ވީއައިއޭގައި ނަން-ވިޒިބަލް ޑިސްއެބިލިޓީސް ހުންނަ ފަސިންޖަރުންނަށް ކާމް ރޫމް ހުޅުވައިފި
ލިޔުންތެރިޔާ
ސްޓާފް ރައިޓަރ
ނަން-ވިޒިބަލް ޑިސްއެބިލިޓީސް ހުންނަ ފަސިންޖަރުންނަށް ޚާއްސަކޮށްގެން ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގެ ޓާމިނަލް 1 ގައި "ބޮލި" ނަމުގައި ކާމް ރޫމެއް މިއަދު ހުޅުވައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) ގެ އިޖުތިމާޢީ ޒިންމާގެ ދަށުން ހުޅުވި މި ކާމް ރޫމް ރަސްމީކޮށް ހުޅުއްވައިދެއްވީ އެމް.އޭ.ސީ.އެލްގެ ސީއީއޯ އަދި މެނޭޖިންގ ޑިރެކްޓަރު އިބްރާހީމް ޝަރީފް މުޙައްމަދެވެ. ޓާމިނަލް 1 ގައި ބޭއްވި މި ހަފުލާގައި މޯލްޑިވްސް އޯޓިޒަމް އެސޯސިއޭޝަން އޯޓިޒަމް ކެއާ މޯލްޑިވްސް އަދި އެ ކުންފުނީގެ އިސްވެރިން ބައިވެރިވެވަޑައިގެންނެވިއެވެ.
ދުނިޔޭގެ އެހެނިހެން އެއަރޕޯޓުތަކުގައި ހިންގާ މިފަދަ ޕްރޮގްރާމްތަކާ އެއްގޮތަށް ފަރުމާކޮށްފައިވާ މި ކާމް ރޫމަކީ އެއަރޕޯޓުގެ މާހައުލުގެ ސަބަބުން ނަން-ވިޒިބަލް ޑިސްއެބިލިޓީސް ހުންނަ ފަސިންޖަރުންނަށް އުފެދޭ ނުތަނަވަސްކަން ކުޑަކޮށް ހިތްހަމަޖެހުން ލިބޭނެ ގޮތަށް ސެންސަރީ ވަސީލަތްތައް ޤާއިމްކޮށްފައިވާ ތަނެއް ކަމަށް އެ ކުންފުނިން ބުނެފައިވެއެވެ. މި ކާމް ރޫމްގައި ތަފާތު ސެންސަރީ އައިޓަމްތަކާއި އެކްޓިވިޓީސްތައް ހަމަޖެހިފައި ހުންނައިރު ފަސިންޖަރާ އެކު އަންނަ ބެލެނެވެރިއަކަށް މަޑުކޮށްލައިގެން ތިބެވޭނެ އިންތިޒާމުވެސް ހަމަޖެހިފައިވެއެވެ.
މީގެ އިތުރުން މި ޚިދުމަތަށް އެދޭ ފަރާތްތަކަށް ޚާއްސަ ލެންޔާޑަކާ އެކު ކާޑެއް ލިބޭނެ ކަމަށް އެ ކުންފުނިން ބުނެފައިވެއެވެ. އެ ލެންޔާޑުގެ ސަބަބުން ޚާއްސަ އެހީތެރިކަން ބޭނުންވާ ފަސިންޖަރެއްކަން ދެނެގަންނަން ފަސޭހަވެ އަވަސް ޚިދުމަތް ފޯރުކޮށްދެވޭނެއެވެ.
އެ ކުންފުނީގެ އަމާޒަކީ ވީއައިއޭއިން ފޯރުކޮށްދޭ ހުރިހާ ޚިދުމަތްތަކަކީ ކޮންމެ ފަސިންޖަރަކަށްވެސް ފަސޭހަކަމާ އެކު ބޭނުންކުރެވޭ ފެންވަރު ރަނގަޅު ޚިދުމަތްތަކަކަށް ހެދުން ކަމަށް އެ ކުންފުނިން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
