އެމްޑީޕީއާ ގުޅިގެން މި ސަރުކާރާ ދެކޮޅަށް ސިޔާސީ މަސައްކަތެއް ނުކުރާނަން: ރައީސް ޔާމީން

އިދިކޮޅުގައި މައި ޕާޓީ، އެމްޑީޕީ އާ ގުޅިގެން ސިޔާސީ އެއްވެސް މަސައްކަތެއް ނުކުރައްވާނެ ކަމަށް ކުރީގެ ރައީސް އަބްދުالله ޔާމީން މިއަދު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރޮގްރާމުގައި, އެމްޑީޕީއާއެކު ސިޔާސީ ހަރަކާތެއްގައި ބައިވެރިވެވަޑައިގަންނަވާނަންތޯ ކުރެވުނު ސުވާލަށް ޖަވާބުދެއްވަމުން ޔާމީން ވިދާޅުވީ، އެމްޑީޕީގެ ވިސްނުން އެމަނިކުފާނުގެ ވިސްނުންފުޅާ ނުގުޅޭ ކަމަށެވެ. އެހެން ކަމުން އެ ޕާޓީއާއެކު މަސައްކަތް ކުރުމަކީ ވާނޭ ކަމެއް ނޫން ކަމަށެވެ.

"ނޫން. ތިއީކީ ވާނެ ކަމެއް ނޫން. ވާގޮތަކީ، އަޅުގަނޑުމެންގެ އައިޑޮލޮޖީއާ އެމްޑީޕީގެ އައިޑޮލޮޖީއާ ތަފާތު. ވަރަށް ތަފާތު. އަޅުގަނޑަށް މި ކުރި ހުރިހާ ޖެއްސުމަކާ ހުރިހާ ގޯނާއެއް ކުރީ އެމްޑީޕީ ސަރުކާރުން ދެއްތޯ؟ އެހެންވީމަ ކީއްކުރަންތޯ އެމީހުންނާ އެކީ ކުރިއަށްދާންވީ. އަޅުގަނޑު ހަމަ އެއްގޮތަކަށްވެސް އެއްވެސް އިރެއްގެ ޚިޔާލެއް ނެތް.“

ކުރީގެ ރައީސް އަބްދުالله ޔާމީން

އެމީހުންނާ އެކީ ވާހަކަތަކެއް ދެއްކިދާނެ. އެހެން ނަމަވެސް، އެމީހުންނާއެކީ އެގްރީމަންޓެއް ހަދައިގެން، އެމީހުންނާއެކީ ސިޔާސީ މަސައްކަތްކޮށް، މި ސަރުކާރު ވައްޓާލަން، ސަރުކާރަށް ދެރަދޭން މިކަންކަން ކުރަން، ކޮންމެހެން އަޅުގަނޑު ނެތިން އެމްޑީޕީއާއެކު" ޔާމީން ވިދާޅުވިއެވެ.

ޔާމީން ވިދާޅުވި ގޮތުގައި، އެމަނިކުފާނު އެމްޑީޕީއަށް އިތުބާރެއް ނުކުރައްވައެވެ. އަދި އެމްޑީޕީ އަކީ ރާއްޖޭގެ ރައްޔިތުންގެ ފައިދާއަށް މަސައްކަތް ކުރާ ޕާޓީއެއް ކަމަށްވެސް ގަބޫލު ނުކުރައްވާ ކަމަށް ވިދާޅުވިއެވެ.

އެމޑީޕީންވެސް ރަނގަޅު ކަންކަން ކޮށްފައި ހުރި ކަމަށާ، އެހެން ނަމަވެސް، ޖުމްލަކޮށް އެމީހުން ކޮށްފައި ހުރި ކަންކަމަށް ބަލާއިރު، ”ރާއްޖެ އަޅުވެތިވެ، އިންޑިޔާގެ ދަށުވެ ހުރިހާ ކަމެއް ހަލާކުވެގެން ދިޔުމަކީ“ އެމްޑީޕީ ސަރުކާރުން ޒިންމާ ނަގަންޖެހޭ ކަމެއް ކަމަށް ވިދާޅުވުއެވެ.