އިންޑިއާއިން ޖެޓްފިއުލް އެކްސްޕޯޓްކުރަނީ

އިންޑިއާއިން ފުރަތަމަ ފަހަރަށް އެކްސްޕޯޓްކުރާ ޖެޓް ފިއުލް ކާގޯ ޝިޕްމަންޓް އެމެރިކާއަށް ފޮނުވައިފިއެވެ.

ޝެވްރޮން ކުންފުންޏަށް އިންޑިއާއިން ޖެޓް ފިއުލް ޝިޕްމަންޓެއް ވިއްކަން ޖެހުނީ، އެމެރިކާގެ ހުޅަނގު ސަރަހައްދުތަކުގައި ޖެޓް ފިއުލް ލިބުން ދަތިވެގެންނެވެ. މިދަތިކަން ކުރިމަތިވީ އޮކްޓޯބަރު މަހު ކެލިފޯނިއާގައި ހުންނަ ޝެވްރޯން ކުންފުނީގެ ތެޔޮ ސާފުކުރާ ކާރުޚާނާގައި ހިނގި އަލިފާނުގެ ޙާދިސާއާއި ގުޅިގެން، އެ ކާރުޚާނާގެ ޕްރޮޑަކްޝަން ދަށްވުމުންނެވެ. އެތަނަކީ ދުވާލަކު 285،000 ފީފާގެ ތެޔޮ ސާފުކުރަމުން އައި ތަނެކެވެ. އެ ކާރުޚާނާ މަރާމާތު ކުރެވެންދެން އެމެރިކާގެ ހުޅަނގު ފަޅީގައި ޖެޓް ފިއުލްގެ ތާށިކަން އުޅޭނެކަމަށް މާކެޓް ދިރާސާކުރާ ފަރާތްތަކުން ބުނެއެވެ.

އޮކްޓޯބަރު މަހު ފަހުކޮޅު އިންޑިއާގެ ރިލަޔަންސް ކުންފުނީގެ ތެޔޮ ސާފުކުރާ ކާރުޚާނާއަކުން 60،000 މެޓްރިކް ޓަނުގެ ޖެޓްފިއުލް ޕެނެމެކްސް ކުންފުނީގެ ޓޭންކަރަކަށް ބަރުކޮށްފައެވެ. މި ޓޭންކަރު އަންނަ ޑިސެމްބަރު މަހު ކުރީކޮޅަށް ލޮސް އެންޖަލިސްއަށް ބަނދަރުކުރާނެ ކަމަށް ލަފާކުރެވެއެވެ.

އިންޑިއާގެ ޝިޕްމަންޓެއް އެމެރިކާއަށް ފޮނުވިނަމަވެސް، ޖެޓް ފިއުލްގެ ދަތިކަން ފިލުވަން އިންޑިއާއަށް ބަރޯސާ ވެވޭނެކަމަށް ނުބެލެވެއެވެ. ސަބަބަކީ އެމެރިކާގެ ހުޅަނގު ބިތަށް އިންޑިއާއިން އަންނަ ޓޭންކަރުތައް ގެނައުމަށް ނަގާ ވަގުތާއި ހޭދަވާ އަދަދު ބޮޑުވުމެވެ.