އެމްއެންޔޫގެ ޢަރަބި ބަހުގެ ކްރޭޝް ކޯހުގައި ބައިވެރިވުމުގެ ފުރުޞަތު؛ ފީއެއް ދައްކާކަށް ނުޖެހޭނެ
ލިޔުންތެރިޔާ
ޚަދީޖާ އަރުފާ
ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އާޓްސްއިން އިންތިޒާމުކުރާ ޢަރަބި ބަހުގެ ކްރޭޝް ކޯހުގައި ބައިވެރިވުމުގެ ފުރުޞަތު ހުޅުވާލައިފިއެވެ.
އެމްއެންޔޫއިން ބުނީ މި ކޯހަކީ ޢަރަބި ބަހުގެ އަސާސްތައް ދަސްކޮށްދިނުމަށާއި، އެ ޔުނިވަރސިޓީން ކުރިއަށްގެންދާ ޢަރަބި ބަހުގެ އެކި ޕްރޮގްރާމްތަކަށް ވަނުމަށް ބޭނުންވާ ފަރާތްތަކަށް މަގުފަހިކޮށްދިނުމުގެ މަޤްޞަދުގައި ބާއްވާ ކޯހެއް ކަމަށެވެ.
މި ކޯސް ކުރިއަށް ގެންދިއުމަށް ހަމަޖެހިފައިވަނީ 2026 ޖުލައި 09 ވާ ބުރާސްފަތި ދުވަހުގެ ރޭގަނޑު 20:15 އިން 23:15 އަށެވެ. ތިން ގަޑިއިރުގެ މި ކޯސް ކުރިއަށްދާނީ ހައިބްރިޑް މޯޑަށެވެ. އެގޮތުން އެމްއެންޔޫގެ މާލެ ކެމްޕަހަށް ހާޒިރުވެގެންނާއި އޮންލައިންކޮށްވެސް ބައިވެރިވުމުގެ ފުރުޞަތު ވަނީ ހުޅުވާލާފައެވެ.
ޖުމްލަ 100 ފުރުޞަތު ހުޅުވާލާފައިވާ މި ކޯހުގައި މާލެ ކެމްޕަހަށް ހާޒިރުވެގެން ކިޔެވުމުގެ ފުރުޞަތު ދެނީ 40 ބައިވެރިންނަށެވެ. އަދި އޮންލައިންކޮށް ބައިވެރިވެވޭނީ 60 ފަރާތަކަށެވެ. މި ކޯހަށް ބައިވެރިން ހޮވުމުގައި އިސްކަންދޭނީ ފޯމު ހުށަހަޅާ ތަރުތީބުންނެވެ.
ޢުމުރުން 16 އަހަރުން މަތީގެ ކޮންމެ ފަރާތަކަށްވެސް ބައިވެރިވެވޭ މި ކޯހަކީ މުޅިން ހިލޭ ކުރިއަށްގެންދާ ކޯހެކެވެ. ކޯސް ފުރިހަމަކުރާ ފަރާތްތަކަށް ޢަރަބި ބަހުގެ އަސާސީ މައުލޫމާތުތައް ލިބިގެންދާނެ ކަމަށާއި، މިއީ މަތީ ފަންތީގެ ޢަރަބި ބަހުގެ ކޯސްތަކަށް ދިއުމަށް ލިބޭނެ ވަރަށް ބޮޑު އެހީތެރިކަމެއް ކަމަށް އެމްއެންޔޫއިން ފާހަގަކުރެއެވެ.
މި ކޯހުގައި ބައިވެރިވާން އެދޭ ފަރާތްތަކުން 2026 ޖުލައި 05 ވަނަ ދުވަހުގެ 23:59 ގެ ކުރިން ފޯމު ހުށަހަޅަންޖެހެއެވެ. ކޯހަށް ރަޖިސްޓްރީވާ ފަރާތްތަކަށް ކޯހުގެ ތާވަލު ފޮނުވޭނެއެވެ.
ކޯހާ ގުޅޭ އިތުރު މަޢުލޫމާތު ހޯދުމަށް ފެކަލްޓީ އޮފް އާޓްސްގެ އީމެއިލް [email protected] އަށް މެއިލް ކުރުމަށް އެމްއެންޔޫއިން އެދެއެވެ. ކޯހުގައި ބައިވެރިވާ ފޯމު ތިރީގައިވާ ލިންކުގައި ވާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
