މި އަހަރު މިހާތަނަށް 1,300 އަށްވުރެ ގިނަ ކުށް ފުލުހުންނަށް ރިޕޯޓްކޮށްފައިވޭ
މި އަހަރުގެ މިހާތަނަށް ޖުމުލަ 1،345 ކުށުގެ މައްސަލަ ރިޕޯޓުކޮށްފައިވާ ކަމަށް ދިވެހި ފުލުހުންގެ ހިދުމަތުން އާންމުކޮށްފައިވާ 2026 ވަނަ އަހަރުގެ ކުށުގެ ތަފާސްހިސާބުތަކުން ދައްކައިފިއެވެ.
މި ހިސާބުތަކުން ހާމަވާގޮތުގައި، އެންމެ ގިނައިން ރިޕޯޓްކޮށްފައިވަނީ މަގުމަތީގެ އެކްސިޑެންޓްތަކާއި ވައްކަމުގެ މައްސަލަތަކެވެ. މިއީ މުޅި ރާއްޖޭގެ އާންމު ރައްކާތެރިކަމަށް ކުރިމަތިވެފައިވާ ބޮޑު ގޮންޖެހުމެއްކަން މި ތަފާސްހިސާބުތަކުން ފާހަގަކުރެވެއެވެ.
ލިސްޓުގެ އެންމެ ކުރީގައި އުޅެނީ މަގުމަތީގެ އެކްސިޑެންޓްތަކެވެ. އެގޮތުން 383 މައްސަލަ ރިޕޯޓްކޮށްފައިވާއިރު، މިއީ ރިޕޯޓްކުރެވުނު ހުރިހާ މައްސަލަތަކުގެ 28.4 އިންސައްތައެވެ. ވައްކަމުގެ މައްސަލަތައް ދެވަނައިގައި އުޅޭއިރު، 362 މައްސަލައެއް ވަނީ ހުށަހަޅާފައެވެ. މިއީ ޖުމްލަ ކުށްތަކުގެ 26.9 އިންސައްތައެވެ.
މަސްތުވާތަކެއްޗާ ގުޅުންހުރި މައްސަލަތަކުގެ ގޮތުގައި 222 މައްސަލަ ރިޕޯޓްކޮށްފައިވެއެވެ. މީގެ އިތުރުން، ތަކެތި ގެއްލިގެން 130 މައްސަލަވެސް ހުށަހަޅާފައިވެއެވެ.
އެހެނިހެން ދާއިރާތަކަށް ބަލާއިރު، މާރާމާރީގެ 70 މައްސަލައާއި، މުދަލަށް ގެއްލުންދިނުމުގެ 69 މައްސަލަ ވަނީ ރިޕޯޓްކޮށްފައެވެ. އަދި ގެވެށި އަނިޔާގެ 42 މައްސަލައެއް ހުށަހަޅާފައިވާއިރު، މިއީ ގާނޫނު ތަންފީޒުކުރާ އިދާރާތަކާއި އިޖުތިމާއީ ހިދުމަތްދޭ ފަރާތްތަކުން ހާއްސަ ސަމާލުކަމެއް ދޭންޖެހިފައިވާ ދާއިރާއެކެވެ.
ނިސްބަތުން މަދު ނަމަވެސް، ސީރިއަސް މައްސަލަތަކުގެ ތެރޭގައި ހިމެނޭ ހިޔާނާތުގެ 26 މައްސަލައަކާއި، ޖިންސީ ކުށްތަކުގެ 16 މައްސަލައަކާއި، ފޭރުމުގެ 15 މައްސަލައެއްގެ އިތުރުން މަކަރާއި ހީލަތް ނުވަތަ ލިޔެކިޔުން ބަދަލުކުރުމުގެ 8 މައްސަލައެއް ވަނީ ރިޕޯޓްކޮށްފައެވެ.
ކުށުގެ ވެށިން ރައްކާތެރި ތަނަކަށް ދިވެހި މުޖުތަމައު ހެދުމަށް ފުލުހުން އަންނަނިީ މުހިންމު މަސައްކަތްތަކެއް ކުރަމުންނެވެ. އަދި ކުއްތަކާއިމެދު އާންމު ރައްޔިތުން އިތުރަށް ސަމާލުވުމަށާއި، މަގުމަތީގެ ގަވާއިދުތަކަށް ބޯލެނބުމަށާއި، ކުށުގެ އަމަލެއް ހިނގާކަމަށް ޝައްކުކުރެވޭނަމަ ލަސްނުކޮށް ރިޕޯޓްކުރުމަށް ވެސް ފުލުހުން ވަނީ އިލްތިމާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
