އެމްޑީޕީން މަސައްކަތްކުރާނީ އިމުގެ ތެރެއިން ސަރުކާރު ޖަވާބުދާރީ ކުރުވަން: ފައްޔާޒް
ލިޔުންތެރިޔާ
އަބްދުﷲ ހުސައިން
އެމްޑީޕީން މަސައްކަތްކުރާނީ ޤާނޫނީ އިމުގެ ތެރެއިން ސަރުކާރު ޖަވާބުދާރީ ކުރުވަންކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.
އެމްޑީޕީން މާދަމާރޭ "ގާނޫނު އަސާސީގެ ދިފާއުގައި" ކާނިވާ ސަރަހައްދުގައި ބޭއްވުމަށް ތައްޔާރުވަމުންދާ ބޮޑު ޖަލްސާ އާ ގުޅޭގޮތުން ނޫސްވެރިންނަށް މައުލޫމާތު ހިއްސާކުރަމުން ފައްޔާޒް ވިދާޅުވީ، އެމްޑީޕީން ސަރުކާރު ޖަވާބުދާރީޫ ކުރުވާނީ ޤާނޫނު އަސާސީގެ އިމުގެ ތެރެއިންކަމަށާއި، ސަރުކާރު ޖަވާބުދާރީ ކުރުވުމަށް މިފަދަ ބޮޑު ޖަލްސާއެއް ބާއްވަން ޖެހުނީ ސަރުކާރުން ކަންކަން ކުރަމުންދާ ގޮތުންކަމަށެވެ. މިގޮތުން އެމްޑީޕީން ޖަލްސާ ކުރިއަށްގެންދަނީ ޤާނޫނު އަސާސީން ލިބިދޭ ހައްގުތަކުގެ ތެރެއިން ސިޔާސީޕާޓީތަކަށް ސިޔާސީ ޕާޓީތަކަށް ސިޔާސީ ހަރަކާތްތައް ހިންގުމަށް އޮތް ޖާގައިގެ ތެރެއިން ކަމަށެވެ.
މިފަދަ ޖަލްސާއެއް ބޭއްވުމަށް ނިންމީ ސަރުކާރުން ކަންކަން ކުރަމުންގެންދާ ގޮތް ގޯސްވެގެން ގޮސް ގައުމު ފުނޑުފުނޑުވާތަން ފެންނާތީކަމަށް ފައްޔާޒް ވިދާޅުވިއެވެ. މިއަދު ފެނިގެން މިދަނީ ސަރުކާރުން ރައްޔިތުންގެ ބާރުތައް ކަނޑުވާލަމުންދާތަން ކަމަށާއި، މިއަދު ފެންނަމުންދަނީ ރައްޔިތުން ނިކަމެތިވަމުންދާތަން ކަމަށެވެ.
ފައްޔާޒް ވިދާޅުވީ މިއީ އެމްޑީޕީން އެކަނި ދައްކަމުންދާ ވާހަކައެއް ނޫންކަމަށާއި ރައްޔިތުންވެސް މިއަދު މިވާހަކަތައް ދައްކަމުންދާކަމަށެވެ. މިއީ އެމްޑީޕީން މިދިޔަ ރިޔާސީ އިންތިހާބާ ހިސާބުންވެސް ދައްކަމުން އައި ވާހަކަކަން ފާހަގަކުރައްވައި ފައްޔާޒް ވިދާޅުވީ މިއަދު އެވާހަކަ ދައްކަނީ ޖުމްލަ ގޮތެއްގައި ހުރިހާ ރައްޔިތުން ކަމަށެވެ.
ފައްޔާޒު ވިދާޅުވީ ރައްޔިތުންނަށް އަނިޔާވެރިވެގެން ލިބޭނެ މޮޅުތަކެއް ނޯންނާނެ ކަމަށާއި އެކަން ތާރީހުން ވަރަށް ރަނގަޅަށް އެނގޭކަމަށެވެ.
އެމްޑީޕީގެ ޖަލްސާއާ ގުޅޭގޮތުން އިލެކްޝަނުން ސިޓީއެއް ފޮނުވާފައިވާކަން ފާހަގަކުރަމުން ފައްޔާޒު ވިދާޅުވީ އެއީ ކޮން ސަބަބަކާހެދި ފޮނުވި ސިޓީއެއްތޯ ސާފުކުރާނޭ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
