ބަޓަރ ޗިކަން ހަދަންވީ މިހެން؛ ޔަގީނުންވެސް މީރުވާނެ!

ބަޓަރ ޗިކަން އަކީވެސް ވަރަށް ގިނަ ގޮތް ގޮތަށް ތައްޔާރު ކޮށް އުޅޭ ޑިޝް އެކެވެ. އެގޮތުން މީގެ ކުރިން ވެސް މި ޑިޝް ތައްޔާރު ކުރާނެ ގޮތެއް ވާނީ "ވޮއިސް" ގެ ބަދިގެއިން ގެނެސްދީފައެވެ. މިއަދު މި ގެނެސްދެނީ އެ ނޫން އެހެން ގޮތެވެ. މިއީވެސް ވަރަށް މީރު ގޮތެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ.

ބޭނުންވާ ތަކެތި

500 ގ ބޯންލެސް ކުކުޅު (ކޮށާފައި)

1 މޭޒުމަތީ ސަމުސާ ލުނބޯ ހުތް (ކުކުޅު މެރިނޭޓް ކުރުމަށް)

1 މޭޒުމަތީ ސަމުސާ އޮލިވް އޮއިލް (ކުކުޅު މެރިނޭޓް ކުރުމަށް)

2 މޭޒުމަތީ ސަމުސާ މުގުރި މިރުސް

2 މޭޒުމަތީ ސަމުސާ ގަރަމް މަސާލާ

1 ސައި ސަމުސާ ރީނދޫ

1/2 ޖޯޑު ޕްލެއިން ޔޯގަޓް

1 ސައިސަމުސާ އިނގުރު ޕޭސްޓް (ކުކުޅު މެރިނޭޓް ކުރުމަށް)

1 ސައިސަމުސާ ލޮނުމެދު ޕޭސްޓް (ކުކުޅު މެރިނޭޓް ކުރުމަށް)

1 މޭޒުމަތީ ސަމުސާ ގީ

1 ބޮޑު ފިޔާ ( ތުނިކޮށް ކޮށާފައި)

2 ސައި ސަމުސާ ލޮނުމެދު ޕޭސްޓް ( ގްރޭވީ ހެދުމަށް)

1 ސައިސަމުސާ އިނގުރު ޕޭސްޓް (ގްރޭވީ ހެދުމަށް)

1 މޭޒުމަތީ ސަމުސާ ޓޮމާޓޯ ޕޭސްޓް

3/4 ޖޯޑު ކެޝޫ ނަޓް

6 ރަތް ކުލައިގައި ހުރި ޓޮމާޓޯ (ކިޔުބް ކޮށް ކޮށާފައި)

100 މލ ހެވީ ކްރީމް

2 މޭޒުމަތީ ސަމުސާ ބަޓަރ

1/2 މޭޒުމަތީ ސަމުސާ ފެނު ގްރީކް ފަތް (ހިއްކާފައި މުގުރާފައި)

ލޮނު

2 މޭޒުމަތީ ސަމުސާ ކޮރެއަންޑާ ފަތް (ގާނިޝް ކުރަން)

ތައްޔާރުކުރާނެ ގޮތް

1) ފުރަތަަމަ މުގުރި މިރުހާއި، ގަރަމް މަސާލާ އާއި ރީނދޫ ތައްޓެއްގެ ތެރޭގައި އެކުލަވާލާށެވެ. އަދި އޮލިވް އޮއިލް ފޮދާއި ލުނބޯ ހުތްވެސް އެހެން ވަކި ތައްޓެއްގައި އެކުލަވާލާށެވެ. ދެން ގަރަމް މަސާލާ މިކްސްގެ 1 1/2 މޭޒުމަތީ ސަމުސަލާއި ލުނބޯހުތް/އޮލިވް އޮއިލް މިކްސް، އާއި ސައިސަމުސަލެއްގެ ލޮނާއި ޔޯގަޓް ކޮށާފައި ހުރި ކުކުޅު ތެރެއަށް އަޅާލުމަށްފަހު ރަނގަޅަށް އެކުލަވާލާށެވެ. ދެން މެރިނޭޓް ކުރުމަށް ފްރިޖުގައި ގާތްގަނޑަކަށް 2 ގަޑިއިރު ވަންދެން ބަހަށްޓާށެވެ.

2) މެރިނޭޓް ވުމުން، ބަޓަރ ޗިކަން ތައްޔާރުކުރާ ތަވާއަށް ގީ ކޮޅު އަޅައި އެ ދިޔާ ވުމުން މެރިނޭޓްކުރި ކުކުޅު ކޮޅު އެއަށް އަޅައި ރޯފިލަންދެން ފްރައި ކޮށްލާށެވެ.

3) ދެން ކުކުޅު ކޮޅު ތަވައިން ނެގުމަށްފަހު، އެ ތަވައަށް ފިޔާ އަޅައި ކުޑަކޮށް ފްރައިކޮށްލުމަށްފަހު، ޓޮމާޓޯ ޕޭސްޓް، އިނގުރު އަދި ލޮނުމެދު ޕޭސްޓް އަދި ކުރިން ތައްޔާރުކުރި ގަރަމް މަސާލާ މިކްސްގެ މޭޒުމަތީ ސަމުސަލެއް އެޅުމަށްފަހު ރަނގަޅަށް އެކުލަވާލާށެވެ.

4) އެތަކެތި ރަނގަޅަށް ފްރައި ވެލުމުން ކެޝޫ ނަޓް ކޮޅު އަޅައި ރަނގަޅަށް އެކުލަވާލުމަށްފަހު، ޓޮމާޓޯތައްވެސް އަލައި ރަނގަޅަށް ފްރައި ކޮށްލާށެވެ. ބޭނުންނަމަ ކުޑަ ފެން ފޮދެއްވެސް އަޅަލެވިދާނެއެވެ. ދެން ހެވީ ކްރީމް ފޮދުވެސް އަޅައި އެކުލަވާލުމަށއފަހު އުނދުން ނިއްވާލާށެވެ.

5) ދެން އެތަކެތި ހިހޫ ވުމުން މިކްސަރުން ރަނގަޅަށް މުގުރާލައި ގްރޭވީ ތައްޔާރުކޮށްލާށެވެ.

6) އެއަފަހު، ގްރޭވީ އަލުން ތަވައަށް ފުރާނާލުމަށްފަހު 2 މޭޒުމަތީ ސަމުސާ ބަޓަރ އެއަށ އެޅުމަށްފަހު ކުކުޅު ވެސް އަޅާލައި، މަޑު ގިނީގައި 20 ވަރަކަށް މިނެޓް ވަންދެން ކައްކާލާށެވެ.

7) ދެން ލޮނު ހެޔޮވަރު ކޮށްލުމަށްފަހު، އިތުރަސް ގަރަމް މަސާލާ މިކްސް އަޅަން ބޭނުން ނަމަ އެޅުމަށްފަހު ކައްކާލުމަށްފަހު އުނދުން ނިންވާލާށެވެ. ފަހު ކަމަކަށް ފެނު ގްރީކް ފަތް ކޮޅާއި ކޮރިއެންޑާ ފަތް އޭގެ މައްޗަށް އަޅާލާށެވެ.