މަޖިލިސް އުވާލީ މެންބަރުން ވިކެމުންދާތީ: ސިރިސޭނާ

ސްރީލަންކާގެ ގާާނޫނު ހަދާ މަޖިލިސް އުވާާލީ، އެ މަޖިލީހުގެ މެންބަރުން އަމިއްލައަށް، ނަފްސަށް އަގުކިޔާ ވިއްކަމުން ދިއުމުންކަމަށް ލަންކާގެ ރައީސް މައިތިރިޕާލާ ސިރިސޭނާ ވިދާޅުވެއްޖެއެވެ.

ލަންކާގެ ރައީސްއަށް ގާނޫނު އަސާސީން ލިބިދީފައިވާ ޚާއްސަ ބާރުގެ ދަށުން މިދިޔަ ހުކުރު ދުވަހުގެ ރޭ ވަނީ ގާާނޫނު ހަދާ މަޖިލިސް އުވާލާފައެވެ. މި ނިންމުމާއި ބެހޭގޮތުން ގައުމާއި މުޚާތަބުކުރައްވަމުން ސިރިސޭނާ ވިދާޅުވީ މަޖިލިސް އުވާާލުމުގެ މައިގަނޑު ސަބަބަކީ މަޖިލީހުގައި ކޮރަޕްޝަންގެ މައްސަލަ އިތުރުވެ، މަޖިލިސް މެންބަރުން އެމީހުންގެ އަމިއްލަ ނަފްސު ވިއްކަމުން ދިޔުންކަމަށެވެ.

ސިރިސޭނާ ވިދާޅުވީ ދެފަރާތުން މަޖިލީހުގައި ބާރުއޮތްކަން ދައްކަން މަސައްކަތް ކުރި ދަނޑިވަޅުގައި މެންބަރުން އެގޮތަށް ކަންތައްތައް ކުރަމުންދިޔުމުގެ ސަބަބުން ހިތާމަކުރައްވާކަމަށެވެ.

އަދި ހަމަ އެހެންމެ މަޖިލީހުގެ ރައީސް ކަރޫ ޖަޔަސުރިޔާ، މަހިންދަ ރާޖަޕަކްސައަކީ ބޮޑުވަޒީރުކަމަށް ބަލައިގަނެ، ފަހުން އެ ނިންމުން ބަދަލުކުރުމަކީވެސް ގާނޫނު ހަދާ މަޖިލިސް އުވާލަން ޖެހުނު ސަބަބެއްގެ ގޮތުގައި ސިރިސޭނާ ވަނީ ފާހަގަކުރައްވާފައެވެ.

ސިރިސޭނާ ވަނީ މިނިވަން، އިންސާފުވެރި އިންތިހާބެއް ބޭއްވުމަށް އިލެކްޝަންސް ކޮމިޝަނަށް ފުރިހަމަ އެއްބާރުލުން ދެއްވާނެކަމަށް ވިދާޅުވެފައެވެ. އަދި އެހެންމެ ސްރީލަންކާގެ ފުލުހުންނާއި ސިފައިންނަށް ދޭންޖެހޭ އެއްބާރުލުން ދިނުމަށްވެސް އެމަނިކުފާނު ވަނީ ލަންކާގެ ރައްޔިތުންނަށް ގޮވާލައްވާފައެވެ.

ލަންކާގެ އާންމު އިންތިހާބު ބޭއްވުމަށް ހަމަޖެހިފައިވަނީ މި އަންނަ އަހަރުގެ ޖެނުއަރީ މަހުގެ ފަސްވަނަ ދުވަހުއެވެ. މި އިންތިހާބު ނުބޭއްވޭނެ ގޮތް ހެދުމަށް އިދިކޮޅު ޔޫއެންޕީއިން ދަނީ ކޯޓަށް މައްސަލައެއް ވެއްދުމަށް ތައްޔާރުވަމުންނެވެ.