މެދުއިރުމަތިން ރާއްޖެ އަންނަ ފްލައިޓްތައް ޑިލޭވަނީ

އީރާނާއި އިސްރާއީލާއި ދެމެދު ހިނގަމުންދާ ކުރިމަތިލުންތަކުގެ ސަބަބުން މެދުއިރުމަތީގެ ގައުމުތަކުން ރާއްޖެ އަންނަ ފްލައިޓްތައް ކޮންމެވެސް ވަރަކަށް ޑިލޭވަމުން އެބަދެއެވެ.

ރާއްޖެއަށް އަންނަ ފްލައިޓްތައް ޑިލޭ ވަމުން ދަނީ ޖުމްލަކޮށް މުޅި މެދުއިރުމައްޗަށް ހުޅަނގު އޭޝިއާގެ ވައިގެ ސަރަހައްދަށް އައިސްފައިވާ ބާރުބޮޑުކަމާއެކުގައެވެ.

ރާއްޖެއަށް އެންމެ ގިނަ އަދަދަކަށް ފަތުރުވެރިން އުފުލާ އެއް އެއަރލައިންކަމަށްވާ ފްލައި ޑުބާއީގެ ރާއްޖޭގެ އެޖެންޓް އިނަރ މޯލްޑިވްސްގެ ވެރިޔާ މުހައްމަދު ފިރާޤް ވޮއިސްއަށް މައުލޫމާތު ހިއްސާކުރަމުން ވިދާޅުވީ މިހާރު ހިނގަމުންދާ ކަންކަމުގެ ސަބަބުން ވައިގެ ބައެއް ސަރަހައްދުތައް ބަންދުވެ، މަތިންދާބޯޓުތަކުން އާއްމުކޮށް ބޭނުންކުރާ ރޫޓްތައް ނޫން އެހެން ރޫޓްތައް ނަގަން ޖެހުމުގެ ސަބަބުން ދަތުރުތަކުގެ ދިގުމިން އިތުރުވަމުން ދާކަމަށެވެ. އަދި ފްލައިޓްތައް ލަސްވެ، ޔޫރަޕާއި، އޭޝިއާ އަދި އެހެން ސަރަހައްދުތަކަށް ދަތުރުކުރަން ކަނެކްޝަން ފްލައިޓްތައް ނެގުމުގައިވެސް ލަސްތަކެއް ދިމާވެ، މުޅި ވައިގެ ދަތުރުފަތުރުގެ ސިނާޢަތަށް ބުރޫ އަރަމުން އަންނަކަން ފިރާގް ފާހަގަކުރެއްވިއެވެ.

އާއްމުކޮށް އޮން ޓައިމް' ކޮށް އަންނަ ބައެއް ފްލައިޓްތައްވެސް މިހާރު ލަސްވަމުންދާކަމަށް އެހެން ޓްރެވަލް އެޖެންޓުންވެސް ވަނީ ފާހަގަކޮށްފައެވެ.

އެމްއޭސީއެލްގެ ފްލައިޓް ޝެޑިއުލަށް ބަލާއިރު، މިއަދު ހަވީރު މެދުއިރުމަތިން އަންނަން އޮތް ފްލައިދުބާއީގެ ފްލައިޓެއްވެސް ވަނީ ޑިލޭވެފައެވެ.

ޔުނައިޓެޑް އަރަބް އެމިރޭޓްސްގެ ވައިގެ ސަރަހައްދު ހުޅުވާލާފައި އޮތްނަމަވެސް، ރީރޫޓްކުރާ މަތިންދާބޯޓުތަކުން ޑުބާއީ އިންޓަނޭޝަނަލް އެއަރޕޯޓާއި ޝާރްޖާ އިންޓަނޭޝަނަލް އެއަރޕޯޓް ބޭނުންކުރަން ފެށުމުން، ޖުމްލަކޮށް ޔޫ.އޭ.އީގެ ވައިގެ ސަރަހައްދަށްވެސް ވަނީ ބާރު ބޮޑުވެފައެވެ. ޑުބާއީ އެއަރޕޯޓް ބޭނުންކުރާ މައި ދެ އެއަރލައިންކަމަށްވާ ފްލައި ޑުބާއީއާއި އެމިރޭޓްސްއިންވެސް ގިނަ އަދަދެއްގެ ފްލައިޓްތައް ކެންސަލްކޮށް، ބައެއް ފްލައިޓްތައް ޑިލޭކޮށްފައިވެއެވެ.

އެމިރޭޓްސްއިން މި މަހުގެ ނިޔަލަށް ފްލައިޓްތައް މެދުކަނޑާލި މަންޒިލްތަކުގެ ތެރޭގައި އުރްދުންގެ ޢައްމާން، ލުބްނާނުގެ ބެއިރޫތު، އިރާޤްގެ ބަޣްދާދު އަދި ބަޞަރާ ހިމެނެއެވެ. އަދި އިސްރާއީލުގެ ތެލްއަވީވަށް ކުރާ ދަތުރުތައް މުއްދަތެއް ނެތް ގޮތަށް ވަނީ މެދުކަނޑާލާފައެވެ.