ޗައިނާގެ ޓިބެޓުގައި ބޮޑު ބިންހެލުމެއް: މަރުވި މީހުންގެ އަދަދު 32 އަށް އަރައިފި

ޓިބެޓުގެ އުތުރުގައި އޮންނަ ހިމާލަޔާ ފަރުބަދަ ސަރަޙައްދުގައި ބޮޑު ބިންހެލުމެއް އައިސް، މިހާތަނަށް 32 މީހުން މަރުވެފައިވާ ކަމަށް ޗައިނާގެ އިދާރާތަކުން ބުނެފިއެވެ. މި ބިންހެލުމުގެ އަސަރު ނޭޕާލް، ބޫޓާން އަދި އިންޑިއާއަށްވެސް ކޮށްފައިވާ ކަމަށް ވަނީ ރިޕޯޓުކޮށްފައެވެ.

ޗައިނާގެ ބިންހެލުމާބެހޭ މަރުކަޒުން ބުނިގޮތުގައި މި ބިންހެލުމުގެ ބާރުމިން 6.8 މެގްނެޓިޔުޑަށް އަރައެވެ. ނަމަވެސް އެމެރިކާގެ ޖިއޮލޮޖިކަލް ސަރވޭއިން ބުނެފައިވަނީ މި ބިންހެލުމުގެ ބާރުމިން ހުރީ 7.1 ގައި ކަމަށެވެ.

ބިންހެލުމުގެ ސަބަބުން 32 މީހުން މަރުވެ، 38 މީހުންނަށް އަނިޔާވެފައިވާ ކަމަށް ޗައިނާގެ ޝިންހުއާ ނިއުސް އޭޖެންސީން ވަނީ ރިޕޯޓުކޮށްފައެވެ.

މި ބިންހެލުމުގެ އަސަރު ޓިބެޓުގެ ޝިގަޓްސޭ ސަރަޙައްދަށް ވަރަށް ބޮޑަށް ކޮށްފައިވެއެވެ. މި ސަރަޙައްދުގައި 800،000 އާބާދީއެއް ދިރިއުޅެއެވެ.

ބިންހެލުމާ ގުޅިގެން ގިނަ އަދަދެއްގެ އާފްޓަރ ޝޮކްތަކެއް އައިސްފައިވާ ކަމަށާއި، އޭގެ ތެރެއިން އެންމެ ބޮޑު އާފްޓަރ ޝޮކްގެ ބާރުމިން ހުރީ 4.4 ގައި ކަމަށް ވަނީ ބުނެފައެވެ. ބިންހެލުމުގެ ސަބަބުން ލަހަޓްސޭ ރަށުގެ ފިހާރަތަކަށް ބޮޑެތި ގެއްލުންތަކެއް ލިބި، ފުނޑުފުނޑުވެފައިވާ މަންޒަރު ސޯޝަލް މީޑިއާގައި ދައުރުވަމުންދާ ވީޑިއޯ ތަކުން ފެނެއެވެ.

މި ބިންހެލުމުގެ އަސަރު ނޭޕާލްގެ ވެރިރަށް ކަޓްމަންޑޫއަށްވެސް ކުރިއެވެ. އަދި އެތަނުގައި ތިބި މީހުން ބިރުން ގޭގެއިން ނުކުތް ކަމަށް ވަނީ ރިޕޯޓުކޮށްފައެވެ. މީގެ އިތުރުން ބޫޓާންގެ ވެރިރަށް ތިމްޕޫ އާއި އިންޑިއާގެ ބިހާރު ސްޓޭޓުގައިވެސް ބިންހެލުމުގެ އަސަރު ކޮށްފައިވާ ކަމަށް ވަނީ ބުނެފައެވެ. ނަމަވެސް އިންޑިއާގައި އެއްވެސް ގެއްލުމެއް ލިބުނު ކަމަކަށް މިހާތަނަށް ރިޕޯޓެއް ނުކުރެއެވެ.

ޗައިނާގެ ދެކުނު ހުޅަނގު ސަރަޙައްދާއި، ނޭޕާލް އަދި އިންޑިއާގެ އުތުރު ސަރަޙައްދުތަކުގައި ބިންހެލުން އާންމުކޮށް އަންނަ ކަމަށް ސައިންޓިސްޓުން ބުނެއެވެ. މިއީ އިންޑިއަން އަދި ޔޫރޭޝިއަން ޓެކްޓޮނިކް ޕްލޭޓްތައް ޖެހުމުގެ ސަބަބުން ކަމަށް ވެއެވެ.

2008 ވަނަ އަހަރު ޗައިނާގެ ސިޗުއާން ޕްރޮވިންސްގައި އައި ބޮޑު ބިންހެލުމެއްގައި 70،000 އާ ގާތްކުރާ އަދަދެއްގެ މީހުން މަރުވިއެވެ. އަދި 2015 ވަނަ އަހަރު ނޭޕާލްގެ ކަޓްމަންޑޫ ކައިރީގައި އައި 7.8 ގެ ބިންހެލުމެއްގައި 9،000 އެއްހާ މީހުން މަރުވެ، ހާހުން ގުނާލެވޭ އަދަދެއްގެ މީހުންނަށް އަނިޔާވިއެވެ. މިއީ ނޭޕާލްގެ ތާރީޚުގައި އެންމެ ނުރައްކާތެރި ބިންހެލުން ކަމަށް ބެލެވެއެވެ.