ސުޕްރީމް ކޯޓްގެ ފަނޑިޔާރު ކަމަށް ބޮޑު ވާދައެއް، 12 ބޭފުޅަކު ކުރިމަތި ލައްވައިފި
ލިޔުންތެރިޔާ
އަހުމަދު ހަމީދު އާދަމް
ސުޕްރީމް ކޯޓުގެ ހުސްވެފައިވާ ފަނޑިޔާރުކަމުގެ މަގާމަށް ކުރިމަތިލުމަށް ހުޅުވާލި ފުުރުސަތުގައި 12 ބޭފުޅަކަށް އެކަމަށް ކުރިމަތިލާފައިވާ ކަމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ބުނެފި އެވެ.
ސުޕްރީމް ކޯޓަށް ފަނޑިޔާރުން ހޯދަނީ އެ ކޯޓްގެ ދެ ފަނޑިޔާރަކު މިދިޔަ ބުދަ ދުވަހު މަގާމުން ވަކިކުރުމާއި ގުޅިގެންނެވެ. ސުޕްރީމް ކޯޓުގެ ފަނޑިޔާރުކަމުން މަހާޒު އަލީ ޒާހިރާއި، ޑރ. އަޒްމިރަލްދާ ޒާހިރު ވަކިކުރީ ޖޭއެސްސީން އެ ދެ ފަނޑިޔާރުން މަގާމުން ވަކިކުރަން ނިންމާ އެކަން ރައްޔިތުންގެ މަޖިލީހަށް ހުށައެޅުމުން އެ މަޖިލީހުގައި ނެގުނު ވޯޓުންނެވެ.
ޖޭއެސްސީން އެ ފުރުސަތު ހުޅުވާލާފައި އޮތީ މިއަދު މެންދުރު 12 ޖެހުމާއި ހަމައަށެވެ. މުއްދަތު ހަމަވިއިރު 12 ބޭފުޅަކު ވަނީ ކުރިމަތިލައްވާފަ އެވެ. އޭގެ ތެރޭގައި ހައިކޯޓްގެ ފަނޑިޔާރުންނާއި ފަނޑިޔާރު ކަމުން ވަކިވެވަޑައިގެންފައިވާ ބޭފުޅުން ހިމެނެ އެވެ.
އެ ގޮތުން ހައިކޯޓްގެ އިސް ފަނޑިޔާރު މުހައްމަދު ފައިސަލް އާއި ކުރީގެ މަޖިލީސް މެންބަރު މުހައްމަދު ވަހީދު އިބްރާހިމް އާއި ކުރީގެ ފަނޑިޔާރުން ކަމަށްވާ އަބްދުالله ހަމީދު އާއި އަބްދުލް ގަނީ މުހައްމަދާއި ސުޖާއު އުސްމާން އާއި އަހުމަދު ހައިލަމް އާއި މުހައްމަދު ރާގިބު އަހުމަދު ހިމެނެ އެވެ.
އަދި ކުރީން ވެސް ސުޕްރީމް ކޯޓްގެ ފަނޑިޔާރު ކަަމަށް ކުުރިމަތިލެއްވި މަރްޔަމް ނިހާޔަތު އާއި އައިޝަތު ފަޒްނާ އަހުމަދު އާއި މުހައްމަދު ސަލީމް އާއި އިބްރާހިމް އަލީ ހިމެނެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
