މަސްވެރިކަމުގެ ވިޔަފާރިން ސަރުކާރު އެއްފަރާތް ވާންޖެހޭ: ނަޝީދު
ލިޔުންތެރިޔާ
އަބްދުﷲ ހުސައިން
މަސްވެރިކަމުގެ ވިޔަފާރިން ސަރުކާރު އެއްފަރާތްވާންޖެހޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަސްވެރިންގެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ މަސްގަތުމުގެ ލައިސަންސް ބޭރުގެ ފަރާތްތައް ހިމެނޭހެން ހުޅުވާލައި މިކަމުގެ ވިޔަފާރިން ސަރުކާރު އެއްފަރާތްވާން ޖެހޭކަމަށެވެ.
މަސްވެރިން ބާނާމަހަށް ހަމަ އަގު ހޯދަން ބޭނުންވާނަމަ ރޯމަސް ބޭރުކުރުން ހުއްޓާލައި، ވެލިއު އެޑްކުރުމަށްފަހު މަހުގެ އުފެއްދުންތައް ބޭރުކުރަން ޖެހޭކަން ރައީސް ނަޝީދު ވަނީ ފާހަގަކުރައްވާފައެވެ. އެގޮތުން ގޭދޮށު މަސްޕްލާންޓާއި، ކަންނެލި ޖަގަހަ ތައާރަފްކުރަންޖެހޭކަމަށް ރައީސް ނަޝީދު ވިދާޅުވިއެވެ.
މީގެ އިތުރުން އޮޑިފަހަރުގައި މަސްފިނިކުރެވޭ ނިޒާމްތައް ގާއިމްކޮށް އޮޑިފަހަރު ހިންގަން ކުރަންޖެހޭ ހަރަދު ދަށްކުރަންޖެހޭކަމަށް ނަޝީދުގެ ޕޯސްޓްގައި ވަނީ ވިދާޅުވެފައެވެ.
ސަރުކާރުން މަސްވެރިކަމުގެ ވިޔަފާރިން ދޫކޮށްލަންޖެހޭ ކަމަށް ރައީސް ނަޝީދު ވިދާޅުވިއިރު، އެމަނިކްފާނުގެ ވެރިކަމުގައި މިފްކޯގެ ދަށުގައި އޮތް ކޫއްޑޫ ވަކިކޮށް، ވަކި ކުންފުންޏެއްގެ ގޮތުގައި ހިންގަން ފެށިއެވެ. ރާއްޖޭގެ މަސްވެރިކަމުގެ ތާރީހުގައި އެންމެފުރަތަމަ މަސްގަންނަ އަގުތައް މައްޗަށްދާން ފަށާފައިވަނީ ރައީސް ނަޝީދުގެ ވެރިކަމުގެ ތެރޭގައިކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
