ފައިސާގެ އެހީ ލިބޭ 10 ޖަމިއްޔާއަކާއެކު އެއްބަސްވުމުގައި ސޮއިކޮށްފި

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން މުޖުތަމައު ބާރުވެރިކުރުމުގެ މަޝްރޫއުތަކަށް ފައިސާގެ އެހީ ދިނުމަށް ހޮވުނު 10 މަދަނީ ޖަމްއިއްޔާއަކާއެކު މިއަދު އެއްބަސްވުމުގައި ސޮއިކޮށްފިއެވެ.

މި އެހީއަކީ މަދަނީ ޖަމްއިއްޔާތަކުން ހިންގާ މުޖުތަމައު ބާރުވެރިކުރުމުގެ މަޝްރޫއުތަކަށް ފައިސާގެ އެހީއަށް އެދި ހުށަހެޅުމަށް މިނިސްޓްރީން ކުރިން ހުޅުވާލި ފުރުސަތުގެ ދަށުން ދެވޭ ގްރާންޓެކެވެ.

މިއަދު ސޮއިކުރެވުނު ޖަމްއިއްޔާތަކުގެ ތެރޭގައި ދުވާފަރު ޔޫތު މޫވްމަންޓް، އައިކަންސް އެސޯސިއޭޝަން، ތުޅާދޫ ސިލްވަރ ޝައިންސް ކްލަބް، ޑައިބިޓީސް ސޮސައިޓީ އޮފް މޯލްޑިވްސް، ޖަމްއިއްޔަތުލް ސަލަފް، ހުޅުދެލީ އައިލެންޑް ސޯޝަލް އެންޑް ސްޕޯޓްސް އެސޯސިއޭޝަން، ޓޮޕްސީ، އެސޯސިއޭޝަން ފޯ މަތިވެރި ސްޕޯޓްސް އެންޑް އެވެއާނަސް، ގަމު ޒުވާނުންގެ ޖަމްއިއްޔާ އަދި ސޮސައިޓީ ފޯ ތުނޑީ އެޑްވާންސްމަންޓް އެންޑް ރެކްރިއޭޝަން ހިމެނެއެވެ.

މިނިސްޓްރީގެ ފަރާތުން މައުލޫމާތު ދެއްވި ގޮތުގައި، މާދަމާ ވެސް އިތުރު ޖަމްއިއްޔާތަކާއެކު ސޮއިކުރުމަށް ވަނީ ހަމަޖެހިފައެވެ. މި ގްރާންޓް ޕްރޮގްރާމް އިއުލާނު ކުރެވިފައިވަނީ މިއަހަރުގެ މެއި މަހުގެ ތެރޭގައެވޭގައެވެ. މި ފިޔަވަހީގައި އެހީ ދިނުމަށް ހަމަޖެހިފައިވަނީ ކުދި، މެދު އަދި ބޮޑެތި މަޝްރޫއުތަކާއި ހަރަކާތްތައް ހިންގުމަށް ކަމަށާއި، އެހީގެ ގޮތުގައި ދެވޭނީ ގިނަވެގެން 300،000 (ތިން ލައްކަ) ރުފިޔާ ކަމަށް މިނިސްޓްރީން ވަނީ ކަނޑައަޅާފައެވެ.

މި ގްރާންޓްގެ މައިގަނޑު މަޤްޞަދަކީ މުޖުތަމައު ބާރުވެރިކުރުމަށް މަދަނީ ޖަމްއިއްޔާތަކުން ކުރަމުންދާ މަސައްކަތްތައް ފާހަގަކޮށް، އެފަދަ މަސައްކަތްތަކަށް އެއްބާރުލުންދީ އެހީތެރިކަން ފޯރުކޮށްދިނުމާއެކު، ޤައުމީ ތަރައްޤީގައި މަދަނީ ޖަމްއިއްޔާތަކުގެ ދައުރު ފުޅާކުރުމެވެ.