ވީއައިއޭގެ ޓެކްސީވޭ ޗާލީ އަލުން ބިނާކުރުމުގެ އަމަލީ މަސައްކަތްކުރަން ޗައިނާގެ ކުންފުންޏަކާއި ހަވާލުކޮށްފި

ވެލާނާ އިންޓަރނޭޝަނަލް އެއަރޕޯޓް (ވީ.އައި.އޭ) އެކްސްޕޭންޝަން އެންޑް އިކޮނޮމިކް ޒޯން ޑިވެލޮޕްމެންޓް ޕްރޮޖެކްޓްގެ ދަށުން މިހާރު ބޭނުންކުރަމުންދާ ޓެކްސީވޭ ޗާލީ އަލުން ބިނާކުރުމުގެ އަމަލީ މަސައްކަތް ކުރުމަށް ބެއިޖިންގް އަރބަން ކޮންސްޓްރަކްޝަން ގުރޫޕް (ބީ.ޔޫ.ސީ.ޖީ) އާ ހަވާލުކޮށްފިއެވެ.

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ، މިއަދު ނޫވިލު ސީޕްލޭން ޓަރމިނަލްގައި ބޭއްވި ރަސްމިޔާތުގައި ޓެކްސީވޭ ޗާލީ ތަރައްޤީ ކުރުމުގެ އެއްބަސް ވުމާއި ފަހުމުނާމާގައި ސޮއި ކުރެއްވީ އެމް.އޭ.ސީ.އެލް ގެ ފަރާތުން ސީ.އީ.އޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު ކަމަށާއި، އަދި ބީ.ޔޫ.ސީ.ޖީ ގެ ފަރާތުން ޖެނެރަލް މެނޭޖަރ ލުއޯ ވެއި އެވެ.

މި ރަސްމިޔާތުގައި މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސައީދު، ޗައިނާއިން ދިވެހިރާއްޖެއަށް ކަނޑައަޅުއްވާފައިވާ ސަފީރު، ވާންގް ލީޒިންގ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް)ގެ ސީ.އީ.އޯ އަދި މެނޭޖިންގް ޑިރެކްޓަރ އިބްރާހިމް ޝަރީފް މުޙައްމަދު، ބީ.ޔޫ.ސީ.ޖީ ގެ ޖެނެރަލް މެނޭޖަރ މިސްޓަރ ލުއޯ ވެއިގެ އިތުރުން މޯލްޑިވްސް ސިވިލް އޭވިއޭޝަން އޮތޯރިޓީ، އެމް.އޭ.ސީ.އެލް، އަދި މޯލްޑިވްސް ނެޝަނަލް އެއަރޓްރެފިކް ސަރވިސްގެ އިސްބޭފުޅުން ބައިވެރިވެވަޑައިގެންނެވި ކަމަށް އެމްއޭސީއެލުން މައުލޫމާތުދެއެވެ.

މި ރަސްމިއްޔާތުގައި ވާހަކަދައްވަމުން އެމް.އޭ.ސީ.އެލްގެ ސީ.އީ.އޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރާއި ވެލާނާ އިންޓަރނޭޝަނަލް އެއަރޕޯޓުގެ ތަރައްޤީއަށް އެކުލަވާލައްވާފައިވާ 20 އަހަރުގެ މާސްޓަރޕްލޭންއާއި އެއްގޮތަށް އެއަރޕޯޓް ތަރައްޤީ ކުރުމުގެ އައު މަޝްރޫޢުތައް ބާރު ސްޕީޑުގައި ކުރިޔަށް ގެންދަވާނެކަމުގެ ޔަގީންކަން ދެއްވާފައެވެ.

އެގޮތުން ޓެކްސީވޭ ޗާލީ ތަރައްޤީ ކުރުމަކީ މި ޕްރޮޖެކްޓްގެ ދަށުން ފަށައިގަންނަ މުހިއްމު މަސައްކަތެއްކަން ފާހަގަކުރެއްވަމުން ޝަރީފް ވިދާޅުވީ، ޓެކްސީވޭ ޗާލީ ތަރައްޤީކޮށް ނިމޭއިރު އެއަރޕޯޓުގެ އޮޕަރޭޝަންތައް އިތުރަށް ފުޅާ ކުރެވި، ފްލައިޓް ޓަރން އެރައުންޑް ޓައިމް ކުޑަކޮށް، ޚިދުމަތް އަވަސްކުރުމަށް މަގުފަހި ވެގެންދާނެކަމަށެވެ.

ހަމައެއާއެކު އެއަރޕޯޓްގެ ސަލާމަތާއި ރައްކާތެރިކަން އިތުރަށް ހަރުދަނާވެ، ކުއްލި ހާލަތެއްގައި މަތިންދާބޯޓު ޖައްސާނެ ރަންވޭ އެއްގެ ގޮތުގައި ވެސް ބޭނުން ކުރެވިގެންދާނެ ކަމަށާއި، ބީ.ޔޫ.ސީ.ޖީއާއި އެކު އެމް.އޭ.ސީ.އެލްއިން ކުރިޔަށް ގެންދާ ހުރިހާ މަޝްރޫޢަކީވެސް ކާމިޔާބު ކަމާއެކު އަވަހަށް ނިންމާލެވޭ މަޝްރޫޢުތަކެއްކަމަށް ޝަރީފް ވިދާޅުވިއެވެ.

މީގެ އިތުރުންވެސް، މި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ މުޙައްމަދު ސައީދު ވިދާޅުވީ ވީއައިއޭގެ ޑިވެލޮޕްމަންޓަކީ ސަރުކާރުގެ ވަރަށް މުހިއްމު ސްޓްރެޓީޖިކް އިންވެސްޓްމެންޓެއް ކަމަށެވެ.

މިގޮތުން، ރާއްޖެ އަންނަ ފަތުރުވެރިންގެ ޢަދަދު ކައިރި މުސްތަޤްބަލެއްގައި 2.4 މިލިޔަނަށް އިތުރުވެގެންދިޔުމަކީ އުންމީދު ކުރައްވާ ކަމެއް ކަމަށާއި، އެމް.އޭ.ސީ.އެލްއަކީ ދިވެހިރާއްޖޭގެ އިޤްތިޞާދުގައި އެންމެ ޙިއްސާބޮޑު ކުންފުނިކަން މިނިސްޓަރު ސައީދު ފާހަގަކުރެއްވިއެވެ.

ވީ.އައި.އޭ ތަރައްޤީ ކުރުމުގެ ސަބަބުން މުޅި ދިވެހިރާއްޖެއަށްއިޤްތިޞާދީ ކުރިއެރުން ލިބޭނެކަމަށާއި، ޗައިނާއާއި ރާއްޖެއާއި ދެމެދުގައި އޮތް އެކުވެރި ގުޅުމާއި އިޤްތިޞާދީ މަޝްރޫޢުތަކުގައި އެ ޤައުމުގެ ޙިއްސާ ބޮޑުކަމަށް މިނިސްޓަރު ސައީދު ވިދާޅުވިއެވެ.

މިނިސްޓަރު ސައީދުގެ އިތުރުންވެސް، ޗައިނާ އިން ރާއްޖެއަށް ކަޑައަޅުއްވާފައި ހުންނަވާ ސަފީރު، ވާންގް ލީޒިންގ ވިދާޅުވީ ދިވެހިރާއްޖެއަކީ ދުނިޔޭގެ ކުރިއަރާފައިވާ މަންޒިލަކަށް ހެދުމަށް ވީ.އައި.އޭ ތަރައްޤީ ކުރުމަކީ މުހިއްމު ކަމެއް ކަމަށާއި، އިޤްތިޞާދީގޮތުން ރާއްޖެ ތަރައްޤީވެގެންދާތަން ފެނުމަކީ ޗައިނާއިން އެދޭ ކަމެއް ކަމަށެވެ.

މިފަދަ ކޮންމެ މަޝްރޫޢެއް ފުރިހަމަ ކުރުމުގައި އެމް.އޭ.ސީ.އެލްގެ މެނޭޖްމަންޓްގެ ހަރުދަނާކަމާއި ގުޅުން ރަނގަޅުކަން ފާހަގަކުރައްވާ، އެކަމަނާ ވަނީ ތައުރީފްކުރައްވާފައެވެ.

އެމްއޭސީއެލުން ބުނީ، 3200 މީޓަރުގެ މި ޓެކްސީވޭ ތަރައްޤީ ކުރުމުގެ މަސައްކަތް މި އަހަރު ނޮވެންބަރު މަހު ފެށުމަށް ހަމަޖެހިފައިވާއިރު، މި މަސައްކަތް 2027 ވަނަ އަހަރުގެ ތެރޭގައި ނިންމާލެވޭނެ ކަމަށް ބެލެވޭކަމަށެވެ.

ބީ.ޔޫ.ސީ.ޖީ ކުންފުންޏަކީ، މީގެ ކުރިން ވެލާނާ އިންޓަރނޭޝަނަލް އެއަރޕޯޓުގައި ހިންގާފައިވާ ތަރައްޤީގެ އެންމެ ބޮޑެތި މަސައްކަތްތައްކަމަށްވާ މިހާރު ބޭނުން ކުރަމުންދާ ކޯޑް އެފް ރަންވޭ، ނޫވިލު ސީޕްލޭން ޓާރމިނަލް، އައު ފަޔަރ ސްޓޭޝަން، އައު ކަރގޯ ޓަރމިނަލްއެއްގެ އިތުރުން އައު ފިޔުލް ފާމް ގެ މަސައްކަތްކޮށްފައިވާ ކުންފުނިކަން ފާހަގަކޮށްލަން ޖެހެއެވެ.