ވައުދުވީ ގޮތަށް މިއަހަރު ނިމުމުގެ ކުރިން އައްޑޫ ބްރިޖްގެ މަސައްކަތް ފަށާނަން: ރައީސް މުޢިއްޒު

ހުޅުދޫ އަށް މިއަހަރު ވައުދުވެވަޑައިގެން ފަދައިން މިއަހަރު ނިމުމުގެ ކުރިން އައްޑޫ ބްރިޖްގެ މަސައްކަތް ފައްޓަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މަޖިލިސް އިންތިހާބުގައި ޕީޕީއެމް/ޕީއެންސީ ޓިކެޓްގައި އައްޑޫ ހުޅުދޫއަށް ވާދަކުރައްވާ ކެންޑިޑޭޓު މުޙައްމަދު ޝާހިދުގެ ކެމްޕެއިން ޖަލްސާގައި ރޭގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ބްރިޖްގެ މަސައްކަތް މިހާރު ފަށާފައިވާ ކަމަށާއި، އެ މަސައްކަތްުގެ ފީސިބިލިޓީ މަސައްކަތް މިހާރު ނިމިފައިވާ ކަމަށެވެ. އަދި މިހާރު ކުރިއަށްދަނީ އެ މަސައްކަތާއި ގުޅިގެން ކުރެވުނު ސާވޭ ގެ މައްޗަށް ކުރަން ޖެހޭ އެކިކަހަލަ ހިސާބު ހެދުމާއި ފީސިބިލިޓީގެ ބާކީ ބައިކަން އެމަނިކުފާނު ފާހަގަކުރެއްވިއެވެ.

"އެކަން ނިންމާފައި އަޅުގަނޑުމެން ދާނީ އަމަލީ މަސައްކަތްކުރުމުގެ މަރުހަލާއަށް. އަަޅުގަނޑު ވައުދުވި ގޮތަށް 2024، މިއަހަރު ނިމުމުގެ ކުރިން އެބުރިޖުގެ މަސައްކަތް ފަށާނަން،"

ރައީސް މުއިއްޒު ވިދާޅުވިއެވެ.

ރޭގައި ވާހަކަފުޅު ދައްކަވަމުން ރައީސް މުއިއްޒު ވަނީ އިދިކޮޅު ފަރާތްތަކުން އައްޑޫ ބްރިޖް އާއި ބެހޭގޮތުން ދައްކަމުންދާ ބައެއް ވާހަކަތަކަށް ވެސް ރައްދު ދެއްވާފައެވެ.

އެގޮތުން އެމަނިކުފާނު ވިދާޅުވީ، ސިނަމާލެ ބްރިޖް އެޅި އިރުވެސް އިދިކޮޅުން ކިޔަމުންދިޔަ ފަދައިން މިހާރު ވެސް މިއީ ބޭކާރު ކަމެއް ކަމަށް ބުނަމުން އަންނަކަމަށެވެ. މިސަރުކާރަކީ ތަރައްގީ ފިކުރުގެ މަތީގައި ތިބި ބައެއް ކަމަށާއި މި ސަރުކާރަކީ ރައްޔިތުންނަށްޓަކައި ތަރައްގީ ގެނައުމަށް ބޭނުންވާ، ވައުދުފުއްދާ ބައެއް ކަމަށް ވެސް އެމަނިކުފާނު ވިދާޅުވިއެވެ.

"ދެން މިހާރު މިކިޔަނީ ހަމަ ކުރިން މިތާގައި އަޅަން ފެށިއިރު އެބައި މީހުން ކީގޮތަށް، މީ ވާނެ ކަމެއް ނޫނޭ. ބޭކާރު ކަމެކޭ. މީގެ އިންޖިނިއަރިން ކޮބައިހޭ، މިކަމަކަށް ފައިސާއެއް ނުލިބޭނޭ. މިކަހަލަ ވާހަކަ ރައްޔިތުން ޤަބޫލުނުކުރެއްވުން އެދެން،"

ރައީސް މުއިއްޒު ވިދާޅުވިއެވެ.

ރައީސް މުއިއްޒު ވިދާޅުވީ، އިދިކޮޅުން ބުނަމުން އަންނަފަދައިން މިއީ 30 ވަރަކަށް މީހުން ސައިކަލް ދުއްވާލަން އަޅާ ބްރިޖެއް ނޫން  ކަމަށާއި މިއީ މުޅި އައްޑޫ ސިޓީ އިގްތިޞާދީ ގޮތުންނާއި އިޖުތިމާއީ ގޮތުން އެތައް ހަރުފަތަކަށް ގެންގޮސްދޭނެ ބްރިޖެއް ކަމަށެވެ. އަދި މި ބްރިޖްގެ ސަބަބުން މުޅި ސިޓީ އާއި މުޅި ދެކުނަށް އެތައް ގުނައެއްގެ މައްޗަށް ތަރައްގީ ލިބިގެންދާނެކަން އެމަނިކުފާނު ފާހަގަކުރެއްވިއެވެ.