އިންޑިޔާއިން ފެނުނީ ނިޕާ ވައިރަސްގެ ދެ ކޭސް

އިންޑިއާގެ އިރުމަތީގެ ސްޓޭޓެއް ކަމަށްވާ ވެސްޓް ބެންގޯލްއިން މިދިޔަ ޑިސެމްބަރު މަހުން ފެށިގެން ނިޕާ ވައިރަސްގެ ދެ ކޭސް ފެނިފައިވާކަމަށް އެ ޤައުމުގެ ހެލްތު މިނިސްޓްރީން ކަށަވަރުކޮށްދީފިއެވެ.

މިކަމާ ގުޅިގެން އެގައުމާއި، ދެކުނު އިރުމަތީ އޭޝިއާގެ ބައެއް ޤައުމުތަކުން މިހާރު ވަނީ ވައިގެ މަގުން ދަތުރުކުރާ ފަރާތްތައް ސްކްރީން ކުރުމުގެ މަސައްކަތް ވަރުގަދަކޮށްފައެވެ.

އިންޑިއާގެ ހެލްތު މިނިސްޓްރީން ނެރުނު ބަޔާނެއްގައި ބުނެފައިވަނީ، ނިޕާ ވައިރަސްއާ ގުޅޭގޮތުން ސައްހަ ނޫން މައުލޫމާތާއި އަދަދުތައް ފެތުރެމުންދާ ކަމަށާއި، ނަމަވެސް މިހާތަނަށް ފެނިފައިވަނީ ރަސްމީކޮށް ކަށަވަރުކުރެވޭ ދެ ކޭސް ކަމަށެވެ. މި ބަލި ޖެހުނު މީހުންނާ ބައްދަލުވި 196 މީހަކު ދެނެގަނެ، އެމީހުން މޮނިޓަރ ކުރަމުންދާ ކަމަށްވެސް މިނިސްޓްރީން ބުނެއެވެ. ނަމަވެސް އެއިން އެއްވެސް މީހެއްގެ ކިބައިން ބަލީގެ އަލާމާތެއް ފެނިފައި ނުވާކަމަށާއި، އެންމެންގެ ޓެސްޓުތައް ނެގެޓިވްވެފައިވާ ކަމަށްވެސް އިންޑިއާއިން ހާމަކުރެއެވެ.

މި ބަލި ފެތުރުން ހުއްޓުވުމަށްޓަކައި ތައިލެންޑާއި މެލޭޝިއާއިން ވަނީ ރައްކާތެރިކަމުގެ ހަރުކަށި ފިޔަވަޅުތަކެއް އަޅަން ފަށާފައެވެ. ތައިލެންޑުގެ ހެލްތު މިނިސްޓްރީން ބުނިގޮތުގައި، ނިޕާ ވައިރަސް ފެނިފައިވާ ސަރަހައްދުތަކުން އަންނަ ބޯޓުތައް ޕާކުކުރުމަށް ވަކި ސަރަހައްދުތަކެއް ވަނީ ހަމަޖައްސާފައެވެ. އަދި އެ ގައުމަށް އެތެރެވާ ފަސިންޖަރުން އިމިގްރޭޝަން ކްލިއަރެންސް ހޯދުމުގެ ކުރިން ސިއްހީ ޑިކްލަރޭޝަން ފޯމެއް ފުރިހަމަކުރަން ޖެހޭނެއެވެ.

މެލޭޝިއާގެ ހެލްތު މިނިސްޓްރީންވެސް ވަނީ ބައިނަލްއަޤްވާމީ ބޯޑަރުތަކުގައި ސްކްރީން ކުރުމުގެ ކަންކަން ވަރުގަދަކޮށް، ބަލި ފެތުރުމުގެ ފުރުސަތު އޮތް ޤައުމުތަކުން އަންނަ ދަތުރުވެރިންނަށް ހާއްސަ ސަމާލުކަމެއް ދޭން ފަށާފައެވެ. އެ މިނިސްޓްރީން ބުދަ ދުވަހު ނެރުނު ބަޔާނެއްގައި ބުނެފައިވަނީ، އެހެން ޤައުމުތަކުން ބަލި ފެންނަމުންދާތީ، ބޯޑަރު ހުރަސްކޮށް ބަލި އެތެރެވިޔަނުދިނުމަށް ފާރަވެރިވަމުންދާ ކަމަށެވެ.

ދުނިޔޭގެ ސިއްހަތު ޖަމިއްޔާ (WHO) އިން ހާމަކުރާ ގޮތުގައި، ނިޕާ ވައިރަސް ޖެހޭ މީހުން މަރުވުމުގެ ފުރުސަތު އޮތީ 40 އިންސައްތައާއި 75 އިންސައްތައާ ދެމެދުގެ މިންވަރެއްގައެވެ. މި ބައްޔަކީ ބޮޑު ވަބާއަކަށް ބަދަލުވުމުގެ ބިރު އޮތް ނުރައްކާތެރި ބައްޔެއްގެ ގޮތުގައި އެ ޖަމިއްޔާއިން ވަނީ ކަނޑައަޅާފައެވެ. މިހާތަނަށް މި ބަލިން ރައްކާތެރިވުމަށް އެއްވެސް ވެކްސިނެއް ނުވަތަ ބައްޔަށް ފަރުވާދޭނެ ވަކި ހާއްސަ ބޭހެއް އުފެއްދިފައެއް ނުވެއެވެ.