ބޭރުގެ ލީޑަރުންނަށް ކުޑައިމީސްކުރި ބޭފުޅުންނަށް ފިޔަވަޅު އަޅަން ފަސްނުޖެހޭނަން: ސަރުކާރު

ސޯޝަލް މީޑިއާގެ ޕްލެޓްފޯމްތަކުގައި ބޭރުގެ ލީޑަރުންނަށް ފުރައްސާރަކުރުން ސަރުކާރުން ކުށްވެރިކޮށްފިއެވެ.

ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ މީސް މީޑިއާގެ މަންސަ ތަކުގައި ބޭރުގެ ލީޑަރުންނާއި މަތީ ފަންތީގެ ފަރުދުންނާ ދެކޮޅަށް ދައްކާ ފުރައްސާރައިގެ ވާހަކަތައް ސަރުކާރަށް އެނގޭކަމަށާއި އެއީ އެ ވާހަކަ ދައްކަވާ ފަރާތް ތަކުގެ ޒާތީ ފިކުރު ތަކެއް ކަމަށްވާތީ އެއިން އެއްވެސް ވާހަކަ އަކުން ސަރުކާރުގެ ފިކުރެއް ތަމްސީލު ނުކުރާ ކަަމަށެވެ.

މީގެ އިތުރުންވެސް އެ މިނިސްޓްރީން ބުނީ ޚިޔާލުފާޅުކުރުމުގެ މިނިވަންކަން ބޭނުންކުރަންޖެހޭނީ ޑިމޮކްރެޓިކް އަދި ޒިންމާދާރު ގޮތެއްގައި ކަމަށާއި، ނަފްރަތާއި ރުޅިވެރިކަން ނުފެތުރޭ ގޮތަށް ކަމަށެވެ. އަދި މި ފަދަ ވާހަކަތައް ދައްކާއިރު މިއީ ރާއްޖެއާއި އެހެނިހެން ގައުމު ތަކާއި މެދު އޮންނަ ގުޅުމަށް ބުރޫ އަރާނެ ކަމެއްތޯ ވިސްނަން ޖެހޭ ކަަަމަށް ވެސް އެ މިނިސްޓްރީން ވަނީ ބުނެފައެވެ.

ފޮރިން މިނިސްޓްރީން ނެރުނު ބަޔާނުގައި ވަނީ މިފަދައިން ފުރައްސާރަކުރާ ފަރާތްތަކާމެދު ފިޔަވަޅު އެޅުމަށް ސަރުކާރުގެ ކަމާބެހޭ އިދާރާތަކުން ފަސްނުޖެހޭނެ ކަމަށެވެ.

އެ މިނިސްޓްރީން މިފަދައިން ބުނެފައި މިވަނީ އިންޑިއާގެ ބޮޑުވަޒީރު ނަރެންދްރަ މޯދީ ލަކްޝަދީޕަށް ކުރެއްވި ދަތުރުފުޅެއްގައި އެ ސަރަހައްދުގެ ޓޫރިޒަމް ޕްރޮމޯޓްކުރައްވައި އާންމު ކުރެއްވި ވީޑިއޯއަކަށް ރާއްޖޭގެ ދެ ޑެޕިއުޓީ މިނިސްޓަރަކު ފާޑު ވިދާޅުވި މައްސަލައަކާ އެކު ގިނަ ބައެއްގެ ފާޑު ކިޔުން އަމާޒުވެފައިވާ ދަނޑިވަޅެއްގައެވެ.

މި މައްސަލައާއި ގުޅިގެން ދެގައުމުގެ އެކި ފެންވަރުގެ މީހުންގެ މެދުގައި ބަހުގެ ހަމަލާތައް ބަދަލުކޮށްފައިވާއިރު ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރާ ގައުމު ކަމުގައިވާ އިންޑިއާގެ އެތައް ބަޔަކު އަންނަނީ ރާއްޖޭގެ ޓޫރިޒަމް ބޮއިކޮޓްކުރުމަށް ގޮވާލަމުންނެވެ.