ފޮރިން މިނިސްޓްރީން ކޮންމެ ދުވަހު އިންޑިއާގެ އެހީގެ ހަބަރު ގެނެސްދޭ ސަބަބު ބަޔާންކޮށްދީފި

އިންޑިއާގެ ބޮޑު ވަޒީރު ނަރެންދްރަ މޯދީ ރާއްޖެ ދަތުރު ކުރައްވަން ނިންމެވި ހިސާބުން ރާއްޖޭގައި އިންޑިއާގެ އެހީގައި ކުރާނެ ޕްރޮޖެކްޓްގެ ހަބަރު ކޮންމެ ދުވަހަކު ފޮރިން މިނިސްޓްރީން ދަނީ ގެނެސް ދެމުންނެވެ.

އެގޮތުން ރާއްޖޭގެ އިޖްތިމާއީ-އިޤްތިޞާދީ ތަރައްގީއަށް ބޭނުންވާ ޕްރޮޖެކްޓުތައް ހިންގުމަށް އިންޑިއާ ސަރުކާރުން ދިވެހި ރާއްޖެއަށް ދެއްވާފައިވާ 100 މިލިއަން ދިވެހި ރުފިޔާގެ ހިލޭ އެހީގެ ތެރެއިން މިހާތަނަށް ރާއްޖޭގެ އެކި ކަންކޮޅުތަކުގައި ހިންގުމަށް އަންނަނީ ތަފާތު ޕްރޮޖެކްޓްތަކެއް އިއުލާންކުރައްވަމުންނެވެ. ކޮންމެ ދުވަހު ފޮރިން މިނިސްޓްރީން އިންޑިއާގެ ޕްރޮޖެކްޓެއްގެ އިއުލާންކުރުމުން ގިނަ ބަޔަކު ވަނީ މިއީ އިންޑިއާގެ ބޮޑުވަޒީރު ރާއްޖެ ކުރައްވާ ދަތުރުފުޅުގެ ޕީއާރ ރަނގަޅުކުރުމަށް މިނިސްޓްރީން ކުރަމުން އަންނަކަމެއްކަމަށް ބުނެ ތުހުމަތު ކުރައްވަމުންނެވެ.

އެކަމާ ބެހޭގޮތުން ނޫސްވެރިން ކުރި ސުވާލަށް ޖަވާބު ދެއްވަމުން ފޮރިން މިނިސްޓްރީގެ ކޮމިއުނިކޭޝަން ޑިރެކްޓަރ މިއުވާން މުހައްމަދު ވިދާޅުވިގޮތުގައި ޕްރޮޖެކްޓްތައް އިއުލާން ކުރަމުންދަނީ ޕްރޮޖެކްޓްތައް ފައިނަލް ވާ މިންވަރުން ކަމަށެވެ.

އެހެންކަމުން އިންޑިއާއިން ޕްރޮޖެކްޓްތައް ފައިނަލް ކުރަމުންދަނީ މޯދީ ރާއްޖެ ވަޑައިގަންނަވާ ދުވަހާ ދިމާވާގޮތައް ކޮންމެ ދުވަހަކަށް ފްރޮޖެކްޓްތައް ބަހާލައިގެން ކަން ފާހަގަކޮށްލަންޖެއެވެ.

އިޖްތިމާއީ-އިޤްތިޞާދީ ތަރައްގީއަށް ބޭނުންވާ ޕްރޮޖެކްޓުތައް ހިންގުމަށްޓަކައި އިންޑިއާ ސަރުކާރުން ހިލޭ އެހީ ރާއްޖެއަށް ދިނުމަށް އެއްބަސްވީ މި އަހަރުގެ މާރިޗް މަހު 17 އިން 18 އަށް އިންޑިއާގެ މިނިސްޓަރ އޮފް އެކްސްޓާރނަލް އެފެއާޒް ހަރ އެކްސަލަންސީ ސުޝްމާ ސްވަރާޖް ރާއްޖެއަށް ކުރެއްވި ރަސްމީ ދަތުރުފުޅުގައެވެ.