ގިނަ ރަށްތަކުގައި މަގުބައްތިތައް ރައްކާތެރިއެއް ނޫން: ފެނަކަ

ގިނަ ރަށްތަކުގައި ހަރުކުރެވިފައި ހުރި މަގުބައްތިތަކަށް ކަރަންޓް ދެވިފައި ހުރީ ރައްކާތެރި ގޮތަކަށް ނޫން ކަމަށް ފެނަކައިން ބުނެފިއެވެ.

ފެނަކައިގެ ކަރަންޓުގެ ހިދުމަތް ދީފައިވާ ރަށްތަކުގެ މަގު ބައްތިތަކުގެ ސަލާމަތީ ކަންތައްތައް ހުރި ގޮތް ބެލުމުގެ ގޮތުން ހުރިހާ ރަށެއްގައި ހުރި މަގު ބައްތިތައް އިންސްޕެކްޓް ކުރުމަށްފަހު ނެރުނު ބަޔާނެއްގައި ބުނެފައިވާ ގޮތުން، މި އިންސްޕެކްޝަނުން ގިނަ ރަށްތަކުގައި ހަރުކުރެވިފައި ހުރި މަގުބައްތިތަކަށް ކަރަންޓް ދެވިފައި ހުރީ އީއެލްސީބީ މެދުވެރި ނުކޮށްކަން ވަނީ ފާހަގަކުރެވިފައިވާ ކަމަށެވެ.

މި ގޮތަށް ކަރަންޓު ދޫކޮށްފައި ހުރުމުން ނުރައްކާތެރި ހާދިސާއެއް ހިނގުމަކީ އެކަށީގެންވާ ކަމެއް

ފެނަކަ

ފެނަކަ އިން ބުނީ ނުރައްކާތެރި ހާދިސާއެއް މެދުވެރިވިޔަ ނުދިނުމަށް އަޅާ ފިޔަވަޅެއްގެ ގޮތުން އެ ކުންފުނިން ކަރަންޓުގެ ހިދުމަތް ދޭ މަގުބައްތިތަކަށް މީގެ ފަހުން ކަރަންޓު ދޫކުރާނީ އެ ކުންފުނިން ދޭ ނަމޫނާ ކުރެހުމާއި އެއްގޮތަށް ސަލާމަތީ މިންގަނޑުތަކަށް ފެތޭ ގޮތަށް ހަދާފައި ހުންނަ ސަބް ޑީބީ ހަރުކޮށްފައިވާ ނަމަ ކަމަށް ކުންފުނިން ހިދުމަތް ދޭ ރަށްތަކުގެ ކައުންސިލްތަކަށް މިދިޔަ މަހުގެ ނުވަ ވަނަ ދުވަހު އަންގާފައިވާ ކަމަށެވެ.

ައަދި އެފަދަ މަގު ބައްތިތައް މިދިޔަ މަހުގެ 27 ވަނަ ދުވަހުގެ ކުރިން ސަބް ޑީބީ ހަރުކޮށް ނިންމުމަށް ކުރިން އަންގާފައިވީ ނަމަވެސް ގިނަ ކައުންސިލްތަކުގެ އެދުމުގެ މަތިންނާއި މަސައްކަތުގެ މުހިންމުކަމުން މި މުއްދަތު އިތުރު އެއް މަސް ދުވަހަށް އިތުރުކުރަން ނިންމާފައިވާ ކަމަށް ފެނަކަ އިން ބުންޏެވެ.

ފެނަކައިން ބުނެފައިވާގޮތުން، މި މުއްދަތުގެ ތެރޭގައި ކައުންސިލްތަކުން ތަކެތި ފޯރުކޮށްދިނުމުން ފެނަކައިން ހިލޭ ސަބް ޑިބީތައް އިންސްޓޯލް ކޮށްދޭނެއެވެ. ނުވަތަ ފެނަކައިން ތަކެތި ފޯރުކޮށް ބިލް ކުރެވޭ ގޮތަށް އެ ކުންފުނީގެ ޓެކްނިކަލް މުވައްޒަފުންގެ އެހީތެރިކަމާއެކު ސަބްޑީބީ ތައްޔާރުކޮށް ހަރުކޮށްދިނުމުގެ މަސައްކަތް ކޮށްދެވިދާނެ ކަމަށްވެސް އެ ކުންފުނިން ވަނީ ބުނެފައެވެ.

މިއީ ޔުޓިލިޓީ ރެގިއުލޭޝަން އޮތޯރިޓީ (ޔޫއާރްއޭ) ގެ މިންގަނޑަށް މަގު ބައްތިތައް ގެނައުމަށް ކުރެވޭ މުހިންމު މަސައްކަތެއް ކަން ފާހަގަކޮށއ ފެނަކައިން އިތުރަށް ބުނީ، މި މުއްދަތުގެ ތެރޭގައި މިންގަނޑާއި އެއްގޮތަށް އިސްލާހު ނުކުރެވޭ މަގު ބައްތިތަކުން ކަރަންޓު މިމަހުގެ ނިޔަލަށް ކަނޑާލެވޭނެ ކަމަށެވެ.

އަދި މި ކަންތައްތައް ކައުންސިލްތަކުން ރަނގަޅު ކުރަމުންދޭތޯ ފެނަކައިގެ ބްރާންޗްތަކުން ގާތުން ބަލަމުންދާނެ ކަމަށްވެސް އެ ކުންފުނިން ވަނީ ބުނެފަ އެވެ.

ފެނަކައިން މިފަދަ އިންސްޕެކްޝަނެއް ކުރިއަށް ގެންގޮސްފައިވާއިރު މިދިޔަ މޭ މަހު އުނގޫފާރުގައި ހުރި މަގުބައްތި ހޮޅި ދަނޑިއަކުން މަގުމަތީގައި ހުރި ފެންގަނޑަކަށް ކަރަންޓް ދަތުރުކޮށް ދެ ކުޑަކުދިންނާއި 18 އަހަރުގެ ޒުވާނަކު ކަރަންޓުގައި ޖެހި، އެތަނުން 18 އަހަރުގެ ޒުވާނާ ވަނީ ނިޔާވެފައެވެ.