ކަނޑެވާރެހާގައި ފަތުރުވެރިކަން ތަރައްގީ ކުރާނެ ބަޔަކު ހޯދަން އިއުލާންކޮށްފި
ކަނޑެވާރެހާގައި ފަތުރުވެރިކަން ތަރައްގީ ކުރާނެ ބަޔަކު ހޯދަން ގދ. ހޯނޑެއްދޫ ކައުންސިލުން އިއުލާނުކޮށްފިއެވެ.
މި އިއުލާނުގައި ހޯނޑެއްދޫ ކައުންސިލުން ބުނީ، ގދ. އަތޮޅުގައި ހިމެނޭ މީހުން ނޫޅޭ ރަށެއް ކަމުގައިވާ 4.6 ހެކްޓަރު ގެ ގދ. ކަނޑެވާރެހާ ގައި އިންޓެގްރޭޓެޑް ޓޫރިސްޓް ރިސޯޓެއް ތަރައްޤީކުރުމަށް ޝައުޤުވެރިވާ ރާއްޖޭގެ ނުވަތަ ބޭރުގެ އިންވެސްޓަރުންނަށް ދަޢުވަތު އަރުވާ ކަމަށެވެ.
އެހެންކަމުން، މިކަމަށް ޝައުޤުވެރިވާ ފާ ފަރާތްތަކަށް އިތުރު މަޢުލޫމާތު ހޯދުމަށާއި، ބިޑިންގ ޑޮކިއުމަންޓްތައް ބެލުމަށާއި ގަތުމަށް 24 ސެޕްޓެމްބަރ 2024 އިން ފެށިގެން 17 ނޮވެމްބަރ 2024 އާ ހަމައަށް، ސަރުކާރު ބަންދު ދުވަސްތައް ފިޔަވައި ހެނދުނު 9:00 އިން މެންދުރުފަހު 1:00 އަށް ލިބޭނެ ކަމަށެވެ.
ޝައުޤުވެރިވާ ފަރާތްތަކަށް މަޢުލޫމާތު ދިނުމަށް ޕްރީ-ބިޑް ބައްދަލުވުމެއް 15 އޮކްޓޯބަރ 2024 ވާ ދުވަހުގެ މެންދުރުފަހު 1:00 ގައި ޒޫމް މެދުވެރިކޮށް އޮންލައިންކޮށް ބޭއްވޭނެކަމަށާއި، ޕްރޮޕޯސަލްތައް ހުށަހެޅުން އޮންނާނީ 24 ނޮވެމްބަރ 2024 (އާދީއްތަ) ވާ ދުވަހުގެ މެންދުރުފަހު 1:30 ގައި ކަމަށް ކައުންސިލުން މައުލޫމާތުދެއެވެ.
މަޢުލޫމާތު ދިނުމުގެ ބައްދަލުވުމުގައި ބައިވެރިވުމަށް، 13 އޮކްޓޯބަރ 2024 ވާ ދުވަހުގެ މެންދުރުފަހު 2:00 ގެ ކުރިން ނަމާއި، އީމެއިލް އެޑްރެހާއި، ފޯނު ނަންބަރާއެކު [email protected] އަށް އީމެއިލް ކުރެއްވުށް އެދިފައިވާއިރު، ބިޑާ ގުޅޭގޮތުން އިތުރު މަޢުލޫމާތު ސާފުކުރެއްވުމަށް [email protected] އަށް އީމެއިލް ކުރުމަށް ކައުންސިލުން ވަނީ އެދިފައެވެ.
2017 ވަނަ އަހަރު ބީލަމުގެ އުސޫލުން ގދ. އަތޮޅުގެ 27 ފަޅު ރަށެއް ވަރުވާ ދޫކުރަން ހުޅުވާލިއިރު ހިމެނުނު މި ރަށަކީ ފަތުރުވެރިކަން ތަރައްގީ ކުރުމަށް 2021 ވަނަ އަހަރު ބީލަމަށް ހުޅުވާލި 16 ރަށުގެ ތެރޭގައިވެސް ހިމެނޭ ރަށެއްކަން ފާހަގަކޮށްލަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
