އިންޑިޔާގައި އަނެއްކާވެސް ބާރުގަދަ ގޮވުމެއް - 9 މީހުން މަރު

ކަޝްމީރުގައި ހުރި ފުލުހުންގެ މަރުކަޒެއްގައި ބާރުގަދަ ގޮވުމެއް ގޮވައި ނުވަ މީހުން މަރުވެއްޖެއެވެ.

އިންޑިއާ ފުލުހުން މައުލޫމާދުދިންކަމަށް ބުނެ، އެ ޤައުމުގެ ބައެއް މީޑިއާތަކުން ބުނެފައިވަނީ މި ހާދިސާގައި ގޮވާފައި ވަނީ، އެކި އޮޕަރޭޝަންތަކުގައި ހޯދައި، ފުލުހުންގެ ބެލުމުގެ ދަށަށް ގެންގޮސްފައިވާ ގޮވާތަކެތި ކަމަށެވެ.

މި ގޮވުމުގެ ސަބަބުން 29 މީހުންނަށް އެކި ވަރުގެ ޒަޚަމްތައް ލިބިފައިވެއެވެ. އަދި ބައެއް މީހުންގެ ހާލު ސީރިޔަސް ކަމަށް ގައުމުގެ ފުލުހުން މައުލޫމާތުދެއެވެ.

ކަޝްމީރު ފުލުހުންގެ މަޞްދަރުތަކުން ބުނީ، މި ހާދިސާ ހިނގާފައި ވަނީ، ފޮރެންސިކް އޮފިޝަލުންތަކެއް ގޮވާތަކެތި ބަލައި، ތަޙުޤީޤު ކުރަމުން ދަނިކޮށެވެ. އެހެންކަމުން މި ގޮވުމުގައި މަރުވި 9 މީހުންގެ ތެރޭގައި ގިނައީ ފުލުހުންނާއި ފޮރެންސިކް ދާއިރާގެ އޮފިޝަލުންނެވެ.

މި ހާދިސާގައި މަރުވި ގިނަ ބަޔެއްގެ ހަށިތައް ވަނީ ވަރަށް ބޮޑަށް ފިހިފައެވެ. އެހެންކަމުން، އެއީ ކޮން ބައެއް ކަން ދެނެގަތުމުގައި ހުރަސްތަކެއް ކުރިމަތިވެފައިވާ ކަމަށާޢި، ނަމަވެސް އެ މަސައްކަތް މިހާރު ކުރަމުންދާ ކަމުގައި މައުލޫމާތު ލިބެއެވެ. ބައެއް މީހުންގެ ހަށިގަނޑުގެ ބައެއް ގުނަވަންތައް ފެނުނީ 100 އާއި 200 މީޓަރު ދުރުގައި ހުރި ގެތައް ކައިރިން ކަމަށް ރިޕޯޓުކުރެވިފައިވެއެވެ.

އިންޑިޔާގެ ފުލުހުން މިހާރު ދަނީ މި ހާދިސާ ތަޙުޤީޤު ކުރަމުންނެވެ.

މި ހާދިސާ ހިނގާފައި މި ވަނީ ދާދިފަހުން އިންޑިޔާގެ ވެރިރަށް ނިއު ދިއްލީގެ ތާރީޚީ ބިނާއެއްކަމަށްވާ، ރެޑް ފޯޓް ކައިރީގައި ކާރެއް ގޮއްވާލުމުގެ ހާދިސާއެއް ހިނގާފައިވަނިކޮށެވެ.