ހައްޖުވެރިން ފުރާ ދުވަސްތަކުގައި، ފުރުމުގެ ކަންކަން ދުރާލާ ނިންމަންޖެހޭ

ހައްޖުގެ މަތިވެރިކަން އަދާކުރުމަށް ހައްޖުވެރިން ވެލާނާ އިންޓަރނޭޝަނަލް އެއާޕޯޓަށް ފުރަންދާ ދުވަސްތަކުގައި، އެއާޕޯޓަށް ފުރަންދާ އެހެން ފަރާތްތަކުން ދުރާލާ ދަތުރުގެ ކަންކަން ހަމަޖެއްސުމަށް ފުލުހުން އިލްތިމާސްކޮށްފިއެވެ.

ހައްޖުގެ އަޅުކަން އަދާކުރުމަށް ރާއްޖެއިން ހައްޖުވެރިން ފުރުމަށް ހަމަޖެހިފައިވަނީ، މިހިނގާ މެއިމަހުގެ 26، 27، 29 އަދި 30 ވަނަ ދުވަހުއެވެ. ފުލުހުން ބުނީ އެދުވަސްތަކުގައި އެއާޕޯޓްގައި ޓްރެފިކް ތޮއްޖެހުން ބޮޑުވާނޭކަމަށް ބެލެވޭނެތީވެ، ޓްރެފިކް ފްލޯ ކުރިއަށްގެންދިއުމުގައި ފުލުހުން ހަރަކާތްތެރިވަމުންދާނޭ ކަމަށެވެ.

އެދުވަސްތަކުގައި ވީއައިއޭއަށް ފުރަންދާ މީހުނަށް ޓްރެފިކް ތޮއްޖެހުމުގެ ސަބަބުން ލަސްތަކެއް ކުރިމަތިވުމަކީ އެކަށީގެންވާ ކަމެއްކަން ފާހަގަކުރަމުން ފުލުހުން ބުނީ، އެދުވަސްތަކުގައި ފުރަންދާ އެހެން މީހުންވެސް ދުރާލާ ފުރުމުގެ ކަންކަން އިންތިޒާމުކުރުމަށް އިލްތިމާސްކުރާ ކަމަށެވެ. އަދި ހައްޖުވެރިންނާއެކު އެއާޕޯޓަށް ޒިޔާރަތްކުރާ ގާތްތިމާގެ މީހުންނާއި އެއާޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާތްތަކުންވެސް ފުލުހުންގެ އިރުޝާދުތަކާ އެއްގޮތަށް އަމަލުކުރުމަށް އެދޭކަމަށެވެ.

މިފަހަރު ހައްޖުގެ އަޅުކަން އަދާކުރުމަށް ރާއްޖެއަށް 1،000 ކޯޓާ ލިބިފައިވާއިރު، ހައްޖުވެރިންނަށް ހާއްސަ އިންތިޒާމްތަކެއް ވަނީ ހަމަޖައްސާފައެވެ. އެގޮތުން ސަރުކާރާ ސައުދީގެ އިސް ފަރާތްތައް ގުޅިގެން ކުރެވުނު މަސައްކަތްތަކުން ވަނީ ހައްޖަށްދާއިރު ލުއިލިބޭ މައްކާރޫޓްގައި ރާއްޖެ ހިމަނާފައެވެ. މައްކާ ރޫޓް އިނީޝިއޭޓިވްއަކީ ހައްޖުވެރިން އަމިއްލަ ޤައުމުން ފުރުމުގެ ކުރިން، ދެ ޤައުމުގެ އިމިގްރޭޝަނުން ކުރަންޖެހޭ ކަންކަން އަމިއްލަ ޤައުމުގެ އެއަރޕޯޓްގައި ތިބެ ނިންމައިގެން ފުރުމެވެ. ނަތީޖާއަކީ ޖިއްދާގެ އެއާޕޯޓްގެ އިމިގްރޭޝަންގައި ޙައްޖުވެރިން މަޑުކުރަން ނުޖެހި ހޮޓަލަށް ދެވޭގޮތަށް ކަންކަން އިންތިޒާމް ވެގެން ދިއުމެވެ. އެގޮތުން ހައްޖުވެރިންގެ ލަގެޖްތައް ވެސް ލިބޭނީ ސީދާ ހޮޓަލަށެވެ.

މީގެ އިތުރުން ހައްޖުވެރިންގެ ޑެބިޓު ކާޑުތަކުން ބޭރު ފައިސާގެ މުއާމަލާތްކުރެވޭނެ މިންވަރު 2،000 ޑޮލަރަށް އިތުރުކޮށްދީފައިވާއިރު، މައްކާގައިވެސް ވަނީ ރާއްޖޭގެ ހައްޖުވެރިންނަށް ހާއްސަ އިންތިޒާމުތަކެއް ހަމަޖައްސާފައެވެ. މީގެ ތެރޭގައި ޓެންޓްތަކުގެ ފެންވަރު ރަނގަޅުކުރުމާއި، ދިވެހި ހައްޖުވެރިންނަށް ހާއްސަކޮށް ހެދި ކްލިނިކް ފާހަގަކޮށްލެވެއެވެ.