ހިދުމަތް ދިނުމުގައި އެއީ ކޮން ސިޔާސީ ވިސްނުމެއްގައި ހުރި މީހެއްތޯއެއް ނުބަލާނަން: ރައީސް ޑރ.މުޢިއްޒު

ހިދުމަތް ފޯރުކޮށްދިނުމުގައި އެމީހަކީ ކޮންކަހަލަ ސިޔާސީ ވިސްނުމެއްގައި ހުރި މީހެއްތޯ ނުބައްލަވާނެ ކަމަށާއި، ބޭނުންފުޅުވަނީ ހުރިހާ ރައްޔިތުންނަށް ހަމަހަމަކަމާ އެކު ހިދުމަތް ދެއްވަން ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު ފ އަތޮޅަށް ކުރައްވަމުންގެންދަވާ ދަތުރުފުޅުގައި އެ އަތޮޅު ނިލަންދޫ އަށް ވަޑައިގެން ވާހަކަފުޅު ދައްކަވަމުން އެމަނިކުފާނު މިފަދައިން ވިދާޅުވީ، ޕީއެންސީގެ ފަރާތުން ޅ. ހިންނަވަރު ދާއިރާއަށް ވާދަކުރާ ކެންޑިޑޭޓުގެ ކެމްޕޭން ޖަލްސާއެއްގައި ސަރުކާރު މުވައްޒަފުންނާއި ވަކިން ހާއްސަކޮށް ފެލިވަރު ކާރުހާނާގައި މަސައްކަތްކުރާ މުވައްޒަފުން 'ކޮންޓްރޯލް' ކޮށް އެއްބާރުލުން ނުދީފި ނަމަ އެ މީހުންނާ މެދު ފިޔަވަޅު އަޅަން ގޮވާލާ ވީޑިއޯއެއް މީސް މީޑިއާގައި ފެންމަތިވުމާއި ގުޅިގެން އެކަމަށް އިޝާރާތްކުރައްވައެވެ.

މިގޮތުން ރައީސް ޑރ.މުޢިއްޒު ވިދާޅުވީ، ކޮންމެ ސިޔާސީ ވިސްނުމެއްގައި ހުއްޓަސް އެމީހަކު ހަމަހަމަވާނެކަމަށާއި، ހިދުމަތް ދިނުމުގައި ސިޔާސީ ފިކުރަށް ނުބަލާއިރު، އެއީ އެއްވެސް ހާލެއްގައި އެމަނިކުފާނުގެ އަދި އެމަނިކުފާނުގެ ޕާޓީން ވެސް ގެންގުޅޭ ވިސްނުމެއް ނޫން ކަމަށެވެ.

"ކޮންމެ ސިޔާސީ ވިސްނުމެއްގައި ހުއްޓަސް ހަމަހަމަވާނެ. އެމީހަކު ހުރި މަގާމެއް އެމީހަކު އެއީ ސިޔާސީ ކޮން ވިސްނުމެއްގައި ހުރި މީހެއްތޯއެއް ނުބަލާނަން. އެމީހަކަށް ދޭން ޖެހޭ ހިދުމަތެއް ދިނުމުގައެއް،"

ރައީސް ޑރ.މުޢިއްޒު ވިދާޅުވިއެވެ.

ސިޔާސީ ފޯރީގައި ނުވަތަ  ޖަޒުބާތެއްގައި ވިޔަސް މި ގޮތަށް މިހާ ސާފުކޮށް އޮތް ސިޔާސަތަކާއި ދެކޮޅަށް، ހިލާފުވާ ގޮތަށް ވާހަކަ ދެއްކުމަކީ ހިތާމަކުރައްވާ ކަމެއްކަން ފާހަގަކުރައްވާ އެމަނިކުފާނު ވިދާޅުވީ، ސިޔާސީ ވިސްނުމެއްގެ ސަބަބުން ރައްޔިތުންގެ ވަޒީފާއަށް އެއްވެސް ނުރައްކަލެއް ނާންނާނެ ކަމަށެވެ.

މީގެ އިތުރުންވެސް ރައީސް ޑރ.މުޢިއްޒު ވިދާޅުވީ، ހަގީގީ މާނާގައި ހަމަޖެހުން ގެނެވޭނީ އެފަދަ ކަންތަކުން ދުރުވެގެން ކަމަށްވާއިރު، ސިޔާސީ ގޮތުން ހިޔާލު ތަފާތު މީހުން ޖަލަށް ލުމަކީ އެމަނިކުފާނު ކުރައްވާނެ ކަމެއް ނޫން ކަމަށާއި ސިޔާސީ ގޮތުން ވާހަކައެއް ދައްކައިގެން މީގެ ކުރިން ފުލުސް އޮފީހަށް ގެންދިޔަ ނަމަވެސް މިހާރު އެމަންޒަރު ނުފެންނާނެ ކަމަށެވެ.