މަނީ ލޯންޑަރިންގެ ތުހުމަތުގައި ގިނަޢަދަދެއްގެ ޑޮލަރާއެކު އިންޑިއާ ރައްޔިތަކު ހައްޔަރުކޮށްފި

މަނީ ލޯންޑަރިންގގެ ތުހުމަތުގައި ގިނަޢަދަދެއްގެ ޑޮލަރާއެކު އިންޑިއާ ރައްޔިތެއް ދިވެހިރާއްޖޭގައި ހައްޔަރުކޮށްފިއެވެ.

ކްރިމިނަލް ކޯޓުން މިއަދު ނެރުނު ބަންދު އަމުރެއްގައިވާ ގޮތުން، މި މައްސަލައިގައި ހައްޔަރުކޮށްފައިވަނީ އިންޑިއާއަށް ނިސްބަތްވާ 27 އަހަރުގެ ރަގޫބް ނިސްތާރު ހަލީމް ރަހުމާނެވެ.

ބަންދު އަމުރުގައި ފާހަގަކޮށްފައިވާ ގޮތުގައި، ރަހުމާނަކީ ގިނަ ފަހަރު ރާއްޖެއަށް އައުމަށްފަހު ޖެހިގެން އަންނަ ދުވަހު ފުރާ މީހެކެވެ. މި ފަހަރު އޭނާ ހައްޔަރުކުރެވުނީ ގިނަ އަދަދެއްގެ ޑޮލަރާ އެކުގައެވެ. އެ ފައިސާއަކީ އެހެން މީހަކު އޭނާއާ ހަވާލުކުރި އެއްޗެއްކަން އެނގޭ ލިޔެކިޔުންތަކެއް ފެނިފައިވާ ކަމަށް އަމުރުގައި ބަޔާންކޮށްފައިވެއެވެ. ނަމަވެސް، އެ ފައިސާ ހޯދާފައިވާ ގޮތެއް ރަހުމާނަށް ބުނެދެވިފައެއް ނުވެއެވެ.

ރަޙްމާނުގެ އަތުން ފެނުނީ ކިހާ ޑޮލަރެއް ކަމަށް ކޯޓު އަމުރުގައި ބުނެފައެއް ނުވެއެވެ.

މީގެ އިތުރުން، ރަހުމާނުގެ ޕާސްޕޯޓުން ނަން ބަދަލުކޮށްފައިވާކަން ވެސް ބަންދު އަމުރުގައި ފާހަގަކޮށްފައިވެއެވެ. އޭނާގެ ދަތުރުތައް ކޮށްފައިވާ ގޮތުން ޝައްކު އުފެދޭ ކަންތައްތަކެއް ހުރުމާއި، މަނީ ލޯންޑަރިންގ ފަދަ ޖިނާއީ ބޮޑެތި ކުށްތަކުގެ ތުހުމަތު ކުރެވޭތީ، ރަހުމާން 5 ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުކުރުމަށް ކޯޓުން އަމުރުކޮށްފައިވެއެވެ.