ފެނަކައިގެ މައްސަލަތަކުން 21 މިލިއަނަށްވުރެ ގިނަ ރުފިޔާ ވާނީ ހޯދަން އެދިފައި: އޭސީސީ

މިހާތަނަށް ބަލައި ނިންމާފައިވާ ފެނަކައިގެ މައްސަލަތަކުން 21 މިލިއަނަށްވުރެ ގިނަ ރުފިޔާ ހޯދުމަށް އެކުންފުންޏަށް އަންގާފައިވާކަމަށް އެންޓި ކޮރަޕްޝަން ކޮމިޝަނުން ބުނެފިއެވެ.

އޭސީސީން މިއަދު ނެރުނު ބަޔާނެއްގައި ބުނެފައިވަނީ، ފެނަކައާ ގުޅޭ ގޮތުން އެކި މައްސަލަތައް ތަޙުޤީޤު ކުރުމަށްފަހު، އެ މައްސަލަތަކާ ގުޅިގެން، 21،4 މިލިއަން ރުފިޔާ އަނބުރާ ހޯދުމަށް އެ ކުންފުންޏަށް ކޮމިޝަނުން އަންގާފައިވާކަމަށެވެ.

އޭސީސީން ބުނީ އޮޑިޓަރ ޖެނެރަލް ނެރުއްވާފައިވާ ފެނަކއިގެ އޮޑިޓް ރިޕޯޓުގައި ފާހަގަކުރައްވާފައިވާ މައްސަލަތަކުގެ ތެރެއިން އެކޮމިޝަނުގެ ތަޙުޤީޤުކުރުމުގެ އިޚްތިޞާސްއަށް ފެތޭ މައްސަލަތަކަކީ ކޮބައިކަންބަލައި އަޅަންޖެހޭ ފިޔަވަޅުތައް އެޅުމުގެ މަސައްކަތްތައް ކުރަމުންދާކަމަށެވެ.

އޮޑިޓަރ ޖެނެރަލްގެ އޮފީހުގެ އޮޑިޓް ރިޕޯޓްގައި ފާހަގަކުރައްވާފައިވާ ގިނަ މައްސަލަތަކަކީ މި ކޮމިޝަނުން މިހާރުވެސް ތަޙުޤީޤު ކުރަމުންދާ މައްސަލަތައްކަން ފާހަގަކުރަމުން އޭސީސީން ބުނީ، މިހާރުވެސް ފެނަކަ ކޯޕަރޭޝަންގެ 161 މައްސަލަ ބަލައި ތަޙުޤީޤުކުރަމުން އަންނަ ކަމަށެވެ. މި މައްސަލަތަކުގެ ތެރެއިން 13 މައްސަލައެއްގައި ޕްރޮސިކިއުޓަރ ޖެނެރަލްގެ އޮފީހާއެކު ޑިއުޓީ ޕްރޮސިކިއުޝަން މަރުޙަލާ ފަށާފައިވާއިރު، 2022 ވަނަ އަހަރުން ފެށިގެން ފެނަކަ ކޯޕަރޭޝަނަށް ނިސްބަތްވާ 9 މައްސަލައެއްގައި އެކި ފަރާތްތަކުގެ މައްޗަށް ދަޢުވާކޮށްދިނުމަށް އެދި ޕީޖީ އޮފީހަށް ފޮނުވާފައިވާކަމަށް އޭސީސީން ބުންޏެވެ. އޭގެ ތެރެއިން ބައެއް މައްސަލަތަކުގައި ދަޢުވާކުރެވި ހުކުމްވެސްކޮށް ނިމިފައިވާކަން އޭސިސީން ފާހަގަކުރިއެވެ.

އޭސިސީން ބުނީ ، ފެނަކައާ ގުޅޭ އެކި މައްސަލަތަކުގައި 96 ކަމެއް އިސްލާޙުކުރުމަށް، އެ ކުންފުންޏަށް އަންގާފައިވާކަމަށެވެ. އޭގެ ތެރޭގައި ފެނަކަ ހިންގުމާ ގުޅޭ ކަންކަން ކުރިއަށްގެންގޮސްފައިވާ ގޮތުގެ 49 ކަމަކާއި، ކުންފުނީގެ ސިޔާސަތުތަކާ ގުޅޭ 26 ކަމެއް ހިމެނެއެވެ. އަދި މީގެ އިތުރުން ކޮރަޕްޝަންގެ ޢަމަލުތަކުގެ ސަބަބުން ފެނަކައަށް ގެއްލިފައިވާ ފައިސާ އަނބުރާ ހޯދުމާ ގުޅޭ 10 ކަމަކާއި، ކުންފުނިން ބަލައި ތަޙުޤީގުކުރުމަށް 8 ކަމަކާއި އަދި އިތުރު ކަންކަން ހިމެނޭކަމަށްވެސް އޭސީސީން ބުންޏެވެ.

އޮޑިޓަރ ޖެނެރަލް ނެރުއްވި ފެނަކައިގެ އޮޑިޓް ރިޕޯޓްގައި އެންމެ ފާހަގަކުރެވިގެން ގޮސްފައިވަނީ، ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ އެއްބަސްވުން ހަދާފައިވުމެވެ.