މިހާދު އާއި ސަޙަރު އެމްއޭސީއެލްގެ ބޯޑުން ވަކިކޮށްފި

‏މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ޑިރެކްޓަރުންގެ ބޯޑުގެ އެގްޒެކްޓިވް ޑިރެކްޓަރ، މުޙައްމަދު މިހާދު އަދި ބޯޑުގެ މެމްބަރ، ސަޙަރު ވަޙީދު, އެމްއޭސީއެލްގެ ބޯޑުން ވަކިކޮށްފިއެވެ.

އެ ދެމީހުން މަގާމުން ވަކިކުރީ މިއަދުއެވެ. މިކަން ޕީސީބީން ވަނީ އާއްމުކޮށްފައެވެ. ނަމަވެސް ސަބަބު ހާމަކޮށްފައެއް ނުވެއެވެ.

މިހާދު އެމްއޭސީއެލްގެ ބޯޑަށް އައްޔަންކުރައްވާފައިވަނީ 26 އެޕްރީލް 2025 ގައެވެ. އޭނާއަކީ މާލީ އަދި ވިޔަފާރި ހިންގުމުގެ ދާއިރާއިން ފުޅާ ދާއިރާއެއްގައި ތަޖުރިބާ ހޯއްދަވާފައިވާ، އިނގިރޭސިވިލާތުގެ ސީމާ (ސީއައިއެމްއޭ) ކޮލިފައިޑް ޗާޓަޑް މެނޭޖްމަންޓް އެކައުންޓެންޓެކެވެ.

މީގެއިތުރުން، މިހާދު ވަނީ މީގެކުރިން އެސްޓީއޯގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމާއި އެ ކުންފުނީގެ ޑިރެކްޓަރުންގެ ބޯޑު މެންބަރުކަން ވެސް ފުރުއްވާފައެވެ.

އަދި މިފްކޯ އާއި މޯލްޑިވްސް ސްޓޭޓް ޝިޕިން (އެމްއެސްއެސް) ގެ ބޯޑު މެންބަރުކަމުގެ އިތުރުން، އެފްއެސްއެމްގެ ޗެއާމަންކަމާއި އޮޑިޓް ފާމް ކޭޕީއެމްޖީ މޯލްޑިވްސްގެ ޕާޓްނަރެއްގެ ގޮތުގައި ވެސް އޭނާ ވަނީ ޚިދުމަތް ކުރައްވާފައެވެ.

މާލީ ދާއިރާގެ އިސް މަގާމުތަކުގައި 17 އަހަރަށްވުރެ ގިނަ ދުވަހުގެ ޚިދުމަތްކުރައްވާފައިވާ ސަޙަރު އެމްއޭސީއެލް ބޯޑަށް އައްޔަންކުރީ 24 ޑިސެމްބަރު 2023 ގައެވެ. އޭނާ ޕްރޮފެޝަނަލް ޗާޓަޑް ބޭންކަރެކެވެ.

ސަހަރު ވަނީ އިނގިރޭސިވިލާތުގެ މަޝްހޫރު ލަންޑަން ސްކޫލް އޮފް އިކޮނޮމިކްސް (އެލްއެސްއީ) އިން އިކޮނޮމިކްސްގެ ދާއިރާއިން ފުރަތަމަ ޑިގްރީ އަދި ޔުނިވާސިޓީ އޮފް ވެސްޓް އިންގްލެންޑުން ކޮމާޝަލް ލޯއިން މާސްޓާސް ހާސިލުކުރައްވާފައެވެ.