
އެމަނިކުފާނުގެ މި ދަތުރުފުޅުގައި ދައުލަުގެ މުއައްސަސާތަކުގެ ބޭފުޅުންނާއި، އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާއި ބައްދަލުކުރެއްވުމާއި، އިސްލާމީ ފަތުވާދޭ އެންމެ މަތީ މަޖީލީހާއި ބައްދަލު ކުރައްވާ ގޮތަށް ވަނީ ހަމަޖެހިފައެވެ. އަދި ޒުވާން ޚަޠީބުންނާއި ޙާފިޡުންނާއި އިމާމުންނާއި ބައްދަލުކުރެއްވުމަށްވެސް ވަނީ ހަމަޖެހިފައެވެ.
މި ދަތުރުފުޅަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ދައުވަތަކަށް ކުރައްވާ ދަތުރުފުޅެކެވެ. ޑރ. ޞަލާޙުލް ބުދައިރު ރާއްޖެ ވަޑައިގެންނެވުމުގެ ހުއްދަ ސަޢުދީ ރަސްގެފާނު ސަލްމާން ބިން ޢަބްދުލް ޢަޒީޒް ހުއްދަ ދެއްވީ ފާއިތުވެދިޔަ ހަފްތާގެ ތެރޭގައެވެ.
އެމަނިކުފާނުގެ މިދަތުރުފުޅަކީ 40 އަހަރުގެ ތެރޭގައި ދެ ޙަރަމްފުޅުގެ އިމާމުންގެ ތެރެއިން އިމާމެއް ރާއްޖެ ވަޑައިގަންނަވާ ފުރަތަމަ ފަހަރުކަމަށް އިސްލާމިކް މިނިސްޓްރީން ފާހަގަކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
