މުސްލިމުންގެ ހައްގުތައް ހިމާޔަތްކޮށްދިނުމަށް އޯއައިސީން އިންޑިއާ އަށް ގޮވާލައިފި

އިންޑިއާގެ މުސްލިމުގެ ހައްގުތައް، ހިމާޔަތްކޮށްދިނުމަށް ދުނިޔޭގެ އިސްލާމީ ގައުމުތަކުގެ އެންމެ ބޮޑު ޖަމިއްޔާ، އޮގަނައިޒޭޝަން އޮފް ދި އިސްލާމިކް ކޯޕަރޭޝަން (އޯއައިސީ) އިން އިންޑިއާ ސަރުކާރަށް ގޮވައިލައިފިއެވެ.

އޯއައިސީން މިހެން ގޮވާލައިފައި މިވަނީ އިންޑިއާއިން ރަށްވެހިކަމުގެ ގާނޫނަށް ގެނައި އިސްލާހުގައި އެގައުމަށް ގަވާއިދާ ހިލާފަށް އެތެރެވާ އަފްޣާނިސްތާން، ޕާކިސްތާން އަދި ބަންގުލަދޭޝްގެ މުސްލިމު ނޫން މީހުންނަށް ރަށްވެހިކަން ލިބޭނެ ގޮތަށް ހިމަނާފައި އޮތުމުންނެވެ.

މިގާނޫނާ ދެކޮޅަށް އިންޑިއާގެ އެކި ސްޓޭޓުތަކުގައި ދަނީ މުޒާހަރާތައް ކުރަމުންނެވެ. މުޒަހަރާގައި މިހާތަނަށް 23 މީހަކު ވަނީ މަރުވެފައެވެ.

އޯއައިސީ އިން މިއަދު ނެރުނު ބަޔާނެއްގައިވަނީ، އިންޑިއާގައި ބައިމަދު މުސްލިމުންށް ކުރިމަތިވަމުންދާ ކަންތައްތައް ވަރަށް ގާތުން އެ ޖަމިއްޔާއިން ބަލަމުންދާކަމަށެވެ. އަދި މުސްލިމުންގެ ހައްޤު ގެއްލޭގޮތަށް އިންޑިއާއިން ރަށްވެހިކަމުގެ ގާނޫނަށް ގެނައި އިސްލާހާއި ބާބްރީ މިސްކިތުގެ މައްސަލައިގައި ނިންމާފައިވާ ނިންމުމާއި މެދު އޯއައިސީ އިން އިންތިހާއަށް ކަންބޮޑުވާކަމަށް އެ ބަޔާނުގައިވެއެވެ.

މީގެ އިތުރުން އޯއައިސީގެ ބަޔާނުގައި ވަނީ އދ.ގެ ޗާޓަރުގައި ކަނޑައަޅާފައިވާ އަސާސްތަކާއި ހިލާފަށް ހިންގާ ކަންތައްތަކަކީ ސުލްހަމަސަލަސްކަން ގެއްލުމަށް މަގުފަހިވެ، އިތުރު ހަމަނުޖެހުންތަކެއް އުފެދޭނެ ކަމެއްކަން ފާހަގަކޮށްފައެވެ.