އީދު ބަންދުގައި ޕާސްޕޯޓުގެ ހިދުމަތް ލިބޭނެ ދުވަސްތައް އާންމުކޮށްފި
ކުރިއަށް އޮތް އަޟްހާ އީދު ބަންދުގައި ޕާސްޕޯޓުގެ ހިދުމަތް ލިބޭނެ ދުވަސްތައް މޯލްޑިވްސް އިމިގްރޭޝަނުން އާންމުކޮށްފިއެވެ.
އިމިގްރޭޝަނުން ކުރި ޕޯސްޓެއްގައި ބުނީ މި މަހުގެ 17 އިން 20 އަށް އިމުގާ ޕޯޓަލް މެދުވެރިކޮށް 24 ގަޑިއިރު ޕާސްޕޯޓަށް ހުށަހެޅޭނެ ކަމަށެވެ.
މި ދުވަސްތަކުގައި އެމަޖެންސީ ހާލަތުގައި ނުވަތަ 65 އަހަރުން މަތީގެ ބޭފުޅުންނަށް އިމިގްރޭޝަނަށް ހާޒިރުވެ އޮންލައިން ކޮށް ޕާސްޕޯޓަށް އެދި ހުށަހެޅޭނީ ހެނދުނު 9:00 އަކުން ފެށިގެން މެންދުރު 13:00 އަށް ކަމަށް ވެސް އިމިގްރޭޝަން ގެ ޕޯސްޓްގައި ވެއެވެ.
އިމިގްރޭޝަނުން އިތުރަށް ބުނީ، އީދު ބަންދުގައި، ޕާސްޕޯޓާއި ހަވާލުވުމަށް ނަންބަރު ދޫކުރާނީ ހެނދުނު 8:30 އިން ހަވީރު 16:00 އަށް ކަމަށާއި، ކިއުބީ އެޕްލިކޭޝަން މެދުވެރިކޮށް ނުވަތަ އިމިގްރޭޝަނަށް ހާޒިރުވެ ނަންބަރު ނެގޭނެ ކަމަށެވެ. އަދި މެންދުރު 12:00 އިން 12:45 އާއި ދެމެދު ނަންބަރު ދޫކުރުން މެދުކެނޑޭނެ ކަމަށް ވެސް އެ އިދާރާއިން މައުލޫމާތުދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
